रुपाली चाकणकर यांच्या राजीनाम्याची मागणी (फोटो - सोशल मीडिया)
नाशिक : भोंदूगिरीच्या आड महिलांचे शोषण करणाऱ्या नाशिकच्या स्वयंघोषित ज्योतिष ‘कॅप्टन’ अशोक खरात याच्या अटकेने राज्याच्या राजकीय वर्तुळात मोठी खळबळ उडाली आहे. पोलिसांनी खरातकडून जप्त केलेल्या ५८ आक्षेपार्ह व्हिडिओंमुळे अनेक बड्या राजकीय नेत्यांचे आणि प्रतिष्ठित 5 व्यक्तींचे धाबे दणाणले असून, याप्रकरणावरून आता सत्ताधारी आणि विरोधकांमध्ये जोरदार ‘कलगीतुरा’ रंगला आहे. दरम्यान, याप्रकरणावरून रुपाली चाकणकर यांच्या राजीनाम्याची मागणी केली जात आहे.
पोलिसांनी खरातच्या घरातून आणि डिजिटल उपकरणांतून ५८ अश्लील व्हिडिओ जप्त केले आहेत. यात अनेक प्रभावशाली महिला आणि राजकीय नेत्यांचा समावेश असल्याची चर्चा आहे. अंधश्रद्धा निर्मूलन समितीचे (अंनिस) कृष्णा चांदगुडे यांनी राजकीय दबावाला बळी न पडता सखोल तपास करा, अशी मागणी केली आहे. या व्हिडिओंमधील व्यक्तींची नावे समोर आल्यास राज्यातील अनेक बड्या घराण्यांना धक्का बसू शकतो.
रूपाली चाकणकर वादाच्या भोवऱ्यात
महिला आयोगाच्या अध्यक्षा रूपाली चाकणकर या खरातच्या ‘शिवनिका ट्रस्ट’मध्ये विश्वस्त असल्याने विरोधकांनी त्यांच्यावर टीकेची झोड उठवली आहे. सुषमा अंधारे यांनी विचारले आहे की, महिलांच्या शोषणाचा मुद्दा जुना असताना चाकणकर अनभिज्ञ कशा? जबाबदार पदाचा गैरवापर करून खरातला मदत केली गेली का?
सोशल मीडियावर ‘डिजिटल वॉर’
एक्स आणि फेसबुकवर या प्रकरणावरून दोषारोप होत आहेत. खरातचे राजकीय नेत्यांसोबतचे फोटो व्हायरल केले जात असून, श्रद्धेच्या नावाखाली हा हैदोस कोणाच्या आशीर्वादाने सुरू होता? असा प्रश्न विचारत आहेत. खरातने मर्चेंट नेव्हीतील निवृत्ती आणि अंकशास्त्राचा वापर करून राजकीय नेत्यांमध्ये जागा बनवली होती. आता पोलीस तपासात या ‘भोंदू’ जाळ्याचे धागेदोरे नेमके कुठपर्यंत पोहोचतात, याकडे संपूर्ण महाराष्ट्राचे लक्ष लागले आहे.
हा केवळ गुन्हा नाहीतर…
हा केवळ गुन्हा नसून हाय-प्रोफाईल शोषण रॅकेट आहे. खरातला राजकीय संरक्षण कोणी दिले आणि त्या व्हिडिओंमध्ये अजून कोण आहे? असा सवाल ठाकरे गटाचे खासदार संजय राऊत यांनी उपस्थित केला आहे.
काय आहे नेमकं प्रकरण?
अशोक खरात याचे राजकीय नेत्यांसोबतचे फोटो व्हायरल केले जात आहेत. श्रद्धेच्या नावाखाली हा प्रकार सुरु होता. खरात हा मर्चेंट नेव्हीत नोकरीला होता. मात्र, त्याने निवृत्ती घेतली. अंकशास्त्राचा वापर करून राजकीय नेत्यांमध्ये जागा बनवली होती. आता पोलीस तपासात या ‘भोंदू’ जाळ्याचे धागेदोरे अनेक ठिकाणी पसरले आहेत.
हेदेखील वाचा : Nashik Crime : नाशिकमध्ये संतापजनक घटना ! मुलानेच वडिलांवर चाकूने हल्ला; दीड महिन्यानंतर मृत्यू, आरोपी अटकेत
