Sudan gold mine airstrike Sudan air strike 72 dead
सुदान आणि इजिप्तच्या (Sudan Crisis) सीमावर्ती भागातून एक अत्यंत हृदयद्रावक आणि थरकाप उडवणारी बातमी समोर आली आहे. दोन्ही देशांच्या वादग्रस्त सीमेजवळ असलेल्या एका बेकायदेशीर सोन्याच्या खाणीवर भीषण हवाई हल्ला करण्यात आला. या भयंकर हल्ल्यात तब्बल ७२ कामगारांचा जागीच मृत्यू झाला असून अनेक जण गंभीर जखमी झाले आहेत. मानवाधिकार कार्यकर्त्यांनी दिलेल्या माहितीनुसार, हल्ल्याच्या वेळी या निर्जन भागात हजारो मजूर सोन्याच्या शोधात काम करत होते. अचानक झालेल्या या बॉम्बहल्ल्यामुळे संपूर्ण परिसरात प्रचंड घबराट पसरली आणि कामगारांनी जीव वाचवण्यासाठी दिसेल त्या दिशेने धाव घेतली.
हल्ल्याच्या या भयंकर घटनेनंतर ‘इमर्जन्सी लॉयर्स’ नावाच्या एका मानवाधिकार संस्थेने प्रसारमाध्यमांशी बोलताना दावा केला आहे की, हा हल्ला इजिप्तच्या हवाई दलाने (Egyptian Air Force) केला होता. तथापि, या संस्थेने आपल्या दाव्याच्या समर्थनार्थ कोणताही अधिकृत पुरावा सादर केलेला नाही. या हल्ल्यामागे नेमका कोणाचा हात होता, याबाबत अद्याप कोणतीही स्वतंत्र आंतरराष्ट्रीय पडताळणी झालेली नाही. दुसरीकडे, इजिप्त सरकारने किंवा त्यांच्या लष्कराने या संपूर्ण घटनेवर अजून तरी कोणतेही अधिकृत निवेदन जारी केलेले नाही. त्यामुळे या हल्ल्याचे गूढ अधिकच वाढले आहे.
जागतिक घडामोडी संबंधित बातम्या वाचण्यासाठी येथे क्लिक करा : Riyadh Airport: कुणी विश्रांती घेत होते तर कुणी वाट पाहत होते, क्षणात बदलले चित्र; रियाध विमानतळावरील हल्ल्याचा VIDEO VIRAL
या प्राणघातक हवाई हल्ल्यातून सुदैवाने वाचलेल्या दोन कामगारांनी ‘एजन्सी फ्रान्स-प्रेस’ (AFP) या आंतरराष्ट्रीय वृत्तसंस्थेशी बोलताना त्या प्रसंगाचे वर्णन केले. एका प्रत्यक्षदर्शीने सांगितले की, एका लढाऊ विमानाने खाणीच्या परिसरावर सलग पाच वेळा बॉम्बचा वर्षाव केला. विमानाचा मोठा आवाज आणि लागोपाठ झालेल्या स्फोटांमुळे संपूर्ण परिसर हादरून गेला होता. आणखी हवाई हल्ले होतील या भीतीने अत्यंत घाबरलेले कामगार जवळच असलेल्या डोंगराळ भागात पळून गेले आणि तिथे तासनतास लपून राहिले.
