शुक्रवार, 6 नोव्हेंबर 2026
Kishori Pednekar : पेंग्विनवरून राजकारण नको, आधी मुंबईकरांचा पाणीप्रश्न सोडवा! किशोरी पेडणेकरांचा सत्ताधाऱ्यांवर निशाणा, सौजन्य : सोशल मीडिया
मुंबईत पेंग्विन आणण्याच्या मुद्द्यावरून राजकीय आरोप-प्रत्यारोप सुरू असतानाच शिवसेना (उद्धव बाळासाहेब ठाकरे) नेत्या आणि मुंबईच्या माजी महापौर किशोरी पेडणेकर (Kishori Pednekar) यांनी सत्ताधाऱ्यांवर निशाणा साधला आहे. पेंग्विन आणण्याची संकल्पना आदित्य ठाकरे यांची होती. त्यावेळी विरोध करणारेच आता त्याचे श्रेय घेण्याचा प्रयत्न करत आहेत. मात्र, सध्या पेंग्विन आणण्यापेक्षा मुंबईकरांना पाणी देण्याला प्राधान्य दिले पाहिजे, असे पेडणेकर यांनी सुनावले.
पेंग्विनची संख्या आता 25 झाली असून, त्यातील काही जोड्या म्हैसूरला पाठविण्याची चर्चा आहे. त्यासाठी काही अधिकारी भेट देऊन गेल्याचेही समजते. त्याऐवजी मुंबईत जिराफ आणि सिंह आणले जाणार असल्याची माहिती मिळत असल्याचे पेडणेकर यांनी सांगितले.
पेंग्विन मुंबईत आणले तेव्हा याच लोकांनी त्यावरून मोठे राजकारण केले होते. एका पेंग्विनचा मृत्यू झाल्यानंतरही टीका करण्यात आली. मात्र, आज हेच पेंग्विन मुंबईकरांच्या मनोरंजनाचे साधन बनले आहेत. त्याचबरोबर मुंबईच्या तिजोरीतही मोठ्या प्रमाणात भर घालत आहेत. प्राणी-पक्ष्यांची देवाणघेवाण ही काही नवीन बाब नाही, असे त्यांनी स्पष्ट केले.
मुंबई सध्या पाण्याच्या टंचाईच्या समस्येला सामोरी जात आहे. दिवाळीनंतर निर्माण झालेल्या पाणीटंचाईच्या प्रश्नावर प्रशासन आणि सत्ताधाऱ्यांचे लक्ष दिसत नाही. नागरी सुविधांच्या प्रश्नांवरही चर्चा होत नाही. पक्षी आणले पाहिजेत, त्याला आमचा विरोध नाही; पण ही त्याची वेळ नाही. सध्या मुंबईकरांच्या तोंडचे पाणी पळाले आहे. त्यामुळे त्यांना पेंग्विनपेक्षा पाणी महत्त्वाचे आहे, अशा शब्दांत पेडणेकर यांनी नाराजी व्यक्त केली.
गेली साडेचार ते पावणेपाच वर्षे मुंबई महापालिकेत नगरसेवकांची लोकनियुक्त सभा नव्हती. आता नगरसेवक निवडून आले आहेत, महापौरही विराजमान झाले आहेत. अशा वेळी मुंबईकरांच्या मूलभूत प्रश्नांवर लक्ष देण्याऐवजी सीए आणा, पेंग्विन आणा, अशा विषयांवर चर्चा सुरू असल्याची टीका त्यांनी केली.
पेंग्विन आणण्याची संकल्पना आदित्य ठाकरे यांची होती. ती इतकी यशस्वी ठरली की आता त्याची दखल घ्यावी लागत आहे. मात्र, त्याचे श्रेय घेऊन मिरवण्याची ही वेळ नाही. मुंबईकरांच्या पाण्याच्या प्रश्नावर आधी चिंता व्यक्त करा, असा टोला पेडणेकर यांनी लगावला.
मुंबईकरांचे आरोग्य, वाढते प्रदूषण आणि नागरी समस्यांवरही सत्ताधाऱ्यांनी बोलले पाहिजे, असे पेडणेकर म्हणाल्या. मुंबईत वायू प्रदूषण, जलप्रदूषण, ध्वनिप्रदूषण आणि दृश्य प्रदूषण वाढत आहे. राजकारणातही प्रदूषण निर्माण झाले असून, या महत्त्वाच्या प्रश्नांकडे दुर्लक्ष होत असल्याची टीका त्यांनी केली.
Ans: पेंग्विन आणण्याला पूर्वी विरोध करणारेच आता त्याचे श्रेय घेण्याचा प्रयत्न करत असल्याची टीका त्यांनी सत्ताधाऱ्यांवर केली.
Ans: मुंबईत पेंग्विन आणण्याची संकल्पना आदित्य ठाकरे यांची होती, असे किशोरी पेडणेकर यांनी सांगितले.
Ans: पेडणेकर यांच्या माहितीनुसार, मुंबईतील पेंग्विनची संख्या आता 25 झाली आहे.
