International News :‘सेव्ह अमेरिका ॲक्ट’च्या समर्थनार्थ ट्रम्प यांनी भारताच्या मतदार ओळखपत्रांचा दाखला दिला

International News : अमेरिकेचे राष्ट्राध्यक्ष डोनाल्ड ट्रम्प यांनी ‘SAVE America Act’च्या समर्थनार्थ भारताच्या मतदार ओळख प्रणालीचा दाखला दिला. भारतातील लोकसभा निवडणुकीतील मोठ्या मतदानाचा उल्लेख करत त्यांनी अमेरिकेतही फोटो ओळखपत्र आणि नागरिकत्वाच्या पुराव्याची कठोर आवश्यकता असावी, असा आग्रह धरला आहे.

• भारताच्या निवडणूक व्यवस्थेचा ट्रम्प यांनी दिला दाखला
• ‘SAVE America Act’मध्ये काय आहे?
• अमेरिकेत विधेयकावरून राजकीय मतभेद

International News : अमेरिकेचे राष्ट्राध्यक्ष डोनाल्ड ट्रम्प यांनी अमेरिकेतील निवडणूक प्रक्रियेत कडक मतदार ओळख नियम लागू करण्याच्या मागणीला पुन्हा जोर दिला आहे. यासाठी त्यांनी भारताच्या निवडणूक व्यवस्थेचा दाखला देत ‘SAVE America Act’ मंजूर करण्याचे आवाहन केले. भारतात मोठ्या संख्येने मतदान होत असतानाही मतदारांच्या ओळखपत्राची पडताळणी केली जाते, असा मुद्दा ट्रम्प यांनी मांडला.

भारताच्या निवडणूक व्यवस्थेचा ट्रम्प यांनी दिला दाखला

ट्रम्प यांनी ‘Truth Social’वरील पोस्टमध्ये भारताचे मुख्य निवडणूक आयुक्त ज्ञानेश कुमार यांच्यासोबत झालेल्या चर्चेचा उल्लेख केला. अमेरिकेत वैध फोटो ओळखपत्राशिवाय निवडणुका कशा घेतल्या जातात, असा प्रश्न ज्ञानेश कुमार यांनी अमेरिकन प्रशासनासमोर उपस्थित केल्याचा दावा ट्रम्प यांनी केला.

भारताच्या मागील लोकसभा निवडणुकीत सुमारे ६४.६ कोटी मतदारांनी मतदान केले, असा उल्लेखही ट्रम्प यांनी केला. यातील एक टक्क्यापेक्षाही कमी मतदान पोस्टल बॅलेटद्वारे झाल्याचे त्यांनी सांगितले. भारतातील प्रत्येक मतदाराकडे वैध फोटो ओळखपत्र असते, असा दावा करत ट्रम्प यांनी अमेरिकेनेही अशाच प्रकारची व्यवस्था स्वीकारण्याची गरज असल्याचे म्हटले.

Breaking News : सेउटामध्ये स्थलांतरित महिलांवर लैंगिक छळाचे आरोप; सुरक्षेचा प्रश्न गंभीर

‘SAVE America Act’मध्ये काय आहे?

Safeguard American Voter Eligibility Act, म्हणजेच ‘SAVE America Act’, हा अमेरिकेतील प्रस्तावित निवडणूक कायदा आहे. या कायद्यानुसार फेडरल निवडणुकांमध्ये मतदार म्हणून नोंदणी करण्यासाठी अमेरिकन नागरिकत्वाचा कागदोपत्री पुरावा सादर करण्याची तरतूद आहे. त्यासोबतच देशभरात मतदार ओळखपत्राची आवश्यकता लागू करण्याचा प्रस्ताव आहे.

मतदार नोंदणी आणि मतदान प्रक्रियेत अधिक कठोर पडताळणी करून निवडणुकीतील गैरप्रकार रोखणे हा या विधेयकाचा उद्देश असल्याचे ट्रम्प आणि त्यांचे समर्थक सांगतात. पोस्टल मतदानावरही काही अतिरिक्त निर्बंध आणण्याची तरतूद या प्रस्तावात आहे.

India USA Relation : भारत-अमेरिकेने मतभेद दूर करावेत;अंदाज बांधता येणाऱ्या करप्रणालीवर भर द्या : राजदूत गोर

अमेरिकेत विधेयकावरून राजकीय मतभेद

‘SAVE America Act’ला अमेरिकेत राजकीय विरोधही होत आहे. डेमोक्रॅटिक पक्षातील नेते आणि विधेयकाचे विरोधक यामुळे काही पात्र नागरिकांना मतदान करणे कठीण होऊ शकते, असा दावा करतात. विशेषतः पासपोर्ट, जन्म दाखला किंवा नागरिकत्व सिद्ध करणारी इतर कागदपत्रे सहज उपलब्ध नसलेल्या नागरिकांवर या नियमांचा परिणाम होण्याची शक्यता असल्याचे विरोधकांचे म्हणणे आहे.

विधेयकाला रिपब्लिकन पक्षातील काही नेत्यांचा पाठिंबा असला तरी त्याच्या पुढील वाटचालीवर अद्याप राजकीय मतभेद आहेत. त्यामुळे ट्रम्प यांनी भारताच्या निवडणूक व्यवस्थेचा दाखला देत या विधेयकाला पुन्हा जोरदार पाठिंबा दिल्याने अमेरिकेतील निवडणूक सुधारणांच्या चर्चेला आणखी वेग आला आहे.