
विराटच्या ऐतिहासिक शतकावर रोहितची प्रतिक्रिया!
विराटचे शतक
रोहित शर्मा ५७ धावा काढून बाद झाला, पण विराटने आपला धडाकेबाज फॉर्म कायम ठेवत वनडे क्रिकेटमधील आपले ५२वे शतक पूर्ण केले. कोहलीच्या या शतकाचा आनंद ड्रेसिंग रूममध्ये बसलेल्या रोहितनेही खूप घेतला. मात्र, याच सेलिब्रेशनदरम्यानचा रोहितचा एक व्हिडिओ सोशल मीडियावर मोठ्या प्रमाणात व्हायरल होत आहे, ज्यात रोहित आनंद व्यक्त करताना काही अपशब्द (शिवी) बोलताना दिसत आहे.
विराटच्या सेलिब्रेशनमध्ये रोहितची प्रतिक्रिया
सोशल मीडियावर व्हायरल झालेल्या व्हिडिओमध्ये रोहित आणि इतर खेळाडू कोहलीच्या शतकाची आतुरतेने वाट पाहत असल्याचे दिसत आहेत. विराटने शतक पूर्ण करताच रोहित, अर्शदीप सिंगसह सर्व खेळाडू उभे राहून टाळ्या वाजवताना दिसतात. याच जल्लोषादरम्यान, रोहित शर्माच्या तोंडातून काही अपशब्द (Curse Word) बाहेर पडले, जे चुकून कॅमेऱ्यात कैद झाले.
Rohit celebrating Kohli’s century pic.twitter.com/x3CeWYv9yu — Abhishek (@be_mewadi) November 30, 2025
कोहली सुरुवातीपासूनच उत्कृष्ट लयीत दिसत होता आणि त्याने एकामागून एक शानदार शॉट्स मारले. विराटने ४७ चेंडूत आपले अर्धशतक पूर्ण केले. अर्धशतकानंतर त्याने आपले ‘विक्राळ रूप’ दाखवत १०२ चेंडूत आंतरराष्ट्रीय कारकिर्दीतील ८३ वे शतक पूर्ण केले. कोहलीने १२० चेंडूंचा सामना करत १३५ धावांची दमदार खेळी केली, ज्यात ११ चौकार आणि ७ षटकारांचा समावेश होता.
एका फॉरमॅटमध्ये सर्वाधिक शतके
रांचीत शतक झळकावून विराट कोहलीने इतिहास रचला आहे. कोहली एकाच फॉरमॅटमध्ये (वनडे) सर्वाधिक शतके (५२) ठोकणारा फलंदाज बनला आहे. यासह कोहलीने क्रिकेटचा देव सचिन तेंडुलकरला मागे टाकले आहे, ज्याने कसोटी क्रिकेटमध्ये ५१ शतके ठोकली होती.