‘पंतप्रधान नरेंद्र मोदी, मुख्यमंत्री देवेंद्र फडणवीस यांच्या सक्षम नेतृत्त्वावर जनतेचा विश्वास’; शिवेंद्रसिंहराजेंचं विधान

मतदारांनी खांदेपालट करत नवीन लोकांना संधी दिली पाहिजे. या निवडणुकीच्या निमित्ताने नगरपालिकेची सत्ता भाजपकडे देण्याची योग्य वेळ आली आहे. रहिमतपूर पालिका ही भाजपच्या विचारांची बनवा, पालिकेवर भाजपच्या विचारांचा झेंडा फडकवा.

सातारा : केंद्रात आणि राज्यात भाजपची सत्ता आहे. पंतप्रधान नरेंद्र मोदी, मुख्यमंत्री देवेंद्र फडणवीस यांच्या सक्षम नेतृत्वावर जनतेचा विश्वास आहे. सर्वसामान्य माणूस, शेतकरी व महिलांच्या विकासासाठी भाजपने राबविलेल्या विविध योजना तळागाळापर्यंत पोहचल्या आहेत. देशात विकासाचे नवे पर्व सुरु आहे. रहिमतपूर पालिकेवर 25 वर्षे राष्ट्रवादीच्या विचारांची सत्ता होती. संधी मिळूनही त्यांना रहिमतपूरचा सर्वांगीण विकास करता आला नाही, अशा शब्दांत सार्वजनिक बांधकाममंत्री शिवेंद्रसिंहराजे भोसले यांनी सांगितले.

रहिमतपूर शहरात परिवर्तनाचे वारे वाहू लागले आहे. पालिकेत परिवर्तन अटळ असून, जनतेने या परिवर्तनाचे साक्षीदार व्हावे. रहिमतपूरच्या चौफेर विकासासाठी भाजपच्या सर्व उमेदवारांना प्रचंड मताधिक्याने विजयी करावे, असे आवाहनही त्यांनी केले. रहिमतपूर नगरपालिका निवडणुकीनिमित्त भारतीय जनता पार्टीच्या उमेदवारांच्या प्रचारार्थ गांधी चौकात आयोजित केलेल्या विराट सभेत ते बोलत होते.

हेदेखील वाचा : NCP Politics: तिजोरीच्या चाव्यांवरून नव्या वादाची ठिणगी; लाडकी बहीण योजनेवरून प्रफुल्ल पटेलांचा पुनरूच्चार

यावेळी व्यासपीठावर ग्रामविकासमंत्री जयकुमार गोरे, मनोज घोरपडे, निवडणूक प्रभारी धैर्यशील कदम, सुनील काटकर, भाजप महिला मोर्चा प्रदेश उपाध्यक्षा चित्रलेखा माने-कदम यांच्यासह अनेकांची उपस्थिती होती. ते पुढे म्हणाले की, ही विराट सभा म्हणजे चित्रलेखा माने-कदम, संपतराव माने, निलेश माने यांच्या ताकदीचे प्रतीक आहे. जनता आता नगरपालिकेत परिवर्तन घडविल्याशिवाय राहणार नाही. गेली 25 वर्षे सत्ताधाऱ्यांनी जनतेला आमिषे दाखवली. आता जनता सुज्ञ झाली आहे. त्यांच्या खोट्या भुलथापांना बळी पडणार नाही.

मतदारांनी नवीन लोकांना संधी द्यावी

मतदारांनी खांदेपालट करत नवीन लोकांना संधी दिली पाहिजे. या निवडणुकीच्या निमित्ताने नगरपालिकेची सत्ता भाजपकडे देण्याची योग्य वेळ आली आहे. रहिमतपूर पालिका ही भाजपच्या विचारांची बनवा, पालिकेवर भाजपच्या विचारांचा झेंडा फडकवा. मुख्यमंत्री देवेंद्र फडणवीस आपल्या पाठीशी खंबीरपणे उभे आहेत. त्यामुळे निधीची चिंता करु नका. शहराच्या सर्वांगीण विकासकामांसाठी निधीची कमतरता पडणार नाही.

प्रामाणिक कार्यकर्त्यांच्या भाजप पाठीशी

प्रामाणिक कार्यकर्त्यांच्या भाजप पाठीशी ठामपणे उभा राहतो. योग्यवेळी योग्य न्याय देतो. आपण सर्वांनी या निवडणुकीत एकसंघपणे काम करावे. निष्ठेने काम करणाऱ्या कार्यकर्त्यांची दखल पक्ष घेत असतो. चित्रलेखा माने-कदम यांना राज्यातील मोठ्या पदावर नेण्याची जबाबदारी आमची असणार आहे. ती आपणास नजीकच्या काळात कळेल. लोकसभेला, विधानसभेला आपण सर्वांनी प्रामाणिकपणे काम केले. म्हणूनच आपण यशस्वी झालो. रहिमतपूर शहराचा नियोजनबद्ध कारभार करण्यासाठी, प्रगतीसाठी भाजपच्या सर्व उमेदवारांना निवडून द्यावे, असे आवाहन त्यांनी यावेळी केले.

हेदेखील वाचा : Sindhudurg : सिंधुदुर्ग निवडणूक वाद: निलेश राणे, रवींद्र चव्हाण आणि देवेंद्र फडणवीस यांच्यात तणाव?