फोटो सौजन्य - सोशल मिडिया
इंडियन प्रीमियर लीगच्या तिसऱ्या सामन्यात राजस्थान रॉयल्सने चेन्नई सुपर किंग्सला ८ गडी राखून पराभूत केले. या विजयासह, आरआर संघाने या स्पर्धेत आपला पहिला विजय मिळवला. सामन्यात, राजस्थानचा कर्णधार रियान परागने नाणेफेक जिंकून प्रथम गोलंदाजी करण्याचा निर्णय घेतला, जो योग्य ठरला. चेन्नई सुपर किंग्सने उभारलेल्या १२७ धावांच्या प्रत्युत्तरात, आरआर संघाने केवळ १२.१ षटकांत लक्ष्य पूर्ण केले. अशाप्रकारे, त्यांनी हा सामना ८ गडी राखून जिंकला.
१५ वर्षीय वैभवने अवघ्या १५ चेंडूंमध्ये धडाकेबाज अर्धशतक झळकावले, जे आयपीएलच्या इतिहासातील संयुक्तपणे तिसरे सर्वात वेगवान अर्धशतक आहे. या विजयानंतर राजस्थान रॉयल्सचा कर्णधार रियान पराग खूप आनंदित झाला. त्याने वैभववर कौतुकाचा वर्षाव केला. प्रथम फलंदाजी करताना चेन्नई सुपर किंग्सची सुरुवात अत्यंत निराशाजनक झाली. त्यांची आघाडीची फळी पूर्णपणे अपयशी ठरली आणि त्यांनी अवघ्या ३८ धावांत आपल्या पहिल्या चार विकेट गमावल्या.
मधल्या फळीत, सरफराज खान (१७ धावा) आणि कार्तिक शर्मा (१८ धावा) यांनी डाव सावरण्याचा प्रयत्न केला, पण दोन्ही फलंदाजांना विशेष प्रभाव पाडता आला नाही. शिवम दुबे आणि नूर अहमद हे देखील लवकर बाद झाले. खालच्या फळीत, जेमी ओव्हरटनने ३६ चेंडूंमध्ये महत्त्वपूर्ण ४३ धावा करून संघाला १२७ धावांपर्यंत पोहोचवले. राजस्थानची गोलंदाजी प्रभावी होती, ज्यात जोफ्रा आर्चर आणि नंद्रे बर्गर यांनी उत्कृष्ट कामगिरी केली.
१२८ धावांचे लक्ष्य गाठताना राजस्थानने धडाकेबाज सुरुवात केली. यशस्वी जैस्वाल (३८) आणि वैभव सूर्यवंशी (५२) यांनी पहिल्या विकेटसाठी ७४ धावा जोडून सामना एकतर्फी बनवला. वैभव सूर्यवंशीने अवघ्या १५ चेंडूंमध्ये अर्धशतक झळकावून सर्वांना चकित केले. त्याच्या आक्रमक फलंदाजीने सामन्याचे चित्र पूर्णपणे पालटून टाकले. त्याच्या बाद झाल्यानंतर ध्रुव जुरैलनेही आक्रमक फलंदाजी केली. अखेरीस, कर्णधार रियान परागने (१४ धावा) ४७ चेंडू शिल्लक असताना सामना संपवून संघाला विजय मिळवून दिला.
🚨HE’S A SPECIAL TALENT – RIYAN PARAG ON SURYAVANSHI🚨 He said 🎙️ – Vaibhav is not given extra pressure & is allowed to focus on his strengths, especially batting. 👉 He added that even teammates were surprised watching his shots, just like fans😅pic.twitter.com/rNgJycM3Gz — Sam (@Cricsam01) March 31, 2026
सामना जिंकल्यानंतर कर्णधार रियान पराग म्हणाला की, संघाला अशाच सुरुवातीची गरज होती. त्याने पुढे सांगितले की, नाणेफेक जिंकणे आणि योग्य निर्णय घेणे संघासाठी महत्त्वाचे होते. त्यांनी वैभव सूर्यवंशी यांचे खूप कौतुक केले आणि ते म्हणाले, आम्ही (ध्रुव जुरेल आणि तो) फक्त विचार करत होतो, ‘हे सगळं कसं घडत आहे? तो हे सगळं कसं करतोय?’ तो माझ्या टीमचा भाग असल्याचा मला खूप आनंद आहे.
रियान परागने सूर्यवंशीला आश्वासन दिले की त्याला सर्व १४ सामने खेळण्याची संधी मिळेल. तो म्हणाला की, सामन्यात काहीही झाले किंवा माध्यमांमध्ये कशाचीही चर्चा होत असली तरी, सूर्यवंशीने त्याची चिंता करू नये. त्याने केवळ आपल्या खेळावर लक्ष केंद्रित करावे.
.png "Videos"){kind=small}
