ठाकरे गटातून शिंदे सेनेत, आता उपसभापतीपदाचीही लॉटरी; सचिन अहिर बिनविरोध विजयी
सचिन अहिर यांनी मंगळवारी ठाकरे गटाची साथ सोडून उपमुख्यमंत्री एकनाथ शिंदे यांच्या उपस्थितीत शिवसेनेत प्रवेश केला. त्यानंतर त्यांनी विधान परिषदेच्या उपसभापतीपदासाठी उमेदवारी अर्ज दाखल केला होता. अर्ज दाखल करण्याच्या अंतिम मुदतीपर्यंत त्यांच्याविरोधात कोणत्याही सदस्याने उमेदवारी अर्ज दाखल न केल्याने त्यांची बिनविरोध निवड निश्चित झाली.
विधान परिषदेच्या उपसभापतीपदाची जागा काही काळापासून रिक्त होती. पावसाळी अधिवेशनादरम्यान हे पद भरण्याचा निर्णय घेण्यात आला होता. सत्ताधारी महायुतीकडे आवश्यक संख्याबळ असल्याने सचिन अहिर यांच्या निवडीचा मार्ग जवळपास मोकळा असल्याचे आधीपासूनच स्पष्ट झाले होते.
सचिन अहिर हे मुंबईतील अनुभवी राजकारणी म्हणून ओळखले जातात. त्यांनी यापूर्वी काँग्रेस, राष्ट्रवादी काँग्रेस आणि ठाकरे गटाच्या शिवसेनेत काम केले असून आता ते शिंदे यांच्या शिवसेनेत दाखल झाले आहेत. त्यांच्या या पक्षांतरानंतर लगेचच मिळालेल्या उपसभापतीपदामुळे राज्याच्या राजकीय वर्तुळात विविध चर्चांना उधाण आले आहे. उपसभापती म्हणून सचिन अहिर यांच्यावर विधान परिषदेचे कामकाज सुरळीत आणि प्रभावीपणे चालविण्याची जबाबदारी असणार आहे. त्यांच्या बिनविरोध निवडीमुळे महायुतीला विधान परिषदेत आणखी एक महत्त्वाचे घटनात्मक पद मिळाले असून सत्ताधारी आघाडीचे संख्याबळ आणि राजकीय वर्चस्व अधोरेखित झाले आहे.
२१ मार्च १९७२ रोजी जन्मलेले सचिन अहिर हे मुंबईतील दहीहंडी महोत्सवासाठी ओळखले जातात. ते आपल्या पत्नीसोबत ‘श्री संकल्प प्रतिष्ठान’ चालवतात, जी संपूर्ण वरळीतील एक लोकप्रिय संस्था आहे. सचिन अहिर सध्या महाराष्ट्र विधान परिषदेचे सदस्य आहेत. त्यांनी यापूर्वी तीन विधानसभा निवडणुका जिंकल्या आहेत. ते १९९९ मध्ये पहिल्यांदा आमदार झाले. २००९ मध्ये ते महाराष्ट्राचे गृहनिर्माण मंत्री झाले. उद्धव ठाकरे यांनी २०२० मध्ये सचिन अहिर यांची शिवसेनेचे उपनेते म्हणून नियुक्ती केली. सचिन अहिर यांनी आपल्या राजकीय कारकिर्दीची सुरुवात शरद पवार यांच्या राष्ट्रवादी काँग्रेसमधून केली आणि नंतर ते शिवसेनेत सामील झाले. वरळी मतदारसंघात आदित्य ठाकरे यांच्या विजयात सचिन अहिर यांची भूमिका असल्याचे मानले जाते. गेल्या निवडणुकीत, शिवसेनेने आदित्य यांना पराभूत करण्यासाठी मिलिंद देवरा यांना उमेदवारी दिली होती, परंतु मनसेनेने संदीप देशपांडे यांना उमेदवारी देऊनही ठाकरे विजयी झाले.
.png "Videos"){kind=small}
