जगातील सर्वात मोठी इमारत बांधत आहे सौदी अरेबिया; क्राऊन प्रिन्सच्या ‘मुकाब’ योजनेमुळे गोंधळ

सौदी अरेबिया आपल्या महत्त्वाकांक्षी व्हिजन 2030 अंतर्गत जगातील सर्वात मोठ्या वास्तूंपैकी एक ‘मुकाब’ (The Mukaab) ही भव्य इमारत उभारण्याच्या तयारीत आहे.

रियाध – सौदी अरेबिया आपल्या महत्त्वाकांक्षी व्हिजन 2030 अंतर्गत जगातील सर्वात मोठ्या वास्तूंपैकी एक ‘मुकाब’ (The Mukaab) ही भव्य इमारत उभारण्याच्या तयारीत आहे. राजधानी रियाधमध्ये बांधली जाणारी ही 400 मीटर उंच, 400 मीटर रुंद आणि 400 मीटर लांब घनाकार इमारत असेल, जी भविष्यातील अत्याधुनिक शहरीकरणाचे प्रतीक म्हणून ओळखली जाईल. सौदीचे क्राउन प्रिन्स मोहम्मद बिन सलमान यांचा हा ड्रीम प्रोजेक्ट असल्याचे मानले जात आहे.

जगातील सर्वात मोठी घनाकार इमारत

‘मुकाब’ ही इमारत न्यू मुरब्बा मेगाप्रोजेक्ट चा एक भाग आहे. सौदी सरकारने या भव्य वास्तूचे वर्णन “जगातील सर्वात मोठी रचना” असे केले आहे. संपूर्ण प्रकल्पासाठी 50 अब्ज डॉलर्स खर्च होणार असून, येथे चार लाखांहून अधिक लोक राहू शकतील. ही इमारत केवळ गगनचुंबी टॉवर नसून एक संपूर्ण शहर असेल. येथे निवासी घरे, आलिशान हॉटेल्स, आंतरराष्ट्रीय दर्जाची दुकाने, मनोरंजन केंद्रे, सांस्कृतिक ठिकाणे आणि अत्याधुनिक डिजिटल तंत्रज्ञानाचा वापर करून शहराचा अनुभव निर्माण करण्यात येणार आहे.

जागतिक घडामोडी संबंधित बातम्या वाचण्यासाठी येथे क्लिक करा : India UK Relation: आता लंडनचा प्रवास होणार आणखी सोपा; S. जयशंकर-ब्रिटिश पंतप्रधान भेटीने उघडली नवीन दारं!

जगातील इतर भव्य वास्तूंना मागे टाकणार

‘मुकाब’ ची भव्यता लक्षात घेतल्यास, ती अनेक ऐतिहासिक वास्तूंना मागे टाकेल.

• फ्रान्समधील आयफेल टॉवर (312 मीटर)
• अमेरिकेतील एम्पायर स्टेट बिल्डिंग (381 मीटर)

या इमारतींच्या तुलनेत ‘मुकाब’ अधिक उंच आणि विस्तीर्ण असेल.

डिजिटल वातावरण आणि भविष्याचे शहरीकरण

या प्रकल्पाचा एक मोठा वैशिष्ट्यपूर्ण भाग म्हणजे डिजिटल अनुभव. ही इमारत अशा प्रकारे डिझाइन केली आहे की, त्यामध्ये राहणाऱ्या किंवा भेट देणाऱ्या व्यक्तींना 360-डिग्री डिजिटल अनुभव मिळेल. वास्तविकता आणि आभासी वास्तवाचा (VR) मिलाफ करत ही जागा अधिक भव्य आणि अत्याधुनिक बनवली जाणार आहे.

सौदी अरेबियाचा जागतिक व्यापार आणि पर्यटनाकडे कल

सौदी अरेबिया आजही मुख्यतः तेल निर्यातीवर अवलंबून आहे. मात्र, भविष्यात तेलाच्या उत्पन्नावर अवलंबित्व कमी करण्यासाठी विविध उपक्रम हाती घेतले जात आहेत. पर्यटन, तंत्रज्ञान, व्यापार आणि नवसंशोधनाला चालना देण्यासाठी ‘मुकाब’ सारखे मेगाप्रोजेक्ट उभारले जात आहेत.

मुकाबची तुलना मक्केतील पवित्र काबाशी

‘मुकाब’ इमारतीची रचना पाहता ती मुस्लिम धर्मातील सर्वात पवित्र स्थळ मक्का येथील काबा यासारखी वाटते. यामुळे काही ठिकाणी या प्रकल्पावर टीकाही केली जात आहे. सोन्यासारख्या रंगसंगतीत असलेली ही इमारत भव्य आणि आकर्षक असेल.

संपूर्ण वाळवंटात उत्खनन सुरू

हा प्रकल्प पूर्ण करण्यासाठी १० दशलक्ष घनमीटर जागेवर उत्खनन सुरू आहे. याचे मुख्य उद्दिष्ट रियाध शहराला भविष्याच्या शहरामध्ये रूपांतरित करणे आहे. सौदी अरेबियातील हा महत्त्वाकांक्षी प्रकल्प जागतिक स्तरावर चर्चेचा विषय ठरत आहे.

जागतिक घडामोडी संबंधित बातम्या वाचण्यासाठी येथे क्लिक करा : अमेरिकेतील हवाईमध्ये किलाउआ ज्वालामुखीचा भीषण उद्रेक; लाव्हा 150 फूटांपेक्षा अधिक उंचीवर

भविष्यातील शहरी जीवनाचा नवा पैलू

‘मुकाब’ हा फक्त एक गगनचुंबी घन नसून, तो भविष्याच्या शहरी जीवनशैलीचे उदाहरण ठरेल. येथे तंत्रज्ञान, आधुनिकता, आणि सांस्कृतिक वारसा यांचे अनोखे मिश्रण असेल. यामुळे सौदी अरेबियाचा जगभरातील पर्यटन आणि व्यापार क्षेत्रातील प्रभाव अधिक वाढेल. हा प्रकल्प सौदी अरेबियाच्या ‘व्हिजन 2030’ च्या दिशेने टाकलेले एक क्रांतिकारी पाऊल ठरणार आहे.