SCO 2026 : भारत-पाकिस्तान तणावादरम्यान नवी दिल्लीकडून पाकिस्तानला निमंत्रण; एससीओ परिषदेला हजार राहणार का शहबाज शरीफ?

SCO 2026 : भारताने या महिन्याच्या अखेरीस होणाऱ्या सभ्यता संवाद मंचात सहभागी होण्यासाठी पाकिस्तानचे सांस्कृतिक मंत्री औरंगजेब खान खिची यांना आमंत्रित केले आहे. वाचा याबाबत सविस्तर अपडेट.

• भारताचे पाकिस्तानला अधिकृत निमंत्रण
• पाकिस्तानकडून पडताळणी
• सहभागावर अनिश्चितता कायम

शांघाय सहकार्य संघटनेच्या (SCO 2026) व्यासपीठावरून भारत आणि पाकिस्तान यांच्यातील राजनैतिक घडामोडींना पुन्हा एकदा वेग आला आहे. भारताने या महिन्याच्या अखेरीस म्हणजेच २० ते २२ नोव्हेंबर दरम्यान नवी दिल्ली येथे होणाऱ्या SCO च्या ‘सभ्यता संवाद मंच’ (Civilizational Dialogue Forum) परिषदेसाठी पाकिस्तानला अधिकृत निमंत्रण पाठवले आहे. या बैठकीसाठी पाकिस्तानचे राष्ट्रीय वारसा आणि संस्कृती मंत्री औरंगजेब खान खिची यांना विशेष आमंत्रित करण्यात आले आहे. मात्र, या परिषदेत पाकिस्तानचा सहभाग असणार की नाही, यावर अद्याप अस्पष्टता असून इस्लामाबादमध्ये उच्चस्तरीय संस्थात्मक चर्चांनंतरच यावर शिक्कामोर्तब होणार असल्याचे समोर आले आहे.

 पाकिस्तान परराष्ट्र कार्यालयाकडून निमंत्रणाची पुष्टी

पाकिस्तानच्या परराष्ट्र कार्यालयाचे प्रवक्ते सज्जाद हैदर खान यांनी त्यांच्या नुकत्याच झालेल्या साप्ताहिक पत्रकार परिषदेत भारताकडून निमंत्रण मिळाल्याच्या वृत्ताला अधिकृत दुजोरा दिला आहे. ते म्हणाले की, “नवी दिल्लीत आयोजित कार्यक्रमासाठी भारताचे सांस्कृतिक मंत्रालय आणि परराष्ट्र मंत्रालय (MEA) यांच्या संयुक्त विद्यमाने पाठवलेले निमंत्रण आम्हाला प्राप्त झाले आहे. या परिषदेमध्ये पाकिस्तानचे प्रतिनिधित्व कोणी करावे किंवा प्रतिनिधीमंडळ पाठवावे की नाही, याचा निर्णय पंतप्रधान शहबाज शरीफ आणि देशातील विविध सुरक्षा व राजनैतिक संस्थांशी सखोल सल्लामसलत केल्यानंतरच घेतला जाईल.”

पुराणा किला येथील ऐतिहासिक कार्यक्रमात SCO सदस्यांचा सहभाग

प्रस्थापित बहुपक्षीय परंपरेनुसार भारताने २८ ऑक्टोबर रोजी SCO च्या सर्व सदस्य देशांना या सांस्कृतिक मंचाचे निमंत्रण धाडले होते. नवी दिल्लीतील ऐतिहासिक ‘पुराणा किला’ परिसरात हा भव्य कार्यक्रम पार पडणार आहे. शांघाय सहकार्य संघटना (SCO) या प्रादेशिक गटामध्ये भारत, चीन, रशिया, पाकिस्तान, कझाकस्तान, किर्गिझस्तान, ताजिकिस्तान, उझबेकिस्तान, इराण आणि बेलारूस या आंतर-सरकारी देशांचा समावेश आहे. प्रादेशिक संस्कृती आणि ऐतिहासिक बंध अधिक बळकट करणे हा या मंचाचा मुख्य उद्देश आहे.

जागतिक घडामोडी संबंधित बातम्या वाचण्यासाठी येथे क्लिक करा : White House : कोण आहेत स्टीफन मिलर? निवडणूक हरल्यानंतर ट्रम्प यांनी का बनवले व्हाईट हाऊसचे चीफ ऑफ स्टाफ

 सीमापार तणाव आणि मुत्सद्देगिरीचे नवे आव्हान

दोन्ही देशांमधील राजनैतिक आणि लष्करी संबंध प्रचंड तणावपूर्ण असताना भारताने हे निमंत्रण दिले आहे. मे २०२५ मध्ये झालेल्या दोन्ही देशांतील लष्करी संघर्षानंतर पाकिस्तानच्या एखाद्या उच्चपदस्थ मंत्र्याला भारतामध्ये आमंत्रित करण्याची ही पहिलीच वेळ मानली जात आहे. २२ एप्रिल २०२५ रोजी पहलगाम येथे झालेल्या भीषण दहशतवादी हल्ल्यात २६ निरपराध नागरिक ठार झाले होते, ज्याचे मूळ पाकिस्तानपुरस्कृत दहशतवादात आढळले होते. या हल्ल्याला चोख प्रत्युत्तर म्हणून भारताने ७ मे रोजी पाकिस्तान आणि पाकव्याप्त काश्मीरमधील दहशतवादी तळांवर लक्ष्यित ‘ऑपरेशन सिंदूर’ सुरू केले होते.

चार दिवस चाललेला हा लष्करी संघर्ष १० मे रोजी दोन्ही देशांच्या डायरेक्टर जनरल ऑफ मिलिटरी ऑपरेशन्स (DGMO) यांच्यातील कराराने संपुष्टात आला. भारताने SCO च्या प्रत्येक बैठकीत सीमापार दहशतवाद आणि दहशतवादाला मिळणारा आर्थिक पुरवठा याविरोधात आक्रमक भूमिका घेतली आहे. दुटप्पीपणा न बाळगता दहशतवादाविरुद्ध सर्व देशांनी कठोर भूमिका घेतली पाहिजे, असा भारताचा स्पष्ट दृष्टिकोन राहिला आहे.

जागतिक घडामोडी संबंधित बातम्या वाचण्यासाठी येथे क्लिक करा : NASA : नासाचा ऐतिहासिक पराक्रम! व्हॉयेजर 1 अंतराळयान गाठणार ‘वन-लाइट-डे’ अंतर; पृथ्वीपासून होणार अथांग दूर

 शहबाज शरीफ सरकारच्या निर्णयाकडे आंतरराष्ट्रीय समुदायाचे लक्ष

पाकिस्तानचे मंत्री औरंगजेब खान खिची या परिषदेला उपस्थित राहणार की नाही, याकडे आता संपूर्ण आशियाई राजकारणाचे लक्ष लागले आहे. जर पाकिस्तानने आपल्या मंत्र्याला भारतात पाठवण्याचा निर्णय घेतला, तर दोन्ही देशांमधील तुटलेल्या संवादाच्या साखळीत एक नवी दारे उघडू शकतात. परंतु, देशांतर्गत राजकीय दबाव आणि लष्करी संस्थांचे मत विचारात घेता शहबाज सरकार यावर काय भूमिका घेते, हे पाहणे महत्त्वाचे ठरेल.