बुधवार, 11 नोव्हेंबर 2026
सौजन्य फोटो - सोशल मिडीया
Rohit Sharma: वेस्ट इंडिजविरुद्धच्या पहिल्या वनडेत भारताने आठ विकेट्सने विजय मिळवत तीन सामन्यांच्या मालिकेत १-० अशी आघाडी घेतली. सामन्यात रोहित शर्माने ३५ चेंडूंत ३२ धावांची आक्रमक खेळी करत शुभमन गिलसोबत पहिल्या विकेटसाठी ७४ धावांची भागीदारी केली. मात्र, सामन्यानंतर हॉटेलमध्ये पोहोचल्यावर रोहितसोबत घडलेल्या एका प्रसंगाचा व्हिडीओ सोशल मीडियावर चर्चेत आला आहे.
हॉटेलबाहेर चाहत्यांची गर्दी; बसमधून उतरताना रोहित घसरला
सामना संपल्यानंतर भारतीय संघ हॉटेलमध्ये परतला. हॉटेलबाहेर भारतीय खेळाडूंच्या स्वागतासाठी मोठ्या संख्येने चाहते उपस्थित होते. खेळाडू बसमधून खाली उतरत असताना रोहित शर्माचा पायऱ्यांवरून पाय घसरल्याचे व्हिडीओमध्ये दिसत असल्याचे सांगितले जात आहे. तो खाली पडताच जवळ असलेल्या पोलिस कर्मचाऱ्यांनी त्याला तत्काळ उठवले. या प्रसंगावेळी विराट कोहलीही जवळच होता आणि रोहितला पडताना पाहून त्याची प्रतिक्रिया लक्षवेधी ठरली. रोहित मात्र उठल्यानंतर हसताना दिसला.
Comedian Rohit Sharma 𝗦𝗹𝗶𝗽𝗽𝗲𝗱 from the Bus Rohit Sharma slipped badly on the team bus stairs while returning to the hotel after winning the first ODI against West Indies. pic.twitter.com/7HovBUpnaE — Gaurav (@Melbourne__82) September 28, 2026
मैदानावर रोहितची सुरुवात; कोहली-गिलची शतके
दरम्यान, सामन्यात रोहितने ३५ चेंडूंत ३२ धावा केल्या. त्याच्या खेळीत दोन चौकार आणि तीन षटकारांचा समावेश होता. रोहित बाद झाल्यानंतर शुभमन गिल आणि विराट कोहली यांनी डावाची सूत्रे हाती घेतली. दोघांनी दुसऱ्या विकेटसाठी १५१ धावांची भागीदारी केली. गिलने ११० धावांची खेळी केली, तर कोहलीने नाबाद १३९ धावा करत आपले ५५वे वनडे शतक झळकावले. कोहलीच्या या खेळीमुळे त्याने वनडेत १५ हजार धावांचा टप्पाही पार केला. भारताने ४१.४ षटकांत ३०० धावा करत सामना आठ विकेट्सने जिंकला.
