IND vs PAK Asian Games 2026 Final: पाकिस्तानसमोर भारताचा 212 धावांचा डोंगर; अभिषेकनंतर तिलक-दुबेची वादळी बॅटिंग

IND vs PAK Asian Games 2026 Final: एशियन गेम्स 2026 च्या पुरुष क्रिकेट फायनलमध्ये भारताने पाकिस्तानसमोर 212 धावांचे मोठे लक्ष्य ठेवले आहे. अभिषेक शर्माने 28 चेंडूंत 61, तर तिलक वर्माने 22 चेंडूंत 51 धावांची वादळी खेळी केली. अखेरच्या षटकांत शिवम दुबेनेही फटकेबाजी करत भारताला 211 धावांपर्यंत पोहोचवले.

• पाकिस्तानसमोर भारताचा 212 धावांचा डोंगर
• अभिषेकनंतर तिलक-दुबेची वादळी बॅटिंग
• अभिषेकची तुफानी सुरुवात, तिलक-दुबेचा धडाका

IND vs PAK Asian Games 2026 Final: एशियन गेम्स 2026 मधील पुरुष क्रिकेटच्या सुवर्णपदकाच्या सामन्यात भारत आणि पाकिस्तान आमनेसामने आले आहेत. जपानमधील निशिन येथील कोरोगी स्पोर्ट्स पार्कवर खेळल्या जात असलेल्या या सामन्यात भारतीय कर्णधार श्रेयस अय्यरने नाणेफेक जिंकून प्रथम फलंदाजीचा निर्णय घेतला.

भारताला वैभव सूर्यवंशी आणि अभिषेक शर्मा यांनी आक्रमक सुरुवात करून दिली. वैभवने 9 चेंडूंत दोन षटकारांसह 15 धावा केल्या. त्यानंतर संजू सॅमसन केवळ 2 धावांवर बाद झाला. मात्र दुसऱ्या बाजूने अभिषेकने पाकिस्तानी गोलंदाजांवर हल्ला चढवला. त्याने अवघ्या 20 चेंडूंत अर्धशतक पूर्ण केले आणि अखेर 28 चेंडूंत 61 धावांची तुफानी खेळी केली. त्याच्या डावात 3 चौकार आणि तब्बल 7 षटकारांचा समावेश होता. आजच्या सामन्यातील त्याच्या षटकारांच्या कामगिरीने काही उल्लेखनीय T20 विक्रमांनाही गवसणी घातली.

Asian Games 2026: ‘भारत की बेटी’, प्रणवी उर्सने रचला इतिहास, सुवर्णपदक जिंकणारी पहिली भारतीय महिला गोल्फर

अभिषेक बाद झाल्यानंतर भारताच्या धावगतीला काही काळ ब्रेक लागला. ईशान किशनने 20, तर कर्णधार श्रेयस अय्यरने 21 धावा केल्या. 14.1 षटकांत भारताची अवस्था 5 बाद 133 अशी झाली होती. मात्र त्यानंतर तिलक वर्मा आणि शिवम दुबे यांनी पाकिस्तानच्या गोलंदाजांवर जोरदार प्रतिहल्ला केला.

तिलक वर्माने अवघ्या 22 चेंडूंत 51 धावा फटकावत भारतीय डावाला जबरदस्त फिनिश दिली. शिवम दुबेनेही 15 चेंडूंत 27 धावा केल्या. या आक्रमक फलंदाजीच्या जोरावर भारताने पाकिस्तानसमोर 212 धावांचे लक्ष्य ठेवले. भारताने उपांत्य फेरीत श्रीलंकेचा तब्बल 124 धावांनी पराभव केला होता. भारताच्या 169 धावांच्या प्रत्युत्तरात श्रीलंकेचा संघ अवघ्या 45 धावांत गारद झाला. दुसरीकडे पाकिस्तानने पावसामुळे 13 षटकांच्या झालेल्या उपांत्य सामन्यात बांगलादेशवर सहा विकेट्सने विजय मिळवत फायनलमध्ये प्रवेश केला.

आता पाकिस्तानसमोर सुवर्णपदकासाठी 20 षटकांत 212 धावांचे आव्हान आहे. भारत गतविजेता असून सलग दुसरे एशियन गेम्स सुवर्णपदक जिंकण्याच्या उद्देशाने मैदानात उतरला आहे.

Asian Games 2026: 17 व्या वर्षी कुमकुम मोहोडने रचला इतिहास; रिकर्व्ह महिला व्यक्तिगतमध्ये सुवर्णपदक जिंकणारी पहिली खेळाडू