राजकारण्यांचे दहशतवाद्यांशी संबंध; पाकिस्तानची कबुली

अनेकदा दहशतवाद्यांना आश्रय देण्याच्या प्रश्नावर भारतालाच प्रत्युत्तर देणारा पाकिस्तान तोंडघशी पडला आहे. ब्रिटन आणि अन्य देशांमध्ये आश्रय मागणाऱ्या काही असंतुष्ट राजकीय नेत्यांचे दहशतवादी संघटनांशी संबंध असल्याची कबुली पाकिस्तानने अधिकृतरित्या दिली आहे.

    इस्लामाबाद : अनेकदा दहशतवाद्यांना आश्रय देण्याच्या प्रश्नावर भारतालाच प्रत्युत्तर देणारा पाकिस्तान तोंडघशी पडला आहे. ब्रिटन आणि अन्य देशांमध्ये आश्रय मागणाऱ्या काही असंतुष्ट राजकीय नेत्यांचे दहशतवादी संघटनांशी संबंध असल्याची कबुली पाकिस्तानने अधिकृतरित्या दिली आहे. पाकिस्तानच्या परराष्ट्र कार्यालयाच्या प्रवक्त्या मुमताज जेहरा बलोच यांनी पत्रपरिषदेत याबाबत कबुली दिली.

    तुरुंगात डांबलेले पंतप्रधान इम्रान खान यांच्या सहाय्यकावर झालेल्या कथित अॅसिड हल्ल्याच्या प्रश्नावर त्या उत्तर देत होत्या. पाकिस्तान तहरीक-ए-इन्साफचे नेते आणि पंतप्रधानांचे माजी विशेष सहाय्यक मिर्झा शहजाद अकबर यांनी गेल्या आठवड्यात दावा केला होता की, ब्रिटनमध्ये त्यांच्या घरावर हल्ला करण्यात आला होता. हल्लेखोरांनी घरावर अॅसिड फेकले होते.

    याबाबत विचारलेल्या प्रश्नाला उत्तर देताना परराष्ट्र कार्यालयाच्या प्रवक्त्या मुमताज जेहरा बलोच म्हणाल्या की, अशा प्रकारच्या हल्ल्यात पाकिस्तानचा आणि पाकिस्तानी एजन्सीच्या सहभाग नाही. परदेशात आमच्या स्वतःच्या नागरिकांना लक्ष्य करण्याचे आमचे धोरण नाही. तथापि, अनेक राजकीय असंतुष्टांनी राजकीय आश्रय घेतला आहे. ते अनेक दशकांपासून ब्रिटन आणि जगभरातील इतर देशांमध्ये राहत आहेत. त्यांच्यापैकी अनेकांचे पाकिस्तानमधील दहशतवादी संघटनांशी संबंध आहेत, असे बलोच म्हणाल्या.