Nasser Hussain : रग्बी इंडियाच्या प्रशासनात नासेर हुसेन यांची एंट्री; ४० पैकी ३९ मते मिळवत ‘एसओएम’पदी निवड

Nasser Hussain : भारताचे माजी रग्बी कर्णधार नासेर हुसेन यांची रग्बी इंडियाच्या ‘स्पोर्ट्सपर्सन ऑफ आउटस्टँडिंग मेरिट’पदी निवड झाली. त्यांना सर्वसाधारण सभेत 40 पैकी 39 मते मिळाली.

• नासेर हे आगा हुसेन यांचे सुपुत्र
• भारतीय संघाचं केलंय नेतृत्व
• हुसेन यांना 40 पैकी 39 मतं

 

भारतीय रग्बी संघाचे माजी कर्णधार नासेर हुसेन (Nasser Hussain) यांची ‘स्पोर्ट्सपर्सन ऑफ आउटस्टँडिंग मेरिट’ (SOM) म्हणून निवड झाली आहे. भारतीय रग्बी फुटबॉल युनियन अर्थात रग्बी इंडियाच्या नुकत्याच झालेल्या सर्वसाधारण सभेत त्यांना 40 पैकी 39 मते मिळाली.

नासेर हुसेन यांनी 17 वर्षांच्या आंतरराष्ट्रीय कारकिर्दीत भारतीय रग्बीमध्ये महत्त्वपूर्ण योगदान दिले आहे. 1998 ते 2014 या काळात त्यांनी भारताचे प्रतिनिधित्व केले. यापैकी 2004 ते 2013 अशी सलग दहा वर्षे त्यांनी राष्ट्रीय संघाचे कर्णधारपद भूषवले. रग्बी सेव्हन्स आणि रग्बी फिफ्टिन या दोन्ही प्रकारांत त्यांनी भारताकडून एकूण 142 सामने खेळले आहेत.

भारतीय संघाचं केलंय नेतृत्व

नासेर यांनी 2006 मध्ये कतार येथे झालेल्या आशियाई क्रीडा स्पर्धेत, 2010 मध्ये चीन येथे झालेल्या आशियाई क्रीडा स्पर्धेत आणि दिल्ली येथे झालेल्या 2010 च्या राष्ट्रकुल क्रीडा स्पर्धेत भारतीय संघाचे नेतृत्व केले. भारताकडून सर्वाधिक सामने खेळणाऱ्या रग्बीपटूंमध्ये त्यांचा समावेश आहे. तसेच रग्बी फिफ्टिन प्रकारात त्यांनी 18 ट्राय नोंदवले असून, देशासाठी सर्वाधिक ट्राय करणाऱ्या खेळाडूंच्या यादीत ते अग्रस्थानी आहेत.

नासेर हुसेन यांच्यासोबत पुरुषांच्या गटात थिमय्या एम. पी. यांची 28 मते मिळवून निवड झाली. महिलांच्या गटात अवनी साबडे आणि सुरभी सुरेंद्र दाते यांची प्रत्येकी 34 मते मिळवून निवड झाली.

IND vs NZ: अर्शदीप सिंगने पूर्ण केलं ‘शतक’; मैदानात उतरताच रचला इतिहास, विराट-रोहितच्या खास क्लबमध्ये एन्ट्री

नासेर हे आगा हुसेन यांचे सुपुत्र

‘राष्ट्रीय क्रीडा प्रशासन कायदा, 2025’ आणि ‘राष्ट्रीय क्रीडा प्रशासन (राष्ट्रीय क्रीडा संस्था) नियम, 2026’ यांनुसार राष्ट्रीय क्रीडा संस्थांच्या सर्वसाधारण सभेत किमान चार ‘एसओएम’ प्रतिनिधी असणे आवश्यक आहे. यामध्ये पुरुष आणि महिलांना समान प्रतिनिधित्व देण्याची तरतूद आहे. क्रीडा प्रशासनातील खेळाडूंचा सहभाग वाढवणे, तसेच पारदर्शकता आणि उत्तरदायित्व मजबूत करणे हा या सुधारणांचा उद्देश आहे.

‘एसओएम’ श्रेणीमुळे निवृत्त खेळाडूंना राष्ट्रीय क्रीडा महासंघाच्या सर्वसाधारण सभेत मतदानाचा अधिकार असलेले सदस्य म्हणून निवडून येण्याची संधी मिळते. त्यामुळे खेळाडूंना क्रीडा प्रशासनाच्या निर्णयप्रक्रियेत थेट सहभाग घेता येतो. रग्बी इंडियाच्या सर्वसाधारण सभेत निवडून आलेले चार ‘एसओएम’ सदस्य मतदानाचा अधिकार बजावतील.

Asian Para Games : हाय जंपमध्ये भारताचा क्लीन स्वीप! तिन्ही पदके भारताच्या नावावर, शैलेशची सुवर्ण कामगिरी

मैदानावर रणनीती आणि चपळ हालचालींसाठी ओळखले जाणारे नासेर हुसेन हे आशिया रग्बीचे माजी अध्यक्ष आणि रग्बी इंडियाचे संस्थापक व माजी उपाध्यक्ष आगा हुसेन यांचे पुत्र आहेत. वडिलांच्या पावलावर पाऊल ठेवत त्यांनी आता रग्बीच्या प्रशासकीय क्षेत्रातही नवी जबाबदारी स्वीकारली आहे.