Rohit Pawar on Chakan MIDC: आवाज उठवणाऱ्या उद्योजकांना धमक्या; रोहित पवारांचा सरकारवर गंभीर आरोप

चाकण एमआयडीसीतील उद्योजकांच्या आणि कामगारांच्या समस्या अत्यंत गंभीर बनल्या असून, या संपूर्ण परिस्थितीची गांभीर्याने दखल घेत ज्येष्ठ नेते शरद पवार हे स्वतः येत्या ४ ते ५ दिवसांत चाकण एमआयडीसी परिसराची प्रत्यक्ष पाहणी करणार असल्याची माहितीही रोहित पवार यांनी दिली.

• आमदार रोहित पवार यांनी शुक्रवारी चाकण एमआयडीसीतील रस्ते, वाहतूक आणि पायाभूत सोयींचा प्रत्यक्ष आढावा घेतला.
• अपुऱ्या सुविधांमुळे चाकणमधील लघु उद्योग बाहेरच्या राज्यात जाण्याच्या तयारीत असल्याचा इशारा त्यांनी दिला.
• दुरवस्थेविरुद्ध बोलणाऱ्या उद्योजकांना शासकीय यंत्रणेकडून धमक्या दिल्या जात असल्याचा सनसनाटी आरोप त्यांनी केला.

Rohit Pawar on Chakan MIDC: चाकण औद्योगिक क्षेत्रातील (एमआयडीसी) रस्त्यांवरील खड्डे, भीषण वाहतूक कोंडी आणि अपुऱ्या पायाभूत सुविधांमुळे त्रस्त झालेल्या उद्योजकांचे आणि कामगारांचे प्रश्न ऐकून घेण्यासाठी राष्ट्रवादी काँग्रेसचे (शरदचंद्र पवार पक्ष) आमदार रोहित पवार यांनी शुक्रवारी चाकण परिसराची प्रत्यक्ष पाहणी केली. या पाहणीदरम्यान त्यांनी एमआयडीसीमध्ये तब्बल २२ गंभीर समस्या असल्याचे सांगत, राज्य सरकारच्या दुर्लक्षामुळे २० हून अधिक लघु उद्योग बंद होण्याच्या किंवा इतर राज्यांत स्थलांतरित होण्याच्या मार्गावर असल्याचा दावा केला.

उद्योजकांवर दबावाचा आरोप

पाहणीनंतर पत्रकारांशी बोलताना रोहित पवार यांनी, चाकणमधील सुविधांच्या दुरवस्थेविरोधात आणि समस्यांवर ज्या उद्योजकांनी आवाज उठवला, त्यांना उद्योगमंत्र्यांच्या कार्यालयातून फोन करून धमक्या दिल्या जात आहेत. ‘तुम्ही का बोलताय? तुमच्या धंद्याला अडचणी निर्माण होतील’ असा दबाव टाकून उद्योजकांचे तोंड बंद करण्याचा प्रयत्न सुरू आहे, असा गंभीर आरोप त्यांनी केला.

Dombivli Politics: महायुतीत पुन्हा धुसफूस? श्रीकांत शिंदेंच्या तिरंगा रॅलीत भाजप पदाधिकारी गैरहजर, मनसेची मात्र दमदार उपस्थिती

पुराव्यांसह चर्चेला या

ज्या कंपन्या बंद होत आहेत किंवा बाहेर जात आहेत, त्या कधी सुरूच झाल्या नव्हत्या, हे मुख्यमंत्र्यांचे विधान हास्यास्पद आहे. उद्योगमंत्र्यांनी इतर राजकीय उद्योग बंद करावेत आणि माझ्यासोबत संयुक्त पत्रकार परिषद घ्यावी. महाराष्ट्रातून किती आणि कोणत्या कंपन्या गुजरात किंवा इतर राज्यात गेल्या, याचे सर्व पुरावे मी आकडेवारीसह सादर करायला तयार आहे, असे आव्हान त्यांनी दिले.

१२ वर्षांत नवीन कंपनी नाही

२०१४ नंतर चाकण परिसरात एकही नवीन मोठी कंपनी आली नसल्याचा दावा करत पवार म्हणाले, “दावोसमध्ये १० बाय १० च्या खोलीत कार्यालय असणाऱ्या कंपन्यांसोबत करार करून हजारो कोटींची गुंतवणूक आणि नोकऱ्यांचे खोटे दावे केले जातात. प्रत्यक्षात किती उद्योग सुरू झाले? याचा हिशेब सरकारने द्यावा, अशी मागणी त्यांनी केली

‘संघाने संविधान स्वीकारावे, देणगीचा हिशोब देशाला द्यावा’; हर्षवर्धन सपकाळांचा RSS-BJP वर हल्लाबोल
शरद पवारही करणार पाहणी

चाकण एमआयडीसीतील उद्योजकांच्या आणि कामगारांच्या समस्या अत्यंत गंभीर बनल्या असून, या संपूर्ण परिस्थितीची गांभीर्याने दखल घेत ज्येष्ठ नेते शरद पवार हे स्वतः येत्या ४ ते ५ दिवसांत चाकण एमआयडीसी परिसराची प्रत्यक्ष पाहणी करणार असल्याची माहितीही रोहित पवार यांनी दिली.