ड्युरंड रेषेवर युद्धजन्यस्थिती; तोरखाम सीमेवर चकमकीनंतर पाक आणि अफगाण सैन्यामध्ये जोरदार गोळीबार

तोरखाम सीमेजवळ तालिबानने लष्करी चौकी बांधण्यास पाकिस्तानने विरोध केला होता. त्यानंतर गेल्या 36 तासांपासून दोन्ही देशांच्या लष्करामध्ये जोरदार गोळीबार सुरू आहे.

ड्युरंड रेषेवर युद्धजन्यस्थिती; तोरखाम सीमेवर चकमकीनंतर पाक आणि अफगाण सैन्यामध्ये जोरदार गोळीबार ( फोटो सौजन्य : सोशल मीडिया)

Follow Us:

Follow Us:

इस्लामाबाद/काबूल : अफगाणिस्तान आणि पाकिस्तान यांच्यातील तणाव दिवसेंदिवस वाढत चालला असून, तोरखाम सीमेजवळ गेल्या ३६ तासांपासून दोन्ही देशांच्या सैन्यामध्ये जोरदार गोळीबार सुरू आहे. तालिबानने तोरखाम सीमेजवळ लष्करी चौकी बांधण्यास घेतलेल्या पुढाकाराला पाकिस्तानने तीव्र विरोध दर्शवला. यानंतर संघर्ष अधिक तीव्र होत गेला आणि परिस्थिती युद्धसदृश बनली आहे. या तणावामुळे तोरखाम सीमा पूर्णतः बंद करण्यात आली असून, व्यापार आणि वाहतूक व्यवस्था कोलमडली आहे.

ड्युरंड लाईनवर संघर्ष वाढला, दोन्ही देशांच्या सैन्यांची अतिरिक्त तुकडी तैनात

पाकिस्तानी माध्यमांनुसार, ड्युरंड लाईन परिसरात युद्धसदृश स्थिती निर्माण झाली आहे. तालिबानने सीमेवर आपली पकड मजबूत करण्यासाठी नवीन लष्करी चौकी उभारण्याचा प्रयत्न केला. पाकिस्तानने हा प्रयत्न उधळून लावला, परिणामी दोन्ही देशांच्या लष्करामध्ये गोळीबार सुरू झाला.

संघर्ष वाढत असल्याने तालिबान आणि पाकिस्तानी लष्कराने अतिरिक्त सैन्य तैनात केले आहे. दोन्ही बाजूंनी लष्करी उपस्थिती वाढवल्याने हा संघर्ष आणखी तीव्र होण्याची शक्यता आहे. अद्याप या तणावावर तोडगा काढण्यासाठी कोणतीही बैठक झालेली नाही, त्यामुळे परिस्थिती अधिक चिघळण्याची भीती व्यक्त केली जात आहे.

जागतिक घडामोडी संबंधित बातम्या वाचण्यासाठी येथे क्लिक करा : पाकिस्तानचा घाणेरडा खेळ सुरू! चिकन नेकजवळ मिळाले रहस्यमई सिग्नल, ISIचा पर्दाफाश

व्यापार ठप्प, तोरखाम सीमेजवळ हजारो ट्रक अडकले

तोरखाम हा पाकिस्तान आणि अफगाणिस्तान यांच्यातील सर्वात महत्त्वाचा व्यापार मार्ग आहे. ही सीमा पाकिस्तानच्या खैबर पख्तूनख्वा प्रांताला अफगाणिस्तानच्या नांगरहार प्रांताशी जोडते. मात्र, चालू संघर्षामुळे सीमा पूर्णतः बंद करण्यात आली आहे, त्यामुळे दोन्ही देशांतील व्यापारी अडचणीत सापडले आहेत.

सीमेच्या दोन्ही बाजूंना हजारो मालवाहू ट्रक अडकले असून, मोठ्या प्रमाणावर आर्थिक तोटा होत आहे. व्यापाऱ्यांसाठी हा तणाव धोकादायक ठरत आहे, कारण या मार्गावरून अन्नधान्य, औषधे आणि जीवनावश्यक वस्तूंची देवाणघेवाण केली जाते. याशिवाय, सर्वसामान्य नागरिकांची वाहतूकही ठप्प झाली असून, परिस्थिती अधिकच बिकट होत आहे.

तालिबान आणि पाकिस्तान सैन्य उच्च सतर्कतेवर

तुर्की वृत्तसंस्था अनादोलूच्या अहवालानुसार, शनिवारी (२२ फेब्रुवारी) तालिबानने तोरखाम सीमेजवळ नवीन लष्करी चौकी उभारण्याचा प्रयत्न केला. पाकिस्तानने याला तीव्र विरोध करताच संघर्ष सुरू झाला आणि तणाव विकोपाला गेला. गोळीबारात दोन्ही बाजूंचे सैनिक आणि नागरिक जखमी झाल्याचे वृत्त आहे. सोमवार (२४ फेब्रुवारी) सकाळपर्यंतही सीमा उघडण्याबाबत कोणतीही चर्चा झालेली नाही. परिस्थिती अधिक चिघळू नये म्हणून सीमेलगतच्या भागात दोन्ही देशांच्या सैन्याने सतर्कतेचे आदेश दिले आहेत.

तोरखाम सीमावादाचा ऐतिहासिक पार्श्वभूमीवर आढावा

पाकिस्तान आणि अफगाणिस्तान यांच्यातील तोरखाम सीमावाद काही नवीन नाही. हा संघर्ष ड्युरंड लाईनवरून गेल्या अनेक दशकांपासून सुरू आहे. पाकिस्तान हा भाग स्वतःच्या नियंत्रणाखाली ठेवण्याचा प्रयत्न करत असतो, तर तालिबान आणि अफगाण नेत्यांचा दावा आहे की हा भाग अफगाणिस्तानचाच आहे. या सीमेवरील संघर्ष अनेकदा हिंसक रूप घेतो आणि सीमा सतत बंद करण्याच्या घटना घडतात. यामुळे केवळ सुरक्षा धोक्यात येत नाही तर दोन्ही देशांच्या व्यापारावरही विपरीत परिणाम होतो.

जागतिक घडामोडी संबंधित बातम्या वाचण्यासाठी येथे क्लिक करा : Viral Video: खाली हिजबुल्ला प्रमुख हसन नसराल्लाहची अंत्ययात्रा, वर इस्त्रायली फायटर जेटची सिंहगर्जना

तणावाचा भविष्यातील परिणाम

पाकिस्तान आणि अफगाणिस्तान यांच्यातील हा तणाव भविष्यात अधिक गंभीर होऊ शकतो. दोन्ही बाजूंकडून शस्त्रसज्जता वाढत असून, हा संघर्ष केवळ स्थानिक पातळीवर मर्यादित राहील की संपूर्ण प्रदेशाला आपल्या कवेत घेईल, याकडे संपूर्ण जगाचे लक्ष लागले आहे. जर लवकरच शांततापूर्ण तोडगा निघाला नाही, तर हा संघर्ष अधिक रक्तरंजित होण्याची शक्यता नाकारता येत नाही.

Web Title: Pakistani and afghan forces engage in heavy fire at torkham border on durand line nrhp

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com