This video may be distressing to some viewers. An air strike hit a gold mine near Sudan’s border with Egypt, killing at least 72 people and injuring more than 50, according to rights groups. No group has claimed responsibility yet. https://t.co/fKRPAB9vwG — Al Jazeera English (@AJEnglish) October 12, 2026
credit – social media and Twitter
दुसऱ्या एका प्रत्यक्षदर्शीने सांगितले की, स्फोट होताच खाणीतील हजारो कामगार जीव वाचवण्यासाठी पांगले. काही जण अल-अन्सारी गोल्ड मार्केटच्या दिशेने धावले, तर काही जण वाळवंटाच्या दिशेने निघून गेले. पळून जात असताना त्यांनी रस्त्याच्या कडेला आणि वाळूत अनेक कामगारांचे मृतदेह विखुरलेले पाहिले. खाणीच्या प्रचंड ढिगाऱ्याखाली आणखी अनेक मजूर गाडले गेल्याची भीती व्यक्त केली जात आहे. त्यामुळे स्थानिक संघटनांच्या मते, प्रत्यक्ष मृतांचा आकडा ७२ पेक्षाही कितीतरी पट अधिक असण्याची शक्यता आहे.
जागतिक घडामोडी संबंधित बातम्या वाचण्यासाठी येथे क्लिक करा : US Russia Oil Deal वरून वॉशिंग्टनमध्ये राजकीय वादळ; सिनेटर्समध्ये मोठी फूट, 18 ऑक्टोबरच्या निर्णयाकडे भारतासह जगाचे लक्ष
सुदान-इजिप्त सीमेवर सोन्याच्या खाणींवर हल्ला होण्याची ही पहिलीच वेळ नाही. यापूर्वी जून महिन्यातही इजिप्तच्या सीमेजवळ असलेल्या ‘जबल अल-उकायदात’ या परवाना नसलेल्या सोन्याच्या खाणीवर असाच हवाई हल्ला झाला होता. त्या हल्ल्यात २३ निष्पाप कामगारांचा दुर्दैवी मृत्यू झाला होता. त्या वेळीही या हल्ल्यासाठी इजिप्तलाच जबाबदार धरण्यात आले होते.
जूनमधील घटनेनंतर इजिप्तच्या लष्कराने स्पष्टीकरण देताना म्हटले होते की, त्यांनी आपल्या सीमेत अवैध सोन्याच्या खाणकामाविरोधात एक विशेष मोहीम उघडली आहे. परंतु, त्यांनी खाणीवरील थेट बॉम्बहल्ल्याचा कोणताही उल्लेख केला नव्हता. या सलग दुसऱ्या मोठ्या घटनेमुळे सीमावर्ती भागातील सोन्याच्या खाणींमध्ये तुटपुंज्या उत्पन्नासाठी स्वतःचा जीव धोक्यात घालून काम करणाऱ्या गरीब कामगारांच्या सुरक्षेचा प्रश्न पुन्हा एकदा चव्हाट्यावर आला आहे.
सुदान आणि इजिप्त या दोन आफ्रिकन देशांमध्ये ‘हलाईब त्रिकोन’ (Halaib Triangle) या भूभागावरून दीर्घकाळापासून वाद सुरू आहे. हा विस्तीर्ण प्रदेश सोने आणि इतर मौल्यवान खनिज संपत्तीने समृद्ध असल्याने दोन्ही देश यावर आपला दावा ठोकतात. भू-राजकीयदृष्ट्या हा भाग अत्यंत संवेदनशील मानला जातो. विशेष म्हणजे, इजिप्त हा सुदानी लष्कराचे प्रमुख अब्देल फताह बुरहान यांचा जवळचा मित्र देश मानला जातो.
दुसरीकडे, सुदान देश स्वतः गेल्या तीन वर्षांहून अधिक काळापासून अंतर्गत यादवीच्या भयंकर आगीत होरपळत आहे. सुदानी सैन्य आणि मोहम्मद हमदान डग्लो यांच्या नेतृत्वाखालील ‘रॅपिड सपोर्ट फोर्सेस’ (RSF) या निमलष्करी दलात सुरू असलेल्या या रक्तरंजित संघर्षात आतापर्यंत २ लाखांहून अधिक नागरिकांचा मृत्यू झाला आहे. देशातील या राजकीय अस्थिरतेचा आणि अराजकतेचा फटका सीमावर्ती भागातील गरीब कामगारांना सहन करावा लागत आहे.
.png "Videos"){kind=small}
