रविवार, 15 नोव्हेंबर 2026
फोटो सौजन्य सोशल मीडिया
स्पेनच्या समुद्री बचाव सेवेनुसार, शनिवारी एकूण १४ बोटी समुद्रात आढळल्या. त्यामधील १,४८८ जणांना स्पॅनिश तटरक्षक दलाने सुरक्षित बाहेर काढले. यापूर्वी ७ नोव्हेंबर २०२० रोजी एकाच दिवसात १,४६१ स्थलांतरितांची सुटका करण्यात आली होती.
हा विक्रम आता मोडला गेला आहे. शनिवारी आलेल्या १४ बोटींपैकी १२ बोटी एल हिएरो बेटावर पोहोचल्या, तर प्रत्येकी एक बोट ग्रॅन कॅनरिया आणि टेनेरिफ बेटावर दाखल झाली. एल हिएरो या तुलनेने छोट्या बेटावर सर्वाधिक स्थलांतरित पोहोचल्याने स्थानिक यंत्रणांवरील जबाबदारी वाढली आहे.
या बचाव मोहिमेदरम्यान एका बोटीमध्ये तब्बल २४० स्थलांतरित आढळले. यामध्ये १२ महिला आणि ३६ मुलांचा समावेश होता. बचाव करण्यात आलेल्या बहुतांश नागरिकांचे मूळ सेनेगल, गांबिया आणि गिनी-कोनाक्री या पश्चिम आफ्रिकेतील देशांमध्ये असल्याचे समोर आले आहे.
काही स्थलांतरितांना अनेक दिवस समुद्रात प्रवास करावा लागला. शुक्रवार आणि शनिवार या दोन दिवसांत मिळून २,३३१ स्थलांतरित कॅनरी बेटांवर पोहोचल्याची माहिती आहे. त्यामुळे बचाव पथकांसोबतच आरोग्य सेवा, तात्पुरती निवासव्यवस्था आणि स्थलांतरितांच्या नोंदणीची जबाबदारी सांभाळणाऱ्या यंत्रणांची धावपळ सुरू झाली आहे.
पश्चिम आफ्रिकेतून कॅनरी बेटांपर्यंतचा अटलांटिक समुद्री मार्ग जगातील सर्वाधिक धोकादायक स्थलांतर मार्गांपैकी एक मानला जातो. अनेