Badminton: एकतर्फी संग्राम! ‘जेझ’ संघ ठरला १२ व्या पीवायसी-ट्रूस्पेस बॅडमिंटन स्पर्धेचा ‘सुपर चॅम्पियन’

Badminton: खुल्या दुहेरीच्या तिसऱ्या सामन्यात जेझच्या समायरा मेहता व अस्मि जोशी यांनी इरा फिरोदिया व श्रीशा कोकाटे यांच्यावर १५-१०, १०-१५, १५-१० असा विजय मिळवला.

• जेझ संघाला पीवायसी-ट्रूस्पेस बॅडमिंटनचे विजेतेपद
• फिंच संघाचा ११-०० असा पराभव
• अर्जुन बाहुलीकर, समायरा मेहता खेळाडूंची चमकदार कामगिरी

पुणे/Badminton: पीवायसी हिंदू जिमखान्याच्या वतीने आयोजित करण्यात आलेल्या बाराव्या पीवायसी-ट्रूस्पेस करंडक बॅडमिंटन साखळी स्पर्धेत जेझ संघाने विजेतेपद पटकावले. अंतिम फेरीत जेझ संघाने फिंच संघाचा ११-०० असा पराभव करत विजेतेपदावर नाव कोरले.पीवायसी हिंदू जिमखाना क्लबच्या बॅडमिंटन कोर्टवर झालेल्या या स्पर्धेच्या किड्स गटाच्या अंतिम सामन्यात जेझ संघाने सुरुवातीपासूनच आघाडी घेत सामन्यावर वर्चस्व राखले. खुल्या दुहेरीच्या पहिल्या सामन्यात जेझच्या अर्जुन बाहुलीकर व अविर जैन यांनी फिंचच्या निरण भुरट व विहान सोमण यांचा १३-१५, १५-१२, १५-१० असा पराभव केला. त्यानंतर खुल्या दुहेरीच्या दुसऱ्या सामन्यात ऋषभ बेडेकर व रोनव चाफळकर यांनी प्रभव नेरकर व भैरवी सिद्धी यांचा १५-११, १५-०७ असा पराभव करत जेझला आघाडी मिळवून दिली.

खुल्या दुहेरीच्या तिसऱ्या सामन्यात जेझच्या समायरा मेहता व अस्मि जोशी यांनी इरा फिरोदिया व श्रीशा कोकाटे यांच्यावर १५-१०, १०-१५, १५-१० असा विजय मिळवला. त्यानंतर खुल्या दुहेरीच्या चौथ्या सामन्यात आर्यही खडके व मीरा आजगावकर यांनी इशा जोशी व कनाका भालेराव यांचा ०९-१५, १५-१२, १५-१० असा पराभव केला.खुल्या दुहेरीच्या पाचव्या सामन्यात जेझच्या अलिशा पै व भार्गव सिद्धी यांनी अस्मि आदीवरेकर व सिद्धार्थ रानडे यांच्यावर ०८-१५, १५-०९, १५-१३ असा संघर्षपूर्ण विजय मिळवत संघाला विजयी आघाडी मिळवून दिली. अखेरच्या खुल्या एकेरीच्या सामन्यात जेझच्या ईशान जोशी याने फिंचच्या शंतनू चिरपुटकरचा १२-१५, १५-१२, १५-१३ असा पराभव करत जेझच्या विजेतेपदावर शिक्कामोर्तब केले.

Badminton: थ्रिलर फायनल! शेवटच्या क्षणापर्यंत रंगलेल्या लढतीत नाडगोंडे रेव्हन्सचा दणकेबाज विजय

अविर जैन ठरला ‘प्लेअर ऑफ द टूर्नामेंट’

स्पर्धेतील विजेत्या जेझ संघाला करंडक व पदके देऊन गौरविण्यात आले. पारितोषिक वितरण पीवायसी हिंदू जिमखान्याचे अध्यक्ष कुमार ताम्हाणे, सचिव दीपक गाडगीळ, सहसचिव सारंग लागू आणि ट्रूस्पेसचे संचालक आश्विन त्रिमल यांच्या हस्ते झाले.यावेळी उल्हास त्रिमल, मिस्टिक जंगलचे सोहम जोशी, क्लबच्या बॅडमिंटन विभागाचे सचिव तन्मय आगाशे, नंदन डोंगरे, अभिषेक ताम्हाणे, सिद्धार्थ भावे, शिरीष साठे, आमोद प्रधान आदी मान्यवर उपस्थित होते.

Badminton: पुण्यात बॅडमिंटनचा थरार! बेल्फिन्स टायगर्स, वन लिटिल फार्म संघांची विजयी आगेकूच

वैयक्तिक पुरस्कार विजेते पुढीलप्रमाणे

सर्वोत्कृष्ट खेळाडू (९ वर्षांखालील मुले) : शिवांश नाडगोंडे
सर्वोत्कृष्ट खेळाडू (९ वर्षांखालील मुली) : अवनी किंजवडेकर
सर्वोत्कृष्ट खेळाडू (११ वर्षांखालील मुले) : शंतनू चिरपुटकर
सर्वोत्कृष्ट खेळाडू (११ वर्षांखालील मुली) : श्रीशा कोकाटे
सर्वोत्कृष्ट खेळाडू (१४ वर्षांखालील मुले) : अर्जुन बाहुलीकर
सर्वोत्कृष्ट खेळाडू (१४ वर्षांखालील मुली) : प्रिशा पटवर्धन
सर्वोत्कृष्ट जोडी : अस्मि जोशी व समायरा मेहता
स्पर्धेतील सर्वोत्तम खेळाडू : अविर जैन