US Iran War : अमेरिकेचा इराणच्या छाताडावर वार! एका रात्रीत मुख्य लष्करी तळ उडवल्याचा ट्रम्प यांचा दावा

US Attack On Iran : अमेरिका-इराण संघर्षाला दोन आठवडे उलटून गेले आहेत. तरीही युद्ध थांबण्याचे नाव घेईना. अमेरिकेने पुन्हा एकदा इराणवर जोरदार प्रहार केला आहे. अमेरिकन सैन्याने इराणचे मुख्य लष्करी तळ नष्ट केले आहे.

• तिसऱ्या आठवड्यातही अमेरिका-इराण संघर्ष सुरु
• इराणच्या महत्त्वपूर्ण लष्करी तळावर हल्ला केल्याचा ट्रम्प यांचा दावा
• इराण काय करणार आता?

US Attack on Iran : वॉशिंग्टन/तेहरान : मध्यपूर्वेतील तणावाला आता दोन आठवडे उलटून गेले आहेत. मात्र अमेरिका-इराण संघर्ष (US Iran War) काही थांबण्याचे नाव घेईना. नुकतेच अमेरिकेचे राष्ट्राध्यक्ष डोनाल्ड ट्रम्प (Donald Trump) यांनी एक खळबळजनक दावा केला आहे. त्यांनी इराणची कमकुवत नस दाबल्याचे म्हटले आहे. ट्रम्प यांनी दावा केला आहे की, इराणच्या धोरणात्मकदृष्ट्या अत्यंत महत्त्वाच्या खर्ग बेटावरील लष्करी तळ उद्ध्वस्त केला आहे. यामुळे जगभरात खळबळ उडाली असून आखाती क्षेत्रात युद्धाचे ढग आणखी गडद झाले आहे. जागतिक तेल पुरवठ्यावरही मोठे संकट निर्माण होण्याची शक्यता आहे.

Strait of Hormuz: भारतासाठी मोठी बातमी! होर्मुजच्या सामुद्रधुनीतून भारतीय जहाजांना ‘ग्रीन सिग्नल’; युद्धातही इराणने जपली मैत्री

इराणच्या छाताडावर वार

ट्रम्प यांनी त्यांच्या ट्रुथ सोशल मीडिया प्लॅटफॉर्मवरुन या हल्ल्याची माहिती दिली. त्यांनी या मोहिमेचे वर्णन मध्यपूर्वेच्या इतिहासातील सर्वात शक्तीशाली आणि विनाशकारी लष्कर मोहिम असे केले आहे. त्यांच्या मते, इराणची लष्करी ताकद अमेरिकेने मोडित काढली आहे. इराणच्या नौदल शक्तीला सुरुंग लावण्याचा त्यांचा हेतू होता असे ट्रम्प यांनी म्हटले आहे.

खर्ग बेटा का आहे महत्त्वाचे

खर्ग बेट पर्शियन गल्फमध्ये इराणच्या किनाऱ्यापासून ३३ किमी अंतरावर स्थित आहे. हे बेट इराण (Iran) च्या अर्थव्यवस्थेचा कणा मानले जाते. कारण या बेटावरुनच इराणच्या ९०% कच्चा तेलाचा उत्पादन जागतिक बाजारपेठेत निर्यात केले जाते. दररोज सुमारे ७० लाख बॅरल तेल येथून जहाजांमध्ये भरले जाते. तज्ज्ञांच्या मते, या केंद्रावर हल्ला इराणची आर्थिक कणा मोडण्यासाठी पुरेशी आहे.

सध्या अमेरिकेने या बेटावरील केवळ लष्करी तळांना उद्ध्वस्त केले असल्याचे ट्रम्प यांनी म्हटले आहे. अमेरिकेचा हेतू तेल टर्मिनल आणि पाइपलाइन ताब्यात घेण्याचा असून सध्या त्यांनी संयम बाळगला असल्याचे ट्रम्प यांनी म्हटले. ट्रम्प यांनी इराणने प्रत्युत्तर देण्याचा प्रयत्न केला तर त्यांचे तेल साठेही सुरक्षित राहणार नाहीत हेही स्पष्ट केले आहे.

होर्मुझची सामुद्रधुनी

हा हल्ला अशा वेळी झाला आहे, जेव्हा इराणने आक्रमक होऊन होर्मुझ सामुद्रधुनी बंद केली आहे. यामुळे अनेक तेलाचे जहाज समुद्रात अडकून पडले आहे. तज्ज्ञांच्या मते, अमेरिकेने इराणच्या अर्थव्यवस्थेवर वार केला आहे. ज्यामुळे इराण होर्मुझची पकड अधिक मजबूत करण्याची शक्यता आहे. हा मार्ग बंद झाल्यास जागतिक तेल बाजारात मोठा उर्जा संकट उभे राहून इंधनाचे दर गगनाला भिडतील.

Strait of Hormuz Tension : आखातात 23000 भारतीय खलाशी, होमुर्जच्या सामुद्रधुनीत 24 जहाजे, केंद्राने परिस्थितीचा दिला आढावा