शुक्रवार, 14 ऑगस्ट 2026
विनय कुमार यांची कर्नाटक वरिष्ठ संघाच्या मुख्य प्रशिक्षकपदी नियुक्ती करण्यात आली आहे. यापूर्वी त्यांनी महाराजा टी-२० ट्रॉफीमध्ये हुबळी टायगर्सचे मुख्य प्रशिक्षक म्हणून काम पाहिले आहे. त्यांनी आयएलटी२० मध्ये एमआय एमिरेट्सचे गोलंदाजी प्रशिक्षक म्हणूनही काम केले आहे. २०२१ मध्ये क्रिकेटच्या सर्व प्रकारातून निवृत्त झाल्यानंतर, विनय यांनी आयपीएल फ्रँचायझी मुंबई इंडियन्ससाठी टॅलेंट स्काउट म्हणूनही काम केले. त्यांनी स्टार स्पोर्ट्स कन्नडसाठी कॉमेंटेटर म्हणूनही काम केले आहे.
विनय कुमारने भारतासाठी एक कसोटी, ३१ एकदिवसीय आणि नऊ टी-२० आंतरराष्ट्रीय सामने खेळले आहेत. तो २०१४ मध्ये कोलकाता नाईट रायडर्स आणि २०१५ व २०१७ मध्ये मुंबई इंडियन्स संघासोबत आयपीएल विजेत्या संघाचा भाग होता. विनयची देशांतर्गत क्रिकेटमधील कामगिरी प्रभावी आहे. तो रणजी ट्रॉफीच्या इतिहासातील वेगवान गोलंदाजांमध्ये सर्वाधिक विकेट्स घेणारा गोलंदाज आहे. त्याने या प्रतिष्ठित स्पर्धेत ४४२ विकेट घेतले असून तो सर्वकालीन यादीत चौथ्या क्रमांकावर आहे. १३९ प्रथम-श्रेणी सामन्यांच्या कारकिर्दीत, विनयने २२.४४ च्या सरासरीने ५०४ विकेट्स घेतले. कर्णधार म्हणून, त्याने कर्नाटकला ऐतिहासिक ‘डबल-ट्रेबल’ मिळवून दिले, ज्यात २०१३/१४ आणि २०१४/१५ हंगामात रणजी ट्रॉफी, विजय हजारे ट्रॉफी आणि दोनदा इराणी कप जिंकला
गेल्या वर्षी देशांतर्गत रणजी करंडक हंगामात उपविजेता ठरलेला कर्नाटक संघ, २०२६/२७ हंगामातील आपल्या मोहिमेला ११ ऑक्टोबर रोजी आंध्र प्रदेशविरुद्ध सुरुवात करेल. केएससीएने (KSCA) इतर प्रशिक्षकांच्या नियुक्तीचीही घोषणा केली आहे. कर्नाटक आणि विदर्भ संघाचा माजी फलंदाज गणेश सतीश याची पुरुषांच्या २३ वर्षांखालील संघाच्या प्रशिक्षकपदी नियुक्ती करण्यात आली आहे. माजी खेळाडू कुणाल कपूरकडे पुरुषांच्या १९ वर्षांखालील संघाची जबाबदारी देण्यात आली आहे. तो गेल्या काही वर्षांपासून १६ वर्षांखालील संघासोबत काम करत होता. अमित हे वरिष्ठ महिला आणि २३ वर्षांखालील महिला संघांचे मुख्य प्रशिक्षक असतील.
