Tech Tips: हिवाळ्यात गीझर सुरू करण्यापूर्वी सावधान! या चुका केल्यास होऊ शकतं मोठं नुकसान… वाचा सविस्तर

हिवाळा सुरु होताच बाथरुममधील गीझर पुन्हा एकदा चालू केले जातात. पण अनेक महिने बंद असलेले गीझर परत एकदा चालू करण्यापूर्वी काही गोष्टी तपासणं अतिशय गरजेचं असतं. अन्यथा दुर्घटना घडू शकतात.

• पाणी गरम झाल्यानंतर अंघोळीला जाण्यापूर्वी गीझरचे मुख्य स्विच पूर्णपणे बंद करा
• गरजेपेक्षा जास्त प्रेशर निर्माण झाल्यास टँकचा ब्लास्ट होऊ शकतो
• हिवाळ्यात पहिल्यांदाच गिझर चालू करण्यापूर्वी एखाद्या टेक्नीशियनला बोलावून त्याची सर्विसिंग करणं योग्य

महाराष्ट्रात थंडी जाणवू लागली आहे. त्यामुळे आता बाथरुममधील गीझर पुन्हा एकदा सुरु करण्याची वेळ आली आहे. हिवाळ्यात लोकं बाथरुममध्ये जाताच घाईघाईत गीझर सुरु करतात. मात्र अति घाई संकटात नेई, हे आपल्या सर्वांनाच माहिती आहे. कारण दरवर्षी हिवाळ्यात गीझरचा ब्लास्ट होणं, शॉर्ट सर्किट किंवा गॅस गिझरमुळे गुदमरणं अशा घटना घडत असतात. सहसा ऊन्हाळ्यात गीझरचा वापर केला जात नाही. त्यामुळे गीझर अनेक महिने बंद असतात आणि त्यामध्ये कचरा आणि धूळ जमा होते. मात्र अनेक लोकं या गोष्टीकडे दुर्लक्ष करतात, ज्यामुळे काही दुर्घटना घडू शकतात. अशा परिस्थतीत स्वत:ची आणि तुमच्या कुटूंबाची सुरक्षा करण्यासाठी काही गोष्टी लक्षात ठेवणं गरजेचं आहे.

Motorola चा नवा धमाका! यूजर्ससाठी आणले खास कम्युनिटी ॲप, गेमिंगपासून फोटोग्राफीपर्यंत… मिळणार हे फीचर्स

अंघोळ करताना गीझर चालू ठेवू नये

अनेक लोकांची सवय असते की, ते बाथरुममध्ये जाण्यापूर्वीच गीझर चालू करतात आणि अंघोळ करताना देखील गीझरचा स्विच चालूच ठेवतात. मात्र ही सवय अतिशय धोकादायक ठरू शकते. जर गीझरच्या हिटींग एलीमेंटमध्ये काही समस्या निर्माण झाली किंवा आतील वायरिंगमध्ये लीकेज झाले तर पाण्यामधून थेट करंट लागण्याची भिती असते. त्यामुळे नेहमी लक्षात ठेवा की, पाणी गरम झाल्यानंतर अंघोळीला जाण्यापूर्वी गीझरचे मुख्य स्विच पूर्णपणे बंद करा.

घरात सकाळपासून दुपारपर्यंत सतत गीझर चालू राहतो, जेणेकरून घरातील प्रत्येकजण आपापल्या सोयीनुसार अंघोळ करू शकेल. मात्र घरात सतत गीझर चालू राहिल्याने गीझरचे थर्मोस्टेट खराब होऊ शकते. आतमध्ये गरजेपेक्षा जास्त प्रेशर निर्माण झाल्यास टँकचा ब्लास्ट होऊ शकतो. त्यामुळे नेहमी गरज असेल तेव्हाच 15 ते 20 मिनिटे गीझर चालू ठेवा आणि लगेच बंद करा.

गॅस गिझरचा वापर करताना सावध राहणं गरजेचं

हल्ली विजबिलाची बचत करण्यासाठी अनेक घरांमध्ये एलपीजीवर चालणाऱ्या गॅस गिझरचा वापर केला जातो. मात्र अशा प्रकारच्या गिझरचा वापर करताना सावध राहणं अतिशय गरजेचं आहे. गॅस गीझर चालू केल्यानंतर तो आपली ज्योत टिकवून ठेवण्यासाठी बाथरूममधील ऑक्सिजन वेगाने खेचून घेतो आणि यावेळी कार्बन मोनोऑक्साइडसारखा विषारी वायू बाहेर सोडला जातो.

या गॅसमध्ये कोणताही वास नसतो आणि हा गॅस डोळ्यांना दिसत देखील नाही. जर तुमच्या बाथरुमचा आकार छोटा असेल आणि तिथे हवा बाहेर जाण्यासाठी खिडकी किंवा एग्जॉस्ट फॅन नसेल, तर अंघोळ करताना काही मिनिटांतच माणूस गुदमरू शकतो आणि काहीवेळा बेशुद्ध देखील पडू शकतो. त्यामुळे गॅस गिझरचा वापर करायचा असेल तर बाथरुममध्ये हवा बाहेर जाण्यासाठी खिडकी किंवा एग्जॉस्ट फॅन गरजेचा आहे किंवा बाथरुममध्ये केवळ पाण्याची पाईपलाईन घ्या. बाथरुम छोटे असेल तर गॅस गिझरचे मुख्य युनिट बाथरुमच्या बाहेर एखाद्या मोकळ्या जागेत लावण्याचा प्रयत्न करा.

Apple ची मोठी घोषणा! ‘या’ फोल्डेबल iPhone यूजर्सना मिळणार नवा फोन… काय आहे प्रकरण? जाणून घ्या

पहिल्यांदा वापरण्यापूर्वी सर्विसिंग करणं योग्य

हिवाळ्यात पहिल्यांदाच गिझर चालू करण्यापूर्वी एखाद्या टेक्नीशियनला बोलावून त्याची सर्विसिंग करणं योग्य ठरू शकतं. यावेळी गीझरचा प्रेशर रिलीज वाल्व आणि ऑटो-कट फीचर तपासून घ्या. कारण पाणी एका ठरावीक तापमानावर गरम झाल्यानंतर हे फीचर गीझर आपोआप बंद करते. तसेच गिझरचा वापर करण्यासाठी हलक्या किंवा नॉर्मल स्विचचा वापर न करता हेवी लोड पेलणाऱ्या पावर प्लग आणि एमसीबीचा वापर करा.