Mohammed Siraj : सिराजला संघाबाहेर ठेवण्यात हिंदू-मुस्लिम अँगल नाही'; गौतम गंभीर यांच्या प्रशिक्षकांनी फेटाळले आरोप, सौजन्य : आयएएनएस
Mohammed Siraj : न्यूझीलंडविरुद्धच्या (IND vs NZ) पहिल्या कसोटी सामन्यासाठी भारतीय प्लेइंग इलेव्हनमधून मोहम्मद सिराजला वगळण्यात आल्यावरून सुरू झालेल्या वादात आता प्रशिक्षकांनीही उडी घेतली आहे. भारतीय संघाच्या निवडीमागे कोणताही हिंदू-मुस्लिम मुद्दा नसून, संघाचे कॉम्बिनेशन आणि क्रिकेटची गरज लक्षात घेऊनच निर्णय घेतले जातात, असे गौतम गंभीर यांचे बालपणीचे प्रशिक्षक संजय भारद्वाज यांनी स्पष्ट केले.
तसेच क्रिकेटपटू पृथ्वी शॉचे बालपणीचे प्रशिक्षक संतोष पिंगुळकर यांनीही धार्मिक मुद्दा उपस्थित करणाऱ्या विधानांना निराधार ठरवले आहे.
काँग्रेस खासदार इमरान मसूद यांनी मोहम्मद सिराजला न्यूझीलंडविरुद्धच्या पहिल्या कसोटी सामन्याच्या प्लेइंग इलेव्हनमध्ये स्थान न मिळाल्याबद्दल धार्मिक मुद्दा उपस्थित केला होता. त्यांच्या या विधानानंतर क्रिकेट विश्वात चर्चा सुरू झाली आहे.
या पार्श्वभूमीवर एका वृत्तसंस्थेशी बोलताना संजय भारद्वाज म्हणाले, हे आरोप निराधार आहेत. भारतीय क्रिकेट संघात कोणताही हिंदू-मुस्लिम मुद्दा नाही. प्रत्येक खेळाडू भारतीय आहे आणि देशाचे प्रतिनिधित्व करतो. गौतम गंभीर यांनी नेहमीच मोहम्मद सिराजला पाठिंबा दिला आहे. सिराज प्लेइंग इलेव्हनचा भाग नसेल, तर त्यामागे पूर्णपणे संघाची गरज आहे.
संघाची निवड करताना खेळाडूंचे कॉम्बिनेशन, त्यांची भूमिका आणि कामगिरी यांचा विचार केला जातो. गंभीर यांची कोणाशीही वैयक्तिक दुश्मनी नाही. योग्य कॉम्बिनेशनसह मजबूत संघ तयार करणे हेच त्यांचे प्राधान्य आहे. BCCI देखील हिंदू-मुस्लिम विभाजनावर विश्वास ठेवत नाही किंवा त्याला प्रोत्साहन देत नाही. त्यामुळे असे आरोप पूर्णपणे निराधार आहेत, असे भारद्वाज यांनी सांगितले.
पृथ्वी शॉचे बालपणीचे प्रशिक्षक संतोष पिंगुळकर यांनीही सिराजच्या संघ निवडीवरून सुरू असलेल्या धार्मिक चर्चेला विरोध केला. वृत्तसंस्थेशी बोलताना ते म्हणाले, सिराजला संघाबाहेर ठेवण्यावरून सुरू असलेली चर्चा निराधार आहे. त्याला ODI सामन्यांमध्ये संधी देण्यात आली होती. तो अजूनही संघाचा भाग आहे. त्याच्याबाबत केली जाणारी राजकीय विधाने चुकीची आहेत. क्रिकेटमध्ये राजकारणाला कोणतेही स्थान नाही.
काँग्रेस खासदार इमरान मसूद यांनी न्यूझीलंडविरुद्धच्या कसोटी सामन्यात मोहम्मद सिराजला प्लेइंग इलेव्हनमध्ये स्थान न मिळाल्याबद्दल प्रश्न उपस्थित केला होता. त्याचे नाव सिराज आहे, हेच कारण पुरेसे नाही का? तो चांगली कामगिरी करत असूनही त्याची निवड होत नसेल, तर त्यामागे दुसरे कोणते कारण असू शकते? असे विधान मसूद यांनी केले होते.
सध्याच्या जागतिक कसोटी अजिंक्यपद स्पर्धेच्या (WTC) चक्रात सिराज हा भारताचा सर्वाधिक बळी घेणारा गोलंदाज आहे. त्यामुळे त्याला प्लेइंग इलेव्हनमधून वगळण्याच्या निर्णयावर प्रश्न उपस्थित होत आहेत.
भारतीय संघाने न्यूझीलंडविरुद्धच्या सामन्यासाठी वेगवान गोलंदाज म्हणून जसप्रीत बुमराह, प्रसिद्ध कृष्णा, आकाशदीप आणि अंशुल कंबोज यांना संधी दिली आहे. बुमराह वगळता इतर गोलंदाजांना सिराजच्या तुलनेत कमी अनुभव असल्याने त्याच्या निवडीबाबत चर्चा सुरू झाली. त्यातच इमरान मसूद यांच्या विधानामुळे या प्रकरणाला धार्मिक रंग मिळाला आहे.
दरम्यान, सिराजच्या प्लेईंग इलेव्हनमधील अनुपस्थितीबाबत गुरुवारी काही क्रिकेट विश्लेषकांनीही प्रश्न उपस्थित केले होते. त्यात माजी प्रशिक्षक रवी शास्त्री, दिग्गज क्रिकेटपटू सुनील गावस्कर, माजी क्रिकेटपटू अजिंक्य रहाणे यांचा समावेश होता. सिराज लयात असताना व दमदार कामगिरी करत असताना त्याला संघात संधी न मिळाल्याने त्यांनी संघ व्यवस्थापनाबाबत प्रश्न उपस्थित केले होते.
Ans: न्यूझीलंडविरुद्धच्या पहिल्या कसोटी सामन्यासाठी मोहम्मद सिराजला प्लेइंग इलेव्हनमध्ये स्थान मिळाले नाही. त्यावर काँग्रेस खासदार इमरान मसूद यांनी धार्मिक मुद्दा उपस्थित केल्याने वाद निर्माण झाला.
Ans: सिराजला संघाबाहेर ठेवण्यामागे कोणताही हिंदू-मुस्लिम मुद्दा नसून, संघाची गरज आणि कॉम्बिनेशन लक्षात घेऊन निवड केली जाते, असे संजय भारद्वाज म्हणाले.
Ans: सिराजला संघातून वगळण्यावरून सुरू असलेली चर्चा निराधार असल्याचे सांगत क्रिकेटमध्ये राजकारणाला जागा नसल्याचे पृथ्वी शॉचे प्रशिक्षक संतोष पिंगुळकर यांनी स्पष्ट केले.






