गुरुवार, 17 सप्टेंबर 2026
Makkah Drone Attack: मक्काजवळ ड्रोन हल्ला उधळला: भारताने व्यक्त केली चिंता; सौदीचा हुथी बंडखोरांना 'रेड लाईन'चा कडक इशारा ( फोटो सौजन्य : सोशल मीडिया )
मध्य पूर्वेतील (Middle East) वाढत्या लष्करी संघर्षाच्या पार्श्वभूमीवर, मुस्लिम जगतातील सर्वात पवित्र मानल्या जाणाऱ्या सौदी अरेबियातील मक्का (Makkah Drone Attack ) शहराच्या सुरक्षेवर गंभीर प्रश्न निर्माण करणारी घटना घडली आहे. बुधवारी पहाटे मक्काच्या प्रतिबंधित हवाई क्षेत्रात घुसखोरी करण्याचा प्रयत्न करणारे एक संशयास्पद लढाऊ ड्रोन सौदी अरेबियाच्या हवाई संरक्षण यंत्रणेने (Air Defence System) अत्यंत सतर्कता दाखवत हवेतच नष्ट केले. या घटनेनंतर संपूर्ण मध्य पूर्व प्रदेशात खळबळ उडाली असून भारत सरकारनेही यावर आपली अधिकृत आणि अत्यंत कडक प्रतिक्रिया नोंदवली आहे.
भारताच्या परराष्ट्र मंत्रालयाने (MEA) एका अधिकृत निवेदनाद्वारे या हल्ल्याचा तीव्र शब्दांत निषेध केला आहे. परराष्ट्र मंत्रालयाने स्पष्ट केले की, निष्पाप नागरिक, धार्मिक स्थळे किंवा पायाभूत सुविधांना हानी पोहोचवणारी कोणतीही हिंसक कृती अजिबात स्वीकारार्ह नाही. मक्का हे जगभरातील कोट्यवधी मुस्लिमांचे श्रद्धास्थान असल्याने या क्षेत्रातील कोणतीही लष्करी हालचाल अत्यंत संवेदनशील मानली जाते. भारताने सौदी अरेबियाच्या प्रादेशिक अखंडतेचे आणि सार्वभौमत्वाचे समर्थन करत, सर्व पक्षांना राजनैतिक मार्ग आणि संयमाचा वापर करून मध्य पूर्वेत शांतता प्रस्थापित करण्याचे आवाहन केले आहे.
जागतिक घडामोडी संबंधित बातम्या वाचण्यासाठी येथे क्लिक करा : XiJinping Health: 7 वर्षांनंतर भारत दौरा अन् अचानक बिघडली तब्येत; चिनी राष्ट्राध्यक्ष शी जिनपिंग यांच्या प्रकृतीबाबत चर्चांना उधाण
सौदीच्या नेतृत्वाखालील लष्करी आघाडीचे प्रवक्ते तुर्की अल-मलिकी यांनी या घटनेवर संताप व्यक्त करत याला एक भ्याड आणि घृणास्पद दहशतवादी कृत्य ठरवले आहे. अल-मलिकी यांनी स्पष्ट शब्दांत बजावले आहे की, सौदी अरेबियाच्या सीमा, पवित्र मशिदी (मशीद अल-हराम) आणि तिथे येणाऱ्या लाखो यात्रेकरूंची सुरक्षा ही देशासाठी अत्यंत महत्त्वाची ‘रेड लाईन’ (अतिक्रमणीय मर्यादा) आहे. या मुद्द्यावर सौदी अरेबिया कोणतीही तडजोड करणार नाही आणि आपल्या सुरक्षेला धोका निर्माण करणाऱ्या शक्तींना सडेतोड उत्तर दिले जाईल.
Our response to media queries regarding the drone attack near Makkah ⬇️ 🔗 https://t.co/l3qVpApFa3 pic.twitter.com/2bXH7fzijo — Randhir Jaiswal (@MEAIndia) September 16, 2026
credit – social media and Twitter
हा सर्व तणाव येमेनमधील हुथी (Houthi) बंडखोर आणि सौदी सैन्यादरम्यान सुरू असलेल्या जुन्या संघर्षाचाच एक भाग मानला जात आहे. मक्काजवळील या घटनेनंतर परिस्थिती आणखी चिघळली आहे. आंतरराष्ट्रीय वृत्तसंस्था ‘अल जझीरा’ने दिलेल्या वृत्तानुसार, हुथी लष्करी प्रवक्ते याह्या सारी यांनी दावा केला आहे की, त्यांच्या सैन्याने येमेनच्या मारिब प्रांतात गस्त घालणाऱ्या सौदी अरेबियाच्या एका एफ-१५ (F-15) लढाऊ विमानाला जमिनीवरून हवेत मारा करणाऱ्या क्षेपणास्त्राने पाडले आहे. तथापि, या दाव्याला सौदी लष्करी अधिकाऱ्यांनी अधिकृतपणे अद्याप दुजोरा दिलेला नाही.
जागतिक घडामोडी संबंधित बातम्या वाचण्यासाठी येथे क्लिक करा : Mecca Attack : सर्वात पवित्र मुस्लिम शहरावर ड्रोन हल्ला; मक्कामध्ये प्रथमच वाजली धोक्याची घंटा, 500हून अधिक जण दगावण्याची शक्यता
मक्का शहराच्या अत्यंत जवळ घडलेल्या या ड्रोन घटनेमुळे केवळ सौदी अरेबियाच नव्हे, तर संपूर्ण मुस्लिम जगतात आणि आंतरराष्ट्रीय समुदायात चिंतेचे वातावरण पसरले आहे. सौदी अरेबियात दरवर्षी जगभरातून लाखो भाविक हज आणि उमराहसाठी मक्का येथे येतात. त्यामुळे या धार्मिक केंद्राजवळील कोणतीही लष्करी हालचाल किंवा ड्रोन उधळण्याची घटना आंतरराष्ट्रीय सुरक्षेच्या दृष्टीने अत्यंत गंभीर मानली जाते.
भारत आणि सौदी अरेबिया यांच्यातील राजनैतिक संबंध अधिक दृढ असल्याने भारताने तातडीने या घटनेवर भूमिका मांडली आहे. प्रादेशिक स्थैर्य टिकवून ठेवण्यासाठी आणि धार्मिक स्थळांचे संरक्षण करण्यासाठी आंतरराष्ट्रीय स्तरावर तातडीने संवाद सुरू करण्याची गरज असल्याचे तज्ज्ञांचे मत आहे.
