Sai Dongar Deforestation : राज ठाकरेंना चक्क जैन मुनी निलेशचंद्र यांचा पाठिंबा! वृक्षतोडीवरून घेतली ठाम भूमिका

Sai Dongar Deforestation : कर्जत-भीमाशंकर येथील साय डोंगरातील वृक्षतोडीवरून राज्यात चर्चा रंगली आहे. स्थानिकांच्या आंदोलनाला पर्यावरणप्रेमींसह राजकीय नेत्यांचाही पाठिंबा मिळत असताना जैन मुनी निलेशचंद्र यांनी राज ठाकरेंच्या भूमिकेला समर्थन दिले आहे.

• साय डोंगरातील वृक्षतोडीविरोधात वातावरण तापलं
• जैन मुनी निलेशचंद्र राज ठाकरेंच्या आंदोलनात सहभागी होणार?
• टोरंट प्रकल्पावरून स्थानिक, पर्यावरणप्रेमी एकजूट

 

कर्जत : कर्जत-भीमाशंकर परिसरातील साय डोंगरात सुरू असलेल्या वृक्षतोडीचा मुद्दा आता अधिक चर्चेत आला आहे. स्थानिक नागरिक आणि पर्यावरणप्रेमींकडून या कामाला विरोध होत असतानाच, याविषयावरून राजकीय नेत्यांनीदेखील सरकारला घेरलं असल्याचं दिसत आहे. मनसे प्रमुख राज ठाकरे यांनीही सरकारला खडेबोल सुनावत आंदोलन करण्याची तयारी दर्शवली आहे. यावरूनच आता जैन मुनी निलेशचंद्र यांनीदेखील प्रतिक्रिया दिली आहे.  (Sai Dongar Deforestation)

जैन मुनी निलेशचंद्र यांनी मनसेप्रमुख राज ठाकरे यांच्या पर्यावरणविषयक भूमिकेला पाठिंबा दिला आहे. राज ठाकरे यांनी बोलावल्यास आपण स्वतः आंदोलनात सहभागी होण्यास तयार असल्याचेही त्यांनी स्पष्ट केले.

‘झाडं आणि जीव वाचवण्यासाठी पुढे येणाऱ्यांना पाठिंबा’

साय डोंगरातील वृक्षतोडीवरून सोशल मीडियावरही विविध प्रतिक्रिया उमटत आहेत. याच पार्श्वभूमीवर निलेशचंद्र मुनी यांनी भगवान महावीरांच्या ‘जिओ और जीने दो’ या विचाराचा उल्लेख केला. झाडे आणि प्राण्यांचे संरक्षण करण्यासाठी राज ठाकरे आवाज उठवत असतील, तर त्यांच्या भूमिकेला आपला पाठिंबा असल्याचे त्यांनी सांगितले.

Karjat torrent Power Project : ओमराजे निंबाळकरांचा सरकारला घरचा आहेर, वृक्षतोडीवरून राजकारण पेटलं…

कबुतरांचा मुद्दा आणि जंगल वाचवण्याचा प्रश्न वेगळा असल्याचे सांगत, पर्यावरणाच्या संरक्षणासाठी सुरू असलेल्या प्रयत्नांना पाठिंबा देण्याची भूमिका त्यांनी मांडली. कोणत्याही राजकीय पक्षाशी आपला संबंध नसल्याचे सांगून, झाडे आणि जीव वाचवणाऱ्यांच्या पाठीशी समाज उभा राहील, असेही ते म्हणाले.

राज ठाकरेंच्या आंदोलनात सहभागी होणार?

राज ठाकरे यांनी निमंत्रण दिल्यास कर्जतला जाऊन आंदोलनात सहभागी होण्याची तयारी असल्याचे निलेशचंद्र मुनी यांनी म्हटले आहे. कंपनी कोणतीही असली, तरी पर्यावरणाच्या मुद्द्यावर तिचे समर्थन करणार नसल्याची भूमिका त्यांनी मांडली.
दरम्यान, आमदार आदित्य ठाकरे यांनीही साय डोंगराला भेट दिली आहे. राज ठाकरे या भागाला भेट देणार असल्याच्या पार्श्वभूमीवर या प्रकरणाकडे राजकीय आणि पर्यावरणीय दृष्टिकोनातून लक्ष वेधले जात आहे.

टोरंट प्रकल्पावरून स्थानिकांचा विरोध

साय डोंगरातील वृक्षतोड आणि टोरंट प्रकल्पासंदर्भातील निर्णयांवर स्थानिकांनी आक्षेप घेतला आहे. प्रकल्पाच्या जनसुनावणीत स्थानिकांचा मोठ्या प्रमाणात विरोध असताना पुढील प्रक्रिया कशी राबवली जात आहे, असा सवाल स्थानिकांनी उपस्थित केला.

या मुद्द्यावर स्थानिक नागरिक, पर्यावरणप्रेमी आणि काही राजकीय नेत्यांकडून विरोध नोंदवला जात आहे. आता वृक्षतोडीबाबत प्रशासनाची भूमिका काय राहते आणि आंदोलनाला पुढे कोणाचा पाठिंबा मिळतो, याकडे सर्वांचे लक्ष लागले आहे.

Aaditya Thackeray : ‘मरण आलं तरी चालेल, पण लढा थांबणार नाही!’ साय डोंगरातील वृक्षतोडीवरून आदित्य ठाकरेंचा फडणवीसांना थेट इशारा