Sanjay Raut
अभिनेता टायगर श्रॉफ याच्या कारवर झालेल्या गोळीबाराच्या घटनेमुळे आता पुन्हा एकदा कायदा व सुव्यवस्थेचा प्रश्न निर्माण झाला आहे. मुंबईसारख्या शहरांत बॉलिवूड स्टार्सवर असे हल्ले होत असतील तर सामान्य नागरिकांच्या सुरक्षेबाबत काय असा प्रश्न उपस्थित केला जात आहे. अश्यातच आता शिवसेना ठाकरे गटाचे खासदार संजय राऊत यांनी यावरूनच राज्य सरकारला घेरलं आहे. मुख्यमंत्री देवेंद्र फडणवीस यांना लक्ष्य करत राऊतांनी राज्यात राष्ट्रपती राजवट लागू करण्याची मागणी केली आहे.
संजय राऊत यांनी सोशल मीडिया पोस्टमधून राज्यातील कायदा आणि सुव्यवस्थेवर प्रश्न उपस्थित केले. ठाण्यात पूर्णेकर यांची हत्या आणि मुंबईत टायगर श्रॉफच्या कारवर गोळीबार झाल्याचा उल्लेख करत त्यांनी सरकारच्या कारभारावर टीका केली.
राज्यात गुन्हेगारीच्या घटनांवर नियंत्रण ठेवण्याची जबाबदारी सरकारची आहे, असं म्हणत राऊत यांनी फडणवीस यांच्या गृहखात्यावर निशाणा साधला. राऊतांच्या मते, या घटनांमुळे राज्यातील सुरक्षेचा प्रश्न गंभीर बनला आहे. राज्यात राष्ट्रपती राजवट लागू करण्याची मागणी त्यांनी केली आहे.
रविवारी, 18 ऑक्टोबर रोजी संध्याकाळी मुंबईतील जुहू परिसरात टायगर श्रॉफच्या कारवर अज्ञात हल्लेखोरांनी गोळीबार केला. फुटबॉल खेळून परतत असताना ही घटना घडली. टायगर श्रॉफ मोठ्या दुखापतीतून बचावला; मात्र त्याचा चालक आणि जवळ असलेला एक व्यक्ती जखमी झाल्याची माहिती समोर आली.
या घटनेनंतर मुंबई पोलिसांनी तपासासाठी पथकं तैनात केली. यातील आरोपी लॉरेन्स बिश्नोई टोळीशी संबंधित असल्याचा दावा सोशल मीडियावर करण्यात आला आहे. पोलिसांच्या पथकांनी शोध घेतला असता आरोपींना राजस्थानमधील कोटा येथून ताब्यात घेण्यात आले आहे.
दुसरीकडे, प्रदीप पूर्णेकर यांच्या कुटुंबीयांनीही आपल्या वेदना व्यक्त केल्या आहेत. राम पूर्णेकर यांनी एकनाथ शिंदे यांच्यावर टीका केली आहे. एकनाथ शिंदेनी टायगर श्रॉफ यांची भेट घेतली मात्र त्यांच्या घराच्या अवघ्या 20 मिनिटे दूर असलेल्या पूर्णेकर कुटुंबियांना भेट दिली नसल्याची तक्रार केली आहे. तसेच, लवकरच प्रदीप पूर्णेकर यांना न्याय मिळावा यासाठी एकनाथ शिंदेंच्या घराबाहेर उपोषण करणार असल्याचे राम पूर्णेकर यांनी सांगितलं आहे.
या दोन्ही घटनांमुळे राज्यातील सुरक्षेचा प्रश्न राजकीय चर्चेच्या केंद्रस्थानी आला आहे. पोलीस याबाबत तपास करत असून आता तपासातून काय निष्पन्न होतं तसंच या प्रकरणांत दोषींवर कोणती कारवाई होते, याकडे सर्वांचं लक्ष लागलं आहे.
.png "Videos"){kind=small}
