शुक्रवार, 7 ऑगस्ट 2026
पाच दिवसांच्या स्पर्धेत प्रज्ञानंद पहिल्या स्थानावर कायम होता. उझबेकिस्तानच्या सिंदारोव्हने त्याला शेवटच्या दिवसापर्यंत कडवी झुंज दिली, पण या भारतीय ग्रँडमास्टरने आपला दबदबा कायम ठेवला. ब्लिट्झ फेरीच्या शेवटच्या नऊ सामन्यांमध्ये त्याने तीन सामने जिंकले, पाच ड्रॉ केले आणि फक्त एक सामना गमावला. त्याने केवळ मुख्य चषकच जिंकला नाही, तर रॅपिड आणि ब्लिट्झ या दोन्ही प्रकारांमध्ये सर्वाधिक गुणही मिळवले. या प्रभावी विजयासह, त्याला ५०,००० डॉलर्सचे अंदाजे ४८ लाख रुपये बक्षीस रक्कम आणि १३ जीसीटी स्पर्धा गुण मिळाले. या गुणांमुळे तो २०२६ च्या एकूण ग्रँड चेस टूर क्रमवारीत थेट दुसऱ्या स्थानावर पोहोचला आहे, ज्यामध्ये अमेरिकन फॅबियानो कारुआना अव्वल स्थानी आहे.
विजयानंतर प्रज्ञानंद म्हणाला, ‘स्कोअरबोर्ड पाहता हा एक सोपा विजय वाटत होता, पण तसे नव्हते. सिंदारोव्हने मला अगदी शेवटपर्यंत कडवी झुंज दिली.’
प्रज्ञानंद सध्या उत्कृष्ट फॉर्ममध्ये आहे. यापूर्वी, जून २०२६ मध्ये, त्याने नॉर्वेतील ओस्लो येथे नॉर्वे चेसचे विजेतेपद पटकावले होते . त्या स्पर्धेच्या अंतिम फेरीत, त्याने जर्मन खेळाडू व्हिन्सेंट केमरला हरवून सलग चार सामने जिंकले आणि ट्रॉफी जिंकली. आता त्याचे लक्ष पुढील स्पर्धा, सिंकफील्ड कपवर आहे, जी १० ऑगस्टपासून सुरू होत आहे. ग्रँड चेस टूर (GCT) च्या अंतिम फेरीत पोहोचण्याची ही स्पर्धा शेवटची संधी आहे. त्यानंतर गुणतालिकेतील अव्वल चार खेळाडू अंतिम फेरीत प्रवेश करतील, जिथे विजेत्याला २००,००० डॉलर्सचे अंदाजे १. ६५ कोटी रुपयांचे भव्य बक्षीस मिळेल.
१० ऑगस्ट २००५ रोजी तामिळनाडूची राजधानी चेन्नई येथे जन्मलेल्या आर. प्रज्ञानानंदने अगदी लहान वयातच बुद्धिबळ विश्वात आपली ओळख निर्माण केली. २०१८ मध्ये, वयाच्या अवघ्या १२ वर्षे, १० महिने आणि १३ दिवसांचा असताना, तो जगातील दुसरा सर्वात तरुण ग्रँडमास्टर आणि भारताचा सर्वात तरुण ग्रँडमास्टर बनला. बुद्धिबळाची प्रतिभा त्याच्या कुटुंबातच आहे. त्याची मोठी बहीण, आर. वैशाली, ही देखील एक प्रसिद्ध ग्रँडमास्टर असून तिने आंतरराष्ट्रीय स्तरावर देशाला गौरव मिळवून दिला आहे
