BCCI अध्यक्षांना पगार किती मिळतो? जाणून घ्या त्यांच्या कमाईचा फंडा!

बीसीसीआयच्या अध्यक्षाला पगार किती मिळतो? रॉजर बिन्नी यांनी अध्यक्षपदाचा राजीनामा दिल्यानंतर हा प्रश्न पुन्हा चर्चेत आला आहे. जाणून घ्या त्यांची कमाई कशी होते आणि कोणत्या सुविधा मिळतात.

BCCI Presedent Salary: बीसीसीआय (भारतीय क्रिकेट नियामक मंडळ) अनेकदा विविध कारणांमुळे चर्चेत असते. सध्या अध्यक्षपदातील बदलामुळे ते पुन्हा एकदा चर्चेत आले आहे. माजी अष्टपैलू रॉजर बिन्नी यांनी त्यांचा कार्यकाळ संपल्यानंतर बीसीसीआय (BCCI) अध्यक्षपदाचा राजीनामा दिला आहे. नवीन अध्यक्षाची नियुक्ती होईपर्यंत, म्हणजेच सप्टेंबर २०२५ मध्ये होणाऱ्या निवडणुकांपर्यंत, उपाध्यक्ष राजीव शुक्ला (Rajeev Shukla) तात्पुरते पदभार सांभाळतील.

बीसीसीआय अध्यक्षांना किती मिळतो पगार!

जगातील सर्वात श्रीमंत आणि प्रभावशाली क्रिकेट बोर्ड असलेल्या बीसीसीआयचे अध्यक्षपद भूषवणे ही एक मोठी जबाबदारी आहे. पण या भूमिकेसाठी अध्यक्षांना किती पगार मिळतो, हा प्रश्न अनेक क्रिकेट चाहत्यांच्या मनात येतो. तुम्हाला हे जाणून आश्चर्य वाटेल की, बीसीसीआय अध्यक्षांना मासिक वेतन मिळत नाही. तरीही, ते चांगले पैसे कमावतात.

बीसीसीआयच्या घटनेनुसार, अध्यक्ष, उपाध्यक्ष, सचिव, सहसचिव आणि कोषाध्यक्ष ही सर्व पदे मानद आहेत. याचा सरळ अर्थ असा आहे की, त्यांना बीसीसीआयकडून कोणताही निश्चित पगार मिळत नाही. मात्र, बोर्ड त्यांना विविध बैठका, कार्यक्रम किंवा प्रवासासाठी भत्ते देते.

हे देखील वाचा: BCCI मध्ये मोठा संघटनात्मक बदल! नव्या कार्यकारी अध्यक्षपदी राजीव शुक्ला यांची नियुक्ती 

कमाई कशी होते?

बीसीसीआयच्या नियमांनुसार, अध्यक्ष, उपाध्यक्ष आणि सचिव यांसारख्या अधिकाऱ्यांना भारतात कोणत्याही बीसीसीआयच्या बैठकीला उपस्थित राहण्यासाठी दररोज ४०,००० रुपये मिळतात. परदेशातील बैठकांमध्ये उपस्थित राहिल्यास त्यांना दररोज १,००० डॉलर्स दिले जातात.

केवळ बैठकाच नाही, तर त्यांना भारतात बीसीसीआयशी संबंधित कोणत्याही कार्यक्रमाला उपस्थित राहण्यासाठी दररोज ३०,००० रुपये मिळतात. याशिवाय, त्यांच्या बिझनेस क्लास फ्लाइट तिकिटांचा आणि लक्झरी हॉटेल्समधील निवासाचा खर्चही बीसीसीआय उचलते. त्यामुळे, पगार नसतानाही या पदावर असलेल्या व्यक्तींची मोठी कमाई होते.

अध्यक्षांनी तयार केलेले हे संबंध आणि नेटवर्क भविष्यात बोर्डाला अनेक व्यावसायिक उपक्रमांमध्ये मदत करू शकतात. तसेच, राजकीय नेत्यांशी चांगले संबंध असल्यामुळे राजकीयदृष्ट्याही मदत मिळते. थोडक्यात, पगार नसतानाही बीसीसीआय अध्यक्षाचे पद अत्यंत शक्तिशाली आणि प्रभावशाली असते.

राजीव शुक्ला बद्दल

राजीव शुक्ला यांचा जन्म १३ सप्टेंबर १९५९ रोजी झाला. ते सध्या ६६ वर्षांचे आहेत. ते प्रथम पत्रकार होते, नंतर राजकारणात आले आणि नंतर भारतीय क्रिकेटमध्ये त्यांनी एक विशेष स्थान निर्माण केले. २०१५ मध्ये त्यांची आयपीएल अध्यक्ष म्हणून नियुक्ती झाली. १८ डिसेंबर २०२० रोजी त्यांना बीसीसीआयचे उपाध्यक्ष बनवण्यात आले. सध्या ते छत्तीसगडमधील राज्यसभेच्या खासदारांपैकी एक आहेत.