शुक्रवार, 25 सप्टेंबर 2026
फोटो सौजन्य सोशल मीडिया
शी जिनपिंग यांच्या अमेरिकेतील भेटीच्या पार्श्वभूमीवर वॉशिंग्टनमध्ये चीनच्या धोरणांविरोधात विविध गटांनी निदर्शने केली. तिबेटी कार्यकर्त्यांनी अमेरिकेच्या कॅपिटॉलजवळ एकत्र येत तिबेटच्या स्वातंत्र्य आणि अधिकारांचा मुद्दा उपस्थित केला. काही आंदोलकांच्या हातात तिबेटचे झेंडे आणि स्वातंत्र्याच्या मागणीचे फलक होते. तिबेटसोबतच हाँगकाँग, शिनजियांग आणि तैवानशी संबंधित मुद्दे मांडणारे कार्यकर्तेही या आंदोलनात सहभागी झाले.
UN News : अजून कोण भित्रा असेल तर त्याने आत्ताच निघून जावे ; नेतान्याहू संतापले
तिबेट-नेपाळ सीमेवरील पुर आणि भूस्खलनानंतर तिबेटमधील परिस्थितीची माहिती बाहेरील जगापर्यंत पोहोचण्यावर मर्यादा असल्याचा दावा काही मानवाधिकार गट आणि तिबेट समर्थक संघटनांनी केला आहे. आपत्तीग्रस्त भागात पत्रकारांना प्रवेश मिळण्यात अडचणी असल्याचेही सांगितले जात आहे. त्यामुळे तिबेटमध्ये स्वतंत्र पत्रकारांना अधिक प्रवेश मिळावा आणि आपत्तीग्रस्त नागरिकांची परिस्थिती जगासमोर यावी, अशी मागणी आंदोलकांनी केली.
या पुराच्या पार्श्वभूमीवर तिबेटमध्ये माहितीवर असलेल्या नियंत्रणाचा मुद्दा पुन्हा चर्चेत आला आहे. आपत्तीच्या काळात मृतांचा आकडा, बेपत्ता नागरिक आणि मदतकार्याची वास्तविक परिस्थिती याबाबत पारदर्शक माहिती मिळणे आवश्यक असल्याचे आंदोलकांचे म्हणणे आहे.
निदर्शनांमध्ये सहभागी कार्यकर्त्यांनी तिबेटमध्ये अधिक राजकीय आणि धार्मिक स्वातंत्र्याची मागणी केली. तिबेटी संस्कृती, भाषा आणि ओळख जपण्यासाठी अधिक अधिकार मिळावेत, अशी भूमिका आंदोलकांनी मांडली. चीन सरकार मात्र तिबेटबाबतच्या आपल्या धोरणांचे समर्थन करत असून, तेथील विकास आणि स्थैर्यावर भर दिला जात असल्याचे सांगते.
ट्रम्प आणि शी जिनपिंग यांची भेट आर्थिक आणि व्यापारविषयक मुद्द्यांसाठी महत्त्वाची मानली जात असतानाच तिबेटचा प्रश्नही वॉशिंग्टनच्या रस्त्यावर चर्चेत आला. त्यामुळे दोन्ही नेत्यांच्या बैठकीच्या पार्श्वभूमीवर झालेल्या या आंदोलनाने चीनच्या तिबेट धोरणाकडे पुन्हा आंतरराष्ट्रीय लक्ष वेधले आहे.
