बुधवार, 19 ऑगस्ट 2026
इस्रायलने सीरियाच्या अबू अल-दुहुर हवाई तळावर ८ मोठे हवाई हल्ले केले, ज्यावर अमेरिकेने तीव्र आक्षेप घेतला आहे ( फोटो सौजन्य : सोशल मीडिया )
मध्य-पूर्वेतील (Middle East) भू-राजकीय घडामोडींना पुन्हा एकदा अत्यंत नाट्यमय व गंभीर वळण मिळाले आहे. इस्रायली हवाई दलाने (IAF) उत्तर सीरियातील इदलिब प्रांतात असलेल्या ऐतिहासिक आणि रणनीतिकदृष्ट्या महत्त्वाच्या ‘अबू अल-दुहुर’ (Abu al-Duhur) लष्करी हवाई तळावर आठ एकापाठोपाठ एक भीषण हवाई हल्ले केले आहेत. या अचानक झालेल्या लष्करी कारवाईमुळे संपूर्ण क्षेत्रात खळबळ उडाली असून, इस्रायल आणि सीरियामधील तणाव शिखराला पोहोचला आहे. मात्र, या घटनेतील सर्वात मोठा आणि धक्कादायक टप्पा म्हणजे इस्रायलचा सर्वात जवळचा आंतरराष्ट्रीय मित्र मानल्या जाणाऱ्या अमेरिकेनेच या हल्ल्याचा अत्यंत कठोर शब्दांत निषेध केला आहे.
सीरियातील स्थानिक माध्यमांनी दिलेल्या माहितीनुसार, या हवाई हल्ल्यांमध्ये कोणत्याही जीवितहानीची नोंद झाली नसली, तरी हवाई तळाच्या मुख्य धावपट्टीचे (Runway) आणि अतिसंरक्षित मानल्या जाणाऱ्या लष्करी साठवणूक सुविधांचे प्रचंड नुकसान झाले आहे. सीरियामध्ये नवीन प्रशासनाचे आगमन झाल्यानंतर आणि देशात स्थैर्य प्रस्थापित होत असताना इस्रायलने केलेला हा आजवरचा सर्वात मोठा आणि थेट हल्ला मानला जात आहे. या हल्ल्यामागे तुर्की आणि सीरियाच्या वाढत्या लष्करी सहकार्याची भीती इस्रायलला असल्याचे बोलले जात आहे, ज्यावरून हे बॉम्बफेक सत्र घडवून आणल्याचा दावा करण्यात येत आहे.
जागतिक घडामोडी संबंधित बातम्या वाचण्यासाठी येथे क्लिक करा : Iran-US war: दुबई, केशम अन् इराणी बेट अमेरिकेच्या हद्दीत? Trumpच्या दाव्याने मित्रराष्ट्रही चक्रावले; इराणने केली ट्विटरवर फजिती
हल्ल्याच्या काही तासांतच सीरिया आणि इराकसाठी अमेरिकेचे विशेष दूत आणि राजदूत टॉम बॅराक (Tom Barrack) यांनी ‘एक्स’ (पूर्वीचे ट्विटर) या सोशल मीडिया प्लॅटफॉर्मवर एक अधिकृत निवेदन जारी केले. त्यांनी या इस्रायली लष्करी कारवाईला “पूर्णपणे अनावश्यक आणि प्रादेशिक स्थैर्याला धक्का देणारी पायरी” (Unnecessary Escalation) असे संबोधले आहे. अमेरिकन प्रशासनाने उघडपणे इस्रायलच्या या कृतीवर नाराजी व्यक्त केल्यामुळे आंतरराष्ट्रीय वर्तुळात मोठी चर्चा सुरू झाली आहे.
🇮🇱⚔️🇸🇾🇹🇷 Israel has confirmed it carried out overnight airstrikes on Syria’s Abu al-Duhur airbase, saying the target was a planned Turkish military deployment. Prime Minister Benjamin Netanyahu’s office said Israel and Syria had agreed to a security status quo that Damascus was… pic.twitter.com/pFbLULAAmc — 🔥🗞The Informant (@theinformant_x) August 18, 2026
credit – social media and Twitter
टॉम बॅराक यांनी सीरियातील नव्या ‘अहमद अल-शर्रा’ (Ahmad al-Sharaa) प्रशासनाचा राजनैतिक बचाव करताना स्पष्ट केले की, सध्याच्या सीरियन सरकारने इस्रायलविरुद्ध कोणतीही आक्रमक भूमिका घेतलेली नाही किंवा कोणत्याही छुप्या सैन्याला/दहशतवादी संघटनांना प्रोत्साहन दिलेले नाही. उलटपक्षी, सीरियाने इस्रायलसोबत शांतता राखण्यासाठी वारंवार संयम दाखवला आहे. अशा स्थितीत इस्रायलने कोणताही ठोस पुरावा नसताना थेट लष्करी तळ उद्ध्वस्त करणे अत्यंत चुकीचे असल्याचे अमेरिकेने नमूद केले.
जागतिक घडामोडी संबंधित बातम्या वाचण्यासाठी येथे क्लिक करा : Kuril Islands : ‘हे जपानला अजिबात मान्य नाही!’ पंतप्रधान सनाए ताकाइची पुतिन यांच्या भेटीवर भडकल्या; रशियाचाही जोरदार पलटवार
अमेरिकन प्रशासनाने ठाम मत मांडले आहे की, लष्करी ताकदीचा वापर करून तणाव कमी करण्याऐवजी दोन्ही देशांनी शांततापूर्ण राजनैतिक संवादाचा मार्ग स्वीकारला पाहिजे. अमेरिका दोन्ही देशांमधील कटू वाद सोडवण्यासाठी मध्यस्थी करण्यास आणि उच्चस्तरीय बैठका आयोजित करण्यास सदैव तयार आहे, असेही बॅराक यांनी स्पष्ट केले.
दरम्यान, आंतरराष्ट्रीय राजनैतिक सूत्रांकडून मिळणाऱ्या माहितीनुसार, इराणच्या वाढत्या प्रभावावरून आणि सीरियातील लष्करी धोरणांवरून इस्रायलचे पंतप्रधान बेंजामिन नेतान्याहू आणि अमेरिकेचे अध्यक्ष डोनाल्ड ट्रम्प यांच्यातही मतभेद निर्माण झाले आहेत. इस्रायलच्या या आक्रमक धोरणामुळे अमेरिकेच्या मध्य-पूर्वेतील शांतता प्रयत्नांना खिळ बसत असल्याचे ट्रम्प प्रशासनाचे मानणे आहे. सीरियातील परिस्थिती नियंत्रणात आणण्यासाठी आंतरराष्ट्रीय समुदाय आता संयुक्त राष्ट्रसंघाच्या (UN) हस्तक्षेप कडे डोळे लावून बसला आहे.
