मोठी बातमी ! शिंदे गटाच्या नेत्याकडून विमानतळावर फायरिंग; दोन सुरक्षा कर्मचारी जखमी

वाराणसी विमानतळावर शस्त्र तपासणीदरम्यान माजी नगरसेवक कमलेश राय यांच्या पिस्तुलातून दोन राउंड फायरिंग झाल्याची माहिती आहे. गोळी रिकोशेट होऊन दोन सुरक्षा कर्मचाऱ्यांना दुखापत झाली असून पोलिसांनी राय यांना ताब्यात घेतले आहे.

• वाराणसी विमानतळावर शस्त्र तपासणीदरम्यान दोन राउंड फायरिंग झाल्याची माहिती.
• गोळी रिकोशेट होऊन दोन सुरक्षा तपासणी कर्मचारी जखमी झाले.
• माजी नगरसेवक कमलेश राय यांना पोलिसांनी ताब्यात घेत चौकशी सुरू केली.

 

वाराणसी विमानतळावर रविवारी सकाळी शस्त्र तपासणीदरम्यान गोळीबाराची घटना घडल्याने खळबळ उडाली. शिवसेना शिंदे गटाचे माजी नगरसेवक कमलेश राय हे पत्नीसमवेत वाराणसीहून मुंबईला जाण्यासाठी विमानतळावर पोहोचले होते. यावेळी त्यांच्या परवानाधारक पिस्तुलाच्या तपासणीदरम्यान अचानक दोन राउंड फायरिंग झाल्याची माहिती समोर आली आहे.

मिळालेल्या माहितीनुसार, राय यांच्याकडे 7.62 मिमी पिस्तुल होते. शस्त्र लॉक करण्याची प्रक्रिया सुरू असताना बंदुकीतून गोळ्या सुटल्याचे सांगण्यात येत आहे. या घटनेनंतर विमानतळ परिसरात काही काळ प्रवाशांमध्ये भीतीचे वातावरण निर्माण झाले.

बंदूक लॉक करताना दोन राउंड फायरिंग; दोन सुरक्षा कर्मचारी जखमी

गोळी रिकोशेट होऊन विमानतळावरील सुरक्षा तपासणी करणाऱ्या दोन कर्मचाऱ्यांना दुखापत झाल्याची माहिती आहे. रोहित राज आणि सुमन कुमारी अशी जखमी कर्मचाऱ्यांची नावे सांगण्यात येत आहेत. दोघांनाही तातडीने न्यू लक्ष्मी ट्रॉमा सेंटरमध्ये उपचारासाठी दाखल करण्यात आले.

मनोज जरांगे पाटील यांचा 29 ऑगस्टच्या आंदोलनाचा निर्धार; ‘जीव गेला तरी चालेल, आंदोलनावर ठाम’

दरम्यान, कमलेश राय हे एअर इंडिया एक्स्प्रेसच्या IX 1810 विमानाने मुंबईला जाणार होते. शस्त्र तपासणीदरम्यान ही घटना सकाळी साडेनऊच्या सुमारास घडल्याची माहिती आहे. त्यांच्या पिस्तुलासोबत 21 जिवंत काडतुसे असल्याचेही समोर आले आहे.

कमलेश राय पोलिसांच्या ताब्यात; चौकशी सुरू

घटनेची माहिती मिळताच विमानतळ सुरक्षा यंत्रणा आणि स्थानिक पोलिसांनी तातडीने कारवाई केली. कमलेश राय यांना ताब्यात घेऊन त्यांची चौकशी सुरू करण्यात आली आहे. या प्रकरणाची BCAS अर्थात ब्युरो ऑफ सिव्हिल एव्हिएशन सिक्युरिटीच्या माध्यमातूनही चौकशी केली जात असल्याची माहिती आहे.

शस्त्र हाताळताना निर्धारित सुरक्षा नियमांचे पालन झाले होते का, तसेच फायरिंग नेमक्या कोणत्या परिस्थितीत झाले, याचा तपास केला जात आहे. चौकशी पूर्ण झाल्यानंतर संबंधित नियमांनुसार पुढील कारवाई केली जाणार असल्याचे सांगण्यात येत आहे.

‘तुम्ही दोन हात केले तर आम्हीही चार हात करू’; भाजपचा शशिकांत शिंदेंवर हल्लाबोल

या घटनेनंतर विमानतळावरील सुरक्षा व्यवस्थेबाबतही प्रश्न उपस्थित झाले आहेत. मात्र, परिस्थिती नियंत्रणात असून विमानतळाचे नियमित कामकाज सुरू असल्याची माहिती आहे.