Aadhaar Update: एक रुपयाही खर्च करण्याची गरज नाही! घरबसल्या आधार कार्डसोबत लिंक करा ई-मेल; फॉलो करा ‘ही’ सोपी प्रोसेस

Aadhaar Email Update: सर्व आधार कार्ड धारकांसाठी एक महत्त्वाची बातमी आहे. आजपासून म्हणजेच 1 जुलैपासून सर्व आधार कार्ड धारक मोबाईल ॲपद्वारे त्यांच्या आधार कार्डमध्ये मोफत ई-मेल अपडेट करू शकणार आहेत. पण ही सेवा मर्यादित वेळेपर्यंत सुरु करण्यात आली आहे.

• UIDAI ने 1 जुलै ते 31 डिसेंबर 2026 दरम्यान आधारमध्ये ई-मेल अपडेट करण्याची सुविधा मोफत उपलब्ध करून दिली आहे.
• अधिकृत आधार ॲपद्वारे घरबसल्या ई-मेल लिंक केल्यास कोणतेही शुल्क आकारले जाणार नाही.
• आधारसोबत ई-मेल लिंक केल्यास ओटीपी पडताळणी आणि ऑनलाइन सेवांचा वापर अधिक सोपा होणार आहे.

Aadhaar Free Update: UIDAI ने एक मोठा निर्णय घेतला असून याचा फायदा आधार कार्ड धारकांना होणार आहे. UIDAI ने आधार कार्डमध्ये ई-मेल अपडेटसाठी सध्या कोणतेही शुल्क न आकरण्याचा निर्णय घेतला आहे. म्हणजेच आता आधार कार्ड धारक घरबसल्या एक रुपया देखील खर्च न करता त्यांच्या आधार कार्डमध्ये ई-मेल अपडेट करू शकतात. आज 1 जुलैपासून 31 डिसेंबर 2026 पर्यंत ही सेवा सुरु राहणार आहे. करोडो यूजर्स या सेवेचा फायदा घेऊन ई-मेल अपडेट करतील अशी आशा व्यक्त करण्यात आली आहे.

Tech Tips: किती असतं Gaming Laptop चे आयुष्य? खरेदी करण्यापूर्वी वाचा सत्य, नाहीतर कराल पश्चाताप

आधार डेटामध्ये कार्ड धारकाचा ई-मेल अपडेट झाल्यानंतर ओटीपी वेरिफिकेशन आणि ऑनलाईन सेवा ॲक्सेस करणं अतिशय सोपं होणार आहे. तसेच डॉक्युमेंट सेव्ह करण्याची प्रोसेस देखील अतिशय सोपी होणार आहे. आधार कार्ड धारक सध्या सुरु असलेल्या मोफत सेवेअंतर्गत आधार कार्डमध्ये मोफत ई-मेल अपडेट करू शकणार आहेत. ही सेवा 31 डिसेंबर 2026 पर्यंत मोफत असणार आहे. कालावधी संपल्यानंतर आधार कार्डमध्ये ई-मेल अपडेट करण्यासाठी 75 रुपये खर्च करावे लागणार आहेत. (फोटो सौजन्य: Pinterest)

मोबाईल ॲप वापरणाऱ्या यूजर्सना मिळणार सूट

UIDAI चं असं म्हणणं आहे की, ही सेवा केवळ अशा यूजर्सना ऑफर केली जाणार आहे, जे आधार ॲपद्वारे ईमेल अपडेट करत आहेत. मोबाईल ॲप वापरून ई-मेल अपडेट करणाऱ्या यूजर्सना कोणतेही पैसे खर्च करावे लागणार नाहीत. मात्र जर तुम्ही आधार सेंटर किंवा इतर कोणत्याही माध्यमातून आधारमध्ये ई-मेल अपडेट केला तर तुम्हाला त्यासाठी शुल्क भरावे लागणार आहे.

आधारमध्ये ई-मेल लिंक करणं का गरजेचं?

अनेकदा मोबाईलमध्ये सिग्नल नसेल तर आधार ओटीपी येत नाही. पण जर तुमच्या आधारला तुम्ही ई-मेल लिंक केला असेल तर कार्ड धारक ई-मेलमधून ओटीपी मिळवू शकतात. तसेच ईमेलमध्ये त्यांना आधारसंबंधित अपडेट्स देखील मिळणार आहेत. जरी तुम्ही आधारला लिंक असलेला मोबाईल नंबर बदलला तरी देखील तुम्हाला ई-मेलद्वारे ओटीपी मिळवण्याचा पर्याय असणार आहे.

आधारमध्ये ई-मेल अपडेट करण्यासाठी फॉलो करा ही प्रोसेस

• सर्वात आधी तुमच्या स्मार्टफोनमध्ये अधिकृत आधार ॲप इंस्टॉल करा. तुम्ही गुगल प्ले स्टोअर किंवा ॲपल ॲप स्टोअरवरून हा ॲप मोफत इंस्टॉल करू शकता.
• यानंतर ॲप ओपन करा आणि आधार नंबर आणि लिंक असलेल्या मोबाईल नंबरच्या मदतीने लॉगिन करा.
• लॉगिन केल्यानंतर तुम्हाला प्रोफाईल ऑप्शनमध्ये ई-मेल अपडेट करण्याचा पर्याय मिळणार आहे.
• ई-मेल अपडेट ऑप्शनमध्ये क्लिक केल्यानंतर ई-मेल कन्फर्म करा आणि आता तुम्ही दिलेल्या ई-मेल आयडीवर एक ओटीपी येईल.
• आता ओटीपी एंटर करा आणि व्हेरिफिकेशन पूर्ण झाल्यानंतर तुमचा ई-मेल आधारसोबत लिंक होणार आहे.

Free Fire Max: गेममध्ये Top-Up ईव्हेंट लाईव्ह! M1917 गोल किक गन स्किनसह मिळणार हे रिवॉर्ड्स…

कोणी करावं अपडेट?

ज्या यूजर्सनी अद्याप आधार कार्डमध्ये ई-मेल अपडेट केला नाही, त्यांनी त्वरित आधार कार्जमध्ये ई-मेल लिंक करणं गरजेचं आहे. तसेच, जर तुमचे आधार आधीच लिंक केलेले असेल आणि तुम्ही नवीन आयडी तयार केला असेल, तरीही तुम्ही तुमचा नवीन ई-मेल अपडेट करू शकता. यामुळे आधार ओटीपी पडताळणीची प्रक्रिया सुलभ होईल.