शिंदे-महाडिक यांना मिळाला भाजपचा पहिला सभापती व उपसभापती होण्याचा मान
मेढा : नुकत्याच झालेल्या जिल्हा परिषद, पंचायत समिती निवडणुकीत कुडाळ गणातून जावली पंचायत समितीला निवडून आलेले प्रतापगड सहकारी साखर कारखान्याचे अध्यक्ष सौरभ शिंदे यांनी सभापतिपदाचा तर खर्शी बारामुरे गणातून विजयी झालेले गोरख महाडिक यांनी उपसभापतिपदाचा पदभार स्वीकारला. जिल्हा परिषद सदस्य वसंतराव मानकुमरे यांनी त्यांना सभापती पदाच्या खुर्चीवर आसनस्थ केले. यावेळी नूतन सभापती व उपसभापतींना भारताचे माजी पंतप्रधान अटल बिहारी वाजपेयी यांची प्रतिमा भेट देण्यात आली.
यावेळी जिल्हा बँकेचे संचालक ज्ञानदेव रांजणे, बाजार समितीचे सभापती जयदीप शिंदे व भाजपचे तालुकाध्यक्ष संदीप परामणे, मारुती चिकणे, सौरभ बाबा शिंदे यांच्या पत्नी अंकिता शिंदे, समीर आतार, मालोजी शिंदे, नाना पवार, पंचायत समितीतील विविध विभागांचे अधिकारी कर्मचारी आदी मान्यवर उपस्थित होते.
यावेळी बोलताना वसंतराव मानकुमरे म्हणाले, जावली तालुक्याला मोठी राजकीय परंपरा आहे. नूतन सभापती सौरभ शिंदे यांच्या घराण्याला राजकीय वारसा असून त्यांनी यापूर्वी जावली तालुक्याचे उपसभापती म्हणून काम केले आहे. त्याचा फायदा सभापतीपदाच्या कारकिर्दीत त्यांना होईल. तसेच मिळालेल्या संधीचं त्यांनी सोनं करावं व आपल्या घराण्याला लाभलेला माजी आमदार लालसिंगराव शिंदे, राजेंद्र शिंदे भैय्यासाहेब, सुनेत्रा शिंदे यांचा वारसा उज्वल करावा.
नूतन सभापती सौरभ बाबा शिंदे म्हणाले, आपणा सर्वांचे मार्गदर्शक आणि आधारस्तंभ शिवेंद्रसिंहराजे, जावळीचे नेते वसंतराव मानकुमरे, जिल्हा बँकेचे संचालक ज्ञानदेव रांजणे यांच्या मार्गदर्शनाखाली मला सभापती होण्याचा बहुमान लाभला आहे. माझे आजोबा माजी आमदार लालसिंगराव शिंदे माझे वडील भैय्यासाहेब यांच्या राजकीय विचारांचा वारसा जोपासण्याची आणि जावळीच्या जनतेची सेवा करण्याची संधी मला शिवेंद्रसिंहराजे यांनी दिली. त्या संधीचे मी निश्चित सोने करून दाखवीन. सर्वांना विचारात घेऊन जावलीचा विकास होण्यासाठी प्रयत्नशील राहणार आहे.
.png "Videos"){kind=small}
