22 वर्ष जुन्या वादाचा शेवट! ‘हा’ भारतीय क्रिकेटपटूला न्यायालयाने ठरवले निर्दोष

Jacob Martin: भारतासाठी १० एकदिवसीय सामन्यांमध्ये २२.५७ च्या सरासरीने १५८ धावा करणाऱ्या जेकब मार्टिन यांची २२ वर्षांनंतर एका फौजदारी खटल्यातून निर्दोष मुक्तता झाली आहे.

• जेकब मार्टिनने १९९९ मध्ये वेस्ट इंडिजविरुद्ध आंतरराष्ट्रीय क्रिकेटमध्ये पदार्पण केले होते

• केनियाविरुद्धचा २००१ मधील सामना त्यांच्या कारकिर्दीतील शेवटचा ठरला

• २२ वर्षानंतर खटल्यातून निर्दोष मुक्तता 

Jacob Martin: १९९९ ते २००१ दरम्यान भारतासाठी १० एकदिवसीय सामने खेळलेले माजी क्रिकेटपटू जेकब मार्टिन यांची २२ वर्षांनंतर एका फौजदारी खटल्यातून निर्दोष मुक्तता झाली आहे. वडोदरा येथील ५४ वर्षीय फलंदाजाची पटियाला हाऊस न्यायालयाने सर्व आरोपांमधून निर्दोष मुक्तता केली. हा खटला २००४ मध्ये दाखल झालेल्या एफआयआरमधून उद्भवला होता.

Vaibhav Sooryavanshi: वैभव सूर्यवंशीला क्रिकेटर व्हायचंय की एंटरटेनर? अर्जुन रणतुंगाने दाखवला आरसा

फसवणूक आणि घोटाळ्याचा प्रकार

युके इमिग्रेशन स्टॅम्प, प्रवासाची व्यवस्था आणि आर्थिक व्यवहारांमध्ये फेरफार करण्याशी संबंधित जेकब यांच्यावरील आरोप सिद्ध होऊ शकले नाहीत. या माजी उजव्या हाताच्या फलंदाजावर भारतीय दंड संहितेच्या कलम ४२०, ४६८, ४७१ आणि १२०बी, तसेच पासपोर्ट कायद्याच्या कलम १२ अंतर्गत आरोप ठेवण्यात आले होते. आर्थिक व्यवहार किंवा अजवा स्पोर्ट्स क्लबवरील त्यांची मालकी किंवा नियंत्रणाबाबत कोणताही ठोस पुरावा नसल्याचे न्यायालयाला आढळले. अनेक साक्षीदारही या आरोपांना दुजोरा देऊ शकले नाहीत.

जेकबने दिले स्पष्टीकरण 

२२ वर्षांनंतर बंद झालेल्या खटल्याबद्दल माध्यमांशी बोलताना, जेकब मार्टिन यांनी एक प्रसिद्ध आंतरराष्ट्रीय क्रिकेटपटू असल्यामुळे त्यांना कसे परिणाम भोगावे लागले हे स्पष्ट केले की, ‘२००४ मध्ये मी ज्या संघाचा भाग होतो, त्या संघाने यूकेचा दौरा केला होता. सर्वजण परतले, पण एक खेळाडू मागे राहिला. त्याचा व्हिसा सहा महिन्यांसाठी वैध होता, त्यामुळे तो तेवढा काळ राहू शकला असता. तथापि, तो व्हिसाची मुदत संपल्यानंतरही जास्त काळ राहिला आणि बनावट इमिग्रेशन शिक्क्यासह भारतात परतला. त्याला दिल्लीतील इंदिरा गांधी आंतरराष्ट्रीय विमानतळावर ताब्यात घेण्यात आले.

त्यानंतरच्या चौकशीदरम्यान, सुरुवातीच्या एफआयआरमध्ये माझ्या नावाचा उल्लेखही नव्हता, परंतु तपासात मला गोवण्यात आले, कदाचित मी एक प्रसिद्ध आंतरराष्ट्रीय क्रिकेटपटू असल्यामुळे. खटला बंद झाल्यानंतर आणि मधल्या २२ वर्षांपर्यंत, मला बीसीसीआयमध्ये नोकरी मिळू शकली नाही आणि रेल्वेमधील माझी नोकरीही गेली, ज्यामुळे मला प्रचंड तणाव आला. अलीकडेच, मला त्या प्रकरणात निर्दोषत्व मिळाले आहे. यामुळे माझ्या आयुष्याला एक मोठे वळण मिळाले आहे. २२ वर्षांनंतर आलेला हा निकाल माझ्यासाठी एक मोठा टर्निंग पॉइंट आहे.’

IND vs SL 2nd Test: कुलदीपचं नशीब आलं आडवं, दुसऱ्या कसोटीतून बाद; सारांश जैन करणार पदार्पण

भारतासाठी १० एकदिवसीय सामने खेळला

१३८ प्रथम-श्रेणी आणि १०१ लिस्ट ए सामन्यांमध्ये १२,००० हून अधिक धावा करणाऱ्या जेकब मार्टिनने १९९९ मध्ये वेस्ट इंडिजविरुद्ध आंतरराष्ट्रीय क्रिकेटमध्ये पदार्पण केले. केनियाविरुद्धचा २००१ चा सामना त्याच्या कारकिर्दीतील शेवटचा ठरला. त्याने भारतासाठी १० एकदिवसीय सामन्यांच्या आठ डावांमध्ये १५८ धावा केल्या, ज्यात ३९ ही त्याची सर्वोत्तम धावसंख्या आहे.