IND U-19 vs AUS U-19: भारताने ऑस्ट्रेलियाला 7 धावांनी दिली मात, शेवटच्या ओव्हरमध्ये कांगारूनी केल्या केवळ ३ धावा

IND U-19 vs AUS U-19: भारतीय क्रिकेट टीमने दिलेल्या १८२ धावांच्या लक्ष्याला ऑस्ट्रेलियाची टीम पूर्ण करू शकली नाही. केवळ ७ धावांनी पराभव ऑस्ट्रेलियाला पत्करावा लागला.

• भारतीय अंडर १९ क्रिकेट टीमची कमाल

• ऑस्ट्रेलियाच्या टीमला चारली धूळ 

• केवळ ७ धावांनी हरली ऑस्ट्रेलिया 

IND U-19 vs AUS U-19: भारताने ऑस्ट्रेलियाच्या १९ वर्षांखालील संघाविरुद्धच्या एकदिवसीय मालिकेतील पहिला सामना ७ धावांनी जिंकला. शेवटच्या षटकात ११ धावांचा बचाव करताना भारताने केवळ ३ धावा दिल्या आणि एक रोमांचक विजय मिळवला. तीन सामन्यांच्या मालिकेतील पहिला सामना जिंकून भारताने १-० अशी आघाडी घेतली. या सामन्यात वीरेंद्र सेहवाग आणि राहुल द्रविड या दोघांचीही मुलं खेळली. मात्र, अष्टपैलू यशवर्धन चौहानने सर्वोत्तम कामगिरी केली. त्याने अर्धशतक झळकावले आणि दोन बळी घेतले.

या सामन्यात वीरेंद्र सेहवागचा मुलगा आर्यवीरने भारतासाठी डावाची सुरुवात केली. त्याने २६ चेंडूंचा सामना केला आणि पाच चौकारांसह २८ धावांवर तो बाद झाला. पावसामुळे सामना ५० षटकांऐवजी २० षटकांचा करण्यात आला, ज्यामुळे दोन्ही संघांना आपल्या रणनीतीत थोडा बदल करावा लागला.

अन्वयची वादळी खेळी

राहुल द्रविडचा मुलगा, अन्वय द्रविड, भारतासाठी सहाव्या क्रमांकावर फलंदाजीला आला. त्याने दोन चौकार आणि तीन षटकारांसह १८ चेंडूंमध्ये ३८ धावांची वेगवान आणि उपयुक्त खेळी केली. त्याचा स्ट्राईक रेट २११ होता. नाणेफेक हरल्यानंतर प्रथम फलंदाजी करताना भारताने २० षटकांत सहा गडी गमावून १८२ धावा केल्या. प्रत्युत्तरात, ऑस्ट्रेलियन संघ सात गडी गमावून केवळ १७५ धावाच करू शकला आणि सात धावांनी पराभूत झाला. 

आर्यवीर आणि अन्वय दोघेही सध्या क्रिकेट विश्वास चर्चेचा विषय आहेत. केवळ आपल्या वडिलांच्या नावावर नाही तर आपल्या खेळीच्या जोरावर पुढे येताना दिसून येत आहे. स्थानिक पातळीवरच नाही तर आता राज्य स्तरावरही दोघांच्या खेळाचा बोलबाला दिसून येत आहे. 

Gautam Gambhir : संजूबाबतचा तो निर्णय माझ्यासाठी कठीणच… संघ निवडीबाबत गंभीर यांनी सोडले मौन

यशवर्धनने कमाल केली

यशवर्धन चौहानने भारतासाठी सर्वाधिक ५४ धावा केल्या. त्याने आपल्या ३४ चेंडूंच्या खेळीत पाच चौकार आणि दोन षटकार मारले. अन्वयसोबत मिळून त्यांनी पाचव्या विकेटसाठी ६९ धावांची भागीदारी केली. या भागीदारीने भारताला सावरण्यात महत्त्वाची भूमिका बजावली, कारण एके वेळी भारताने १२ षटकांत ८८ धावांत चार गडी गमावले होते. ऑस्ट्रेलियासाठी ऑफ-स्पिनर एली ब्रेन सर्वात यशस्वी गोलंदाज ठरला. त्याने ४ षटकांत २९ धावा देऊन २ बळी घेतले.

ऑस्ट्रेलियाला शेवटच्या षटकात केवळ ३ धावाच करता आल्या

१८३ धावांचे लक्ष्य गाठताना ऑस्ट्रेलियाने धडाकेबाज सुरुवात केली. संघाच्या सलामीच्या चार फलंदाजांपैकी तिघांनी ४० किंवा त्याहून अधिक धावा केल्या. कर्णधार जॅक जोसानेकने ६ चौकार आणि ३ षटकारांच्या मदतीने २७ चेंडूंमध्ये ५५ धावांचे योगदान दिले. 

ऑस्ट्रेलियाला विजयासाठी शेवटच्या ११ चेंडूंमध्ये २४ धावांची गरज होती. अशा परिस्थितीत, त्याने सलग ३ चौकार मारून २५ चेंडूंमध्ये आपले अर्धशतक पूर्ण केले. मात्र, पुढच्याच चेंडूवर तो बाद झाला. ऑस्ट्रेलियाला शेवटच्या षटकात ११ धावांची गरज होती आणि वेगवान गोलंदाज मोहित उल्वाने केवळ ३ धावा देऊन भारताचा विजय निश्चित केला.

Asian Games 2026: सेमीफायनलसाठी ‘हे’ 4 संघ सज्ज; पदकासाठी ‘आरपार’ची लढाई! कोण कोणाशी भिडणार?