Sanjay Raut : सहा महिन्यांत मोदी सरकार कोसळणार? संजय राऊतांचा मोठा दावा; मोदींच्या जागी कोण येणार, राऊतांनी दिले संकेत

Sanjay Raut : मोदी सरकार सहा महिन्यांत कोसळणार आणि पंतप्रधान मोदींच्या जागी नवे नेतृत्व येणार, असा मोठा दावा संजय राऊत यांनी केला आहे. यासोबतच महाराष्ट्रातील दुष्काळ, शेतकरी मदत आणि सत्ताधाऱ्यांच्या खर्चावरून त्यांनी राज्य सरकारला धारेवर धरले.

• सहा महिन्यांत मोदी सरकार कोसळणार?
• संजय राऊतांच्या दाव्याने राजकीय चर्चांना उधाण
• दुष्काळावरून फडणवीस सरकारला घेरलं

 

Sanjay Raut : देशातील राजकीय वातावरण सध्या चांगलंच तापलं आहे. मुख्य निवडणूक आयुक्त ज्ञानेश कुमार यांच्या विरोधात इंडिया आघाडीकडून आंदोलनाची तयारी सुरू असतानाच, ठाकरे गटाचे खासदार संजय राऊत यांनी केंद्रातील मोदी सरकारबाबत मोठा दावा केला आहे. पुढील सहा महिन्यांत मोदी सरकार कोसळेल आणि पंतप्रधान नरेंद्र मोदी यांच्या जागी नवं नेतृत्व येईल, असा दावा विरोधी पक्षातील नेत्यांकडून केला जात असल्याची चर्चा आहे. आता संजय राऊत यांनीही या दाव्याला दुजोरा देत आपली भूमिका मांडली आहे.

राऊतांच्या वक्तव्याने राजकीय वर्तुळात खळबळ उडाली आहे. देशभरातून विरोधी पक्ष तसेच इतर विद्यार्थी संघटना यांच्याकडून केंद्रीय सरकारवर तीव्र आक्षेप घेतला जात आहे. आधीच राजकीय वातावरण तापलेले असताना राऊतांच्या या वक्तव्याने पुन्हा एकदा खलबल उडाली आहे.

मोदींच्या जागी कोण? संजय राऊत म्हणाले…

मोदींच्या जागी कोणता नेता पंतप्रधान होणार, याबाबत संजय राऊत यांना विचारण्यात आलं. त्यावर त्यांनी नाव सांगू शकतो, मात्र सध्या सांगणार नाही, असं सूचक विधान केलं. ‘रेझिम चेंज म्हणजे रेझिम चेंज’, असं म्हणत त्यांनी केंद्रातील नेतृत्वबदलाच्या चर्चेला आणखी हवा दिली.

राज्य मंत्रिमंडळात लवकरच फेरबदल होणार? अनेक मंत्र्यांना डच्चू मिळण्याची शक्यता; तर तरुण आमदारांना…

दुष्काळावरून फडणवीस सरकारला घेरलं

दुसरीकडे, महाराष्ट्रातील दुष्काळी परिस्थितीवरूनही संजय राऊत यांनी राज्य सरकारवर जोरदार टीका केली. ‘आम्ही 1972 चा दुष्काळ पाहिला आहे. तेव्हा इंदिरा गांधी पंतप्रधान होत्या. आजची परिस्थिती त्यापेक्षाही गंभीर आहे,’ असं ते म्हणाले. कोकणात यापूर्वी कधी दुष्काळ जाहीर झाला नव्हता, असं सांगत त्यांनी परिस्थितीच्या गांभीर्याकडे लक्ष वेधलं.

दुष्काळाचा सामना करण्यासाठी राज्याला सुमारे 50 हजार कोटी रुपयांची गरज असल्याचा दावा राऊत यांनी केला. मात्र, शेतकऱ्यांच्या हातावर केवळ पाच हजार रुपये ठेवले जात असल्याची टीका त्यांनी केली.

सत्ताधाऱ्यांच्या पैशांवरही सवाल

निवडणुकांमध्ये मोठ्या प्रमाणावर पैसा खर्च केला जात असल्याचा आरोप करत राऊत यांनी भाजप, शिंदे गट आणि सुनेत्रा पवार यांच्या राष्ट्रवादीचा उल्लेख केला. सोमेश्वर सहकारी साखर कारखान्याच्या निवडणुकीत 25 ते 30 कोटी रुपये खर्च झाल्याचा दावाही राऊतांनी यावेळी केला. शिक्षक आणि पदवीधर मतदारसंघांच्या निवडणुकांमध्ये भेटवस्तू आणि पैशांचं वाटप होत असल्याचा आरोपही त्यांनी केला.

सत्ताधाऱ्यांकडे एवढा पैसा येतो कुठून, याचा खुलासा मुख्यमंत्र्यांनी करावा, अशी मागणी राऊत यांनी केली. ठेकेदारांच्या माध्यमातून राज्याची लूट झाल्याचा आरोप करत त्यांनी सरकारला लक्ष्य केलं.

एकीकडे केंद्रातील नेतृत्वबदलाची चर्चा, तर दुसरीकडे दुष्काळावरून राज्य सरकारवर हल्लाबोल, अशा दुहेरी मुद्द्यांमुळे संजय राऊत यांच्या विधानांची राजकीय वर्तुळात चर्चा सुरू झाली आहे.

तुकाराम मुंढेंच्या FDA कारवाईवर मंत्र्यांची मोठी घोषणा; दोषी अधिकाऱ्यांवर कारवाई होणार? मुख्यमंत्री घेणार निर्णय