Youth Olympics 2026 साठी भारताचा 17 खेळाडूंचा संघ जाहीर; 11 खेळांत दाखवणार दम

Youth Olympics : डकार २०२६ समर यूथ ऑलिम्पिकसाठी भारतीय ऑलिम्पिक संघटनेने १७ खेळाडूंच्या भारतीय संघाची घोषणा केली आहे. सेनेगलमध्ये होणाऱ्या या स्पर्धेत ११ खेळांमध्ये भारतीय खेळाडू देशाचे प्रतिनिधित्व करणार आहेत.

• भारताचे युवा खेळाडू सहभागी होणार
• पी. टी. उषा यांच्याकडून भारतीय संघाला शुभेच्छा
• सार्थक आर्यचे ऑलिम्पिक खेळण्याचे स्वप्न

सेनेगलमध्ये होणाऱ्या डकार 2026 समर यूथ ऑलिम्पिक (Youth Olympics ) स्पर्धेसाठी भारतीय ऑलिम्पिक संघटनेने (IOA) भारतीय संघाची घोषणा केली आहे. या स्पर्धेत 11 खेळांमध्ये भारताचे 17 खेळाडू देशाचे प्रतिनिधित्व करणार आहेत. भारतीय खेळाडूंनी डकारमध्ये चमकदार कामगिरी करून देशाचा नावलौकिक वाढवावा, अशी अपेक्षा भारतीय ऑलिम्पिक संघटनेने व्यक्त केली आहे.

डकार यूथ ऑलिम्पिक स्पर्धा 31 ऑक्टोबर ते 13 नोव्हेंबरदरम्यान होणार आहे. आफ्रिका खंडात प्रथमच ऑलिम्पिक स्पर्धेचे आयोजन होत असल्याने या स्पर्धेला ऐतिहासिक महत्त्व प्राप्त झाले आहे. या स्पर्धेत 25 खेळांमध्ये सुमारे 2 हजार 700 युवा खेळाडू सहभागी होण्याची अपेक्षा असून, 207 प्रतिनिधी मंडळांचा सहभाग असणार आहे.

सार्थक आर्यचे ऑलिम्पिकमध्ये खेळण्याचे स्वप्न

भारताचा युवा टेबल टेनिसपटू सार्थक आर्य याचाही डकार स्पर्धेसाठी तयारी करणाऱ्या खेळाडूंमध्ये समावेश आहे. यूथ ऑलिम्पिक हा आपल्या क्रीडा कारकिर्दीतील महत्त्वाचा टप्पा ठरेल, असा विश्वास त्याने व्यक्त केला. 2030 मध्ये अहमदाबाद येथे होणाऱ्या राष्ट्रकुल क्रीडा स्पर्धेत आणि 2032 मध्ये ब्रिस्बेन येथे होणाऱ्या ऑलिम्पिक स्पर्धेत भारताचे प्रतिनिधित्व करण्याचे आपले स्वप्न असल्याचे सार्थकने सांगितले.

भारताला 2036 च्या ऑलिम्पिक स्पर्धेचे यजमानपद मिळाल्यास मायदेशात खेळून ऑलिम्पिक पदक जिंकणे ही आपल्यासाठी विशेष अभिमानाची बाब असेल, अशी भावनाही त्याने व्यक्त केली.

आला आला म्हणताच परत जाणार? न्यूझीलंडविरुद्ध Bhuvneshwar झाला फ्लॉप? मॉर्न मॉर्केल म्हणाले….

 

पी. टी. उषा यांच्याकडून खेळाडूंना शुभेच्छा

भारतीय ऑलिम्पिक संघटनेच्या अध्यक्षा पी. टी. उषा यांनी भारतीय युवा खेळाडूंना शुभेच्छा दिल्या. डकार 2026 ही युवा खेळाडूंच्या कारकिर्दीतील महत्त्वाची संधी असून, हे खेळाडू भारतीय क्रीडा क्षेत्राचे भविष्य आहेत, असे त्यांनी सांगितले. याच खेळाडूंमधून भविष्यात ब्रिस्बेन 2032 आणि त्यानंतरच्या ऑलिम्पिक स्पर्धांमध्ये भारताचे प्रतिनिधित्व करणारे पदकविजेते घडू शकतात, असा विश्वासही त्यांनी व्यक्त केला.

आफ्रिका खंडात पहिल्यांदाच ऑलिम्पिक स्पर्धेचे आयोजन होत असल्याबद्दल त्यांनी डकार 2026 आयोजन समिती आणि सेनेगल ऑलिम्पिक समितीचे अभिनंदन केले.

French Open 2026: विजयाच्या उंबरठ्यावर स्वप्नं भंगलं! PV Sindhu ची झुंज अपुरी; An Se Young ने सलग तिसऱ्यांदा जिंकले जेतेपद

आंतरराष्ट्रीय क्रीडा सहकार्यावरही भर

डकार येथील स्पर्धेदरम्यान भारतीय ऑलिम्पिक संघटनेला जगभरातील राष्ट्रीय ऑलिम्पिक समित्यांशी संवाद साधण्याची संधी मिळणार आहे. युवा खेळाडूंची ओळख, त्यांच्या कौशल्याचा विकास आणि युवा स्तरापासून उच्चस्तरीय क्रीडा स्पर्धांपर्यंतच्या संधी अधिक सक्षम करण्यावर या संवादात भर दिला जाणार आहे.

तसेच, पी. टी. उषा या नामिबिया आणि मॉरिशससह काही आफ्रिकी देशांच्या राष्ट्रीय ऑलिम्पिक समित्यांशी क्रीडा सहकार्य आणि देवाणघेवाणीसंदर्भातील सामंजस्य करारांवर स्वाक्षरी करण्याची शक्यता आहे. या उपक्रमांमुळे भारताच्या दीर्घकालीन क्रीडा विकासाच्या प्रयत्नांना चालना मिळण्याची अपेक्षा आहे.