Cricket: विराज फराटेची वादळी खेळी! ७३ धावांच्या जोरावर राजस्थान रॉयलने प्रतिस्पर्ध्यांला लोळवले

Cricket: दुसऱ्या लढतीत राजस्थान रॉयल्स्‌ ॲकॅडमीने स्पार्क क्रिकेट ॲकॅडमीचा ८९ धावांनी धुव्वा उडवला. प्रथम फलंदाजी करताना राजस्थानने २० षटकांत ५ बाद २१५ धावा उभारल्या.

• राजस्थान ॲकॅडमीचे पुना क्लब करंडकात घोडदौड सुरू
• विराज फराटे, भुजंग धुलगुंडची धडाकेबाज फलंदाजी
• गोलंदाजांचीही अचूक कामगिरी

पुणे/Cricket: डीजेएसजी क्रिकेट ॲकॅडमी आणि स्पोर्ट्‌स व्हेंचर यांच्या संयुक्त विद्यमाने आयोजित ‘पुना वेस्टर्न क्लब करंडक‌’ आंतरक्लब १३ वर्षांखालील मुलांच्या टी-२० क्रिकेट स्पर्धेत राजस्थान रॉयल ॲकॅडमी (पुणे) संघाने प्रतिस्पर्ध्यांवर वर्चस्व गाजवत सलग दोन सामने जिंकून विजयी आगेकूच केली. भुगाव येथील द पूना वेस्टर्न क्लब (पीडब्ल्युसी) मैदानावर (pune) पार पडलेल्या पहिल्या सामन्यात राजस्थान रॉयल संघाने लाईनअप क्रिकेट ॲकॅडमीचा ६८ धावांनी पराभव केला. नाणेफेक जिंकून प्रथम फलंदाजी करताना राजस्थान संघाने १८ षटकांत ४ बाद १८० धावांचा भक्कम डोंगर उभा केला.

विराज फराटे याने ३७ चेंडूंत १० चौकार व ४ षटकारांसह नाबाद ७३ धावांची आक्रमक खेळी केली, तर त्याला वर्धन कुमार (३९ धावा) आणि आर्यन उचित (३४ धावा) यांनी उत्तम साथ दिली. प्रत्युत्तरात लाईनअप क्रिकेट ॲकॅडमीचा संपूर्ण संघ १६.५ षटकांत ११२ धावांवर गारद झाला. राजस्थानच्या अर्जुन मिश्रा (२/१), अनिरूध्द शिवकुमार (२/४) आणि संचित कुमार (२/१७) यांनी भेदक मारा करत प्रत्येकी दोन गडी बाद केले.

Cricket: अजित वाडेकर ॲकॅडमीचा जलवा; ‘पुना वेस्टर्न क्लब करंडक‌’मध्ये सलग 2 दणदणीत विजय

भुजंगची वादळी खेळी

दुसऱ्या लढतीत राजस्थान रॉयल्स्‌ ॲकॅडमीने स्पार्क क्रिकेट ॲकॅडमीचा ८९ धावांनी धुव्वा उडवला. प्रथम फलंदाजी करताना राजस्थानने २० षटकांत ५ बाद २१५ धावा उभारल्या. भुजंग धुलगुंड याने अवघ्या ४४ चेंडूंत ७ चौकार आणि तब्बल १० षटकारांच्या मदतीने ९५ धावांची वादळी खेळी साकारली. रणवीर मालवडकरनेही ४६ चेंडूंत ६४ धावांचे मोलाचे योगदान दिले. २१६ धावांच्या आव्हानाचा पाठलाग करताना स्पार्क क्रिकेट ॲकॅडमीचा डाव १४.२ षटकांत अवघ्या १२६ धावांवर आटोपला. विहान कार्डेकर (४४ धावा) आणि यश गायकवाड (२९ धावा) यांचा प्रतिकार तोकडा पडला. राजस्थानकडून अर्यमन पावियाने ३ धावांत ३ बळी टिपले, तर विनायक जाधव आणि सदगुरू रेड्डी यांनी प्रत्येकी दोन गडी बाद केले.

सामन्यांचा संक्षिप्त निकाल (गटसाखळी फेरी)

सामना १: राजस्थान रॉयल ॲकॅडमी: १८ षटकांत ४ बाद १८० धावा (विराज फराटे नाबाद ७३, वर्धन कुमार ३९, आर्यन उचित ३४; ओम बुरके १/२६)
लाईनअप क्रिकेट ॲकॅडमी: १६.५ षटकांत सर्वबाद ११२ धावा (ओम बुरके २१, अवनीश कुलकर्णी २१; अर्जुन मिश्रा २/१, अनिरूध्द शिवकुमार २/४, संचित कुमार २/१७)
निकाल: राजस्थान रॉयल ॲकॅडमी संघ ६८ धावांनी विजयी.
सामनावीर: विराज फराटे.

Cricket: एक शतक अन् २५७ रन्सचे विजय! युनिटी करंडकात आर्यन्स क्रिकेट अकादमीची शानदार कामगिरी

सामना २:

राजस्थान रॉयल्स्‌ ॲकॅडमी: २० षटकांत ५ बाद २१५ धावा (भुजंग धुलगुंड ९५, रणवीर मालवडकर ६४, विनायक जाधव २३; यश गायकवाड ४/३७)
स्पार्क क्रिकेट ॲकॅडमी: १४.२ षटकांत सर्वबाद १२६ धावा (विहान कार्डेकर ४४, यश गायकवाड २९; अर्यमन पाविया ३/३, सदगुरू रेड्डी २/२१, विनायक जाधव २/२४)
निकाल: राजस्थान रॉयल्स्‌ ॲकॅडमी संघ ८९ धावांनी विजयी.
सामनावीर: भुजंग धुलगुंड.