बांगलादेशात बीएनपीला मोठं यश; दुहेरी शतकाचा टप्पा ओलांडला, तारिक रहमान होणार पंतप्रधान
ढाका : बांगलादेशातील राजकारणात मोठ्या घडामोडी घडत आहेत. गुरुवारीच (दि.१२) संपूर्ण देशभरात मतदान झाले. १३ व्या संसदीय निवडणुकीसाठी २९९ जागांसाठी मतदान झाले. आता या निवडणुकीचे निकाल आज जाहीर होत आहेत. निकालांमध्ये बांगलादेश नॅशनलिस्ट पार्टी (BNP) ला पूर्ण बहुमत मिळाले आहे. त्यानुसार, आता तारिक रहमान हे बांगलादेशच्या पंतप्रधानपदावर विराजमान होतील, हे स्पष्ट झाले आहे.
पंतप्रधान शेख हसीना देश सोडून गेल्यानंतर जवळजवळ दीड वर्षांनी झालेली ही पहिलीच सार्वत्रिक निवडणूक आहे. या निवडणुकीत मुख्य लढत ही बीएनपी आणि जमात-ए-इस्लामी यांच्यात झाल्याचे दिसून आले. अवामी लीग निवडणुकीतून बाहेर पडली आहे. अनेक जागांवर मतमोजणी अजूनही सुरू आहे. बांगलादेश निवडणुकीत बीएनपीने दुहेरी शतकाचा टप्पा ओलांडला आहे. या पक्षाने मोठी आघाडी घेतली आहे. बीएनपीने आतापर्यंत २११ जागा जिंकल्या आहेत, तर जमात-ए-इस्लामी आघाडीने सुमारे ७० जागा जिंकल्या आहेत. हा बीएनपीसाठी निर्णायक विजय मानला जात आहे.
हेदेखील वाचा : Bangladesh election : बांगलादेशच्या राजकारणातून महिला शक्ती गायब; कोण होणार देशाचा नवा ‘नायक’?
बांगलादेशी मीडिया रिपोर्टनुसार, मतमोजणीत बीएनपीने पूर्ण बहुमत मिळवले आहे, आतापर्यंत १५१ जागा जिंकल्या आहेत. सुरुवातीच्या कलांवरून असे दिसून येते की, जमात-ए-इस्लामी ४३ जागांसह मुख्य विरोधी पक्ष म्हणून उदयास येत आहे. इस्लामी आंदोलन बांगलादेशने एक जागा जिंकली आहे आणि इतर पक्षांनी आतापर्यंत चार जागा जिंकल्या आहेत. या कलांवरून असे दिसून येते की, बीएनपी आघाडीने मजबूत स्थान मिळवले आहे.
बांगलादेश निवडणुकीत बीएनपीला बहुमत
२०२६ च्या बांगलादेश निवडणूक निकालांचे नवीन कल आणि निकाल असे दर्शवितात की बांगलादेश नॅशनलिस्ट पार्टी (बीएनपी) बहुमत मिळवत असल्याचे दिसून येते. बांगलादेशी माध्यमांचा हवाला देत रॉयटर्सने दावा केला आहे की, बीएनपीने बहुमताचा आकडा ओलांडला आहे, तर कट्टरपंथी पक्षांना अपेक्षित पाठिंबा मिळू शकला नाही.
बीएनपीसह मित्रपक्षांचीही आघाडी
बांगलादेश नॅशनलिस्ट पार्टी (बीएनपी) आणि त्यांच्या मित्रपक्षांनी लक्षणीय आघाडी घेतली आहे. बीएनपी बहुमतापासून काही जागा कमी आहे. आकडेवारीनुसार, २९९ जागांपैकी १३९ जागांची मतमोजणी पूर्ण झाली आहे, तर १६० जागांचे निकाल अद्याप प्रलंबित आहेत. ज्या जागांचे निकाल जाहीर झाले आहेत त्यापैकी बीएनपी आणि त्यांच्या मित्रपक्षांनी १०७ जागा जिंकल्या आहेत.
