Prithvi Shaw to lead Maharashtra in Ranji Trophy
नियमित कर्णधार ऋतुराज गायकवाडचा महाराष्ट्राच्या १६ सदस्यीय संघात समावेश करण्यात आलेला नाही. तो ऑस्ट्रेलिया ‘अ’ विरुद्धच्या तीन सामन्यांच्या अनधिकृत एकदिवसीय मालिकेत भारत ‘अ’ संघाचे नेतृत्व करेल. भारत ‘अ’ आणि ऑस्ट्रेलिया ‘अ’ यांच्यातील हे सामने ६, ९ आणि ११ ऑक्टोबर रोजी पुदुचेरी येथे खेळले जातील. रणजी करंडक २०२६-२७ हंगाम देखील ११ ऑक्टोबर रोजी सुरू होईल. अशा परिस्थितीत, गायकवाडच्या अनुपस्थितीत पृथ्वी शॉ महाराष्ट्राचे नेतृत्व करेल. या मालिकेसाठी महाराष्ट्राचा अष्टपैलू खेळाडू अर्शिन कुलकर्णीचाही भारत ‘अ’ संघात संधी देण्यात आली आहे.
२०२५-२६ च्या देशांतर्गत हंगामापूर्वी शॉ महाराष्ट्रात सामील होण्यासाठी मुंबई संघाला निरोप दिला होता. त्या हंगामात त्याने महाराष्ट्रासाठी उत्कृष्ट कामगिरी केली, सात सामन्यांतील ११ डावांमध्ये ५३७ धावा करून आपल्या टीकाकारांना सडेतोड उत्तर दिले. त्याने महाराष्ट्रासाठी सर्वाधिक धावा देखील केल्या.त्याने भारतासाठी पाच कसोटी सामने खेळले असून, त्यात ३३९ धावा केल्या आहेत. त्याने ६ एकदिवसीय सामन्यांमध्ये १८९ धावा देखील केल्या आहेत. तो शेवटचा २०२१ मध्ये भारतासाठी खेळला. त्यानंतर त्याचा भारतीय संघात संधी मिळाली नाही.
पृथ्वी शॉची तुलना एकेकाळी सचिन तेंडुलकरशी केली जात होती. पृथ्वीची कर्णधार म्हणून रेड बॉल आणि व्हाईट बॉल क्रिकेटमधील कामगिरी प्रभावी राहिली आहे. तो एक उत्कृष्ट कर्णधार राहिला आहे. २०१८ मध्ये, शॉने भारतीय १९ वर्षांखालील संघाला विजय मिळवून दिला. शुभमन गिल देखील या संघाचा भाग होता आणि तो शॉच्या कर्णधारपदाखाली खेळला.
त्यानंतर पृथ्वीने २०२१-२२ च्या रणजी ट्रॉफीमध्ये मुंबईचे नेतृत्व करत संघाला अंतिम फेरीपर्यंत पोहोचवले. मात्र, संघाला मध्य प्रदेशविरुद्ध पराभव पत्करावा लागला. त्यानंतर शॉने मुंबईला विजय हजारे ट्रॉफीचे विजेतेपद मिळवून दिले. त्या हंगामात त्याची बॅट चांगलीच तळपली होती, त्याने ८२७ धावा केल्या, ज्यात २२७ ही त्याची सर्वोत्तम धावसंख्या होती. आता तो पुन्हा एकदा महाराष्ट्र संघाची कमान हाती घेणार आहे.
.png "Videos"){kind=small}
