फडणवीस, राज ठाकरे आणि उद्धव ठाकरे एकाच मंचावर; बाळासाहेबांच्या व्यंगचित्रांचा भन्नाट किस्सा सांगत उद्धव ठाकरे काय म्हणाले?

राजकारणात एकमेकांवर टीका करणारे मुख्यमंत्री देवेंद्र फडणवीस, मनसेप्रमुख राज ठाकरे आणि उद्धव ठाकरे एका पुस्तक प्रकाशन सोहळ्यात एकाच मंचावर आले. यावेळी उद्धव ठाकरेंनी बाळासाहेब ठाकरे यांच्या व्यंगचित्रकलेचे किस्से सांगत जुन्या आठवणींना उजाळा दिला.

• फडणवीस, राज ठाकरे आणि उद्धव ठाकरे एकाच मंचावर
• पुस्तक प्रकाशन सोहळ्यात तिन्ही नेत्यांची उपस्थिती
• उद्धव ठाकरेंनी सांगितला बाळासाहेबांचा भन्नाट किस्सा

 

मुंबई : महाराष्ट्राच्या राजकीय पटलावर गुरुवारी एक अत्यंत दुर्मिळ क्षण पहायला मिळाले. ज्येष्ठ व्यंगचित्रकार प्रशांत कुलकर्णी संपादित ‘महाराष्ट्राच्या हास्यरेषा’ या मराठी व्यंगचित्रकलेचा 100 वर्षांचा प्रवास उलगडणाऱ्या पुस्तकाच्या प्रकाशन सोहळ्याच्या निमित्ताने मुख्यमंत्री देवेंद्र फडणवीस, उद्धव ठाकरे आणि मनसे अध्यक्ष राज ठाकरे हे तिन्ही दिग्गज नेते एकाच व्यासपीठावर एकत्र आले होते. ग्रंथाली प्रकाशनाच्या वतीने आयोजित हा प्रकाशन सोहळा दादर येथील स्वातंत्र्यवीर सावरकर स्मारक सभागृहात पार पडला. यावेळी उद्धव ठाकरे यांनी व्यंगचित्राबद्दलचे अनेक किस्से सांगितले.

उद्धव ठाकरे यांनी सांगितले की, शिवसेनेच्या ‘सामना’ची नुकतीच सुरुवात झाली होती, त्या काळात कर्नाटकचे तत्कालीन मुख्यमंत्री रामकृष्ण हेगडे यांच्याशी संबंधित एक व्यंगचित्र काढायचे होते. त्यावेळी मराठी माणसांवर होणाऱ्या अत्याचारांचा मुद्दा उपस्थित करण्यात आला होता.

मात्र, या चित्रात हेगडे यांचा पडलेला चेहरा योग्य कोनातून दाखवायचा होता. त्यासाठी आवश्यक असलेला फोटोच मिळत नव्हता. कर्मचाऱ्यांसमोर अडचण उभी राहिल्यानंतर बाळासाहेबांनी स्वतः पेन्सिल हातात घेतली आणि काही सेकंदांत तो चेहरा रेखाटून दिला. उद्धव ठाकरेंनी हा किस्सा सांगत बाळासाहेबांच्या व्यंगचित्रकलेवर असलेली जबरदस्त पकड अधोरेखित केली.

Raj Thackeray : 2029 पर्यंत त्यांना मुख्यमंत्री ठेवा म्हणजे झालं, राज ठाकरेंचा खोचक टोला

व्यंगचित्रातून राजकीय टोलेबाजी

व्यंगचित्र काढताना त्याचा नेमका अर्थ संबंधित व्यक्तीपर्यंत पोहोचला पाहिजे, असं सांगत उद्धव ठाकरेंनी बाळासाहेबांच्या शैलीचं महत्त्व स्पष्ट केलं. केवळ स्वतःपुरतं चित्र काढण्यापेक्षा त्यातून लोकांपर्यंत विचार पोहोचणं महत्त्वाचं असल्याचं त्यांनी नमूद केलं.

वसंतराव नाईक आणि ‘मेघदूत’ची आठवण

यावेळी उद्धव ठाकरेंनी तत्कालीन मुख्यमंत्री वसंतराव नाईक यांच्या काळातील आणखी एक आठवण सांगितली. मंत्र्यांची वेगवेगळी व्यक्तिमत्त्वं आणि त्यांच्याकडे असलेल्या खात्यांवर भाष्य करणारी व्यंगचित्रं बाळासाहेबांनी काढली होती. त्यापैकी ‘मेघदूत’ या व्यंगचित्राचाही त्यांनी उल्लेख केला.

अशा व्यंगचित्रांतून राजकीय व्यवस्थेवर मार्मिक भाष्य करता येतं, हा मुद्दा मांडताना उद्धव ठाकरेंनी पुढच्या शंभर वर्षांच्या इतिहासाची सुरुवात आजपासून करण्याचं आवाहन केलं.

या कार्यक्रमात तिन्ही नेत्यांची उपस्थिती आणि उद्धव ठाकरेंनी सांगितलेले बाळासाहेबांचे किस्से यामुळे जुन्या राजकीय आठवणींना उजाळा मिळाला.

Amit Satam : ‘लोकशाही बचाव, अराजकता हटाव’; अमित साटमांची मोठी घोषणा, राहुल गांधींविरोधात मुंबई भाजप रस्त्यावर उतरणार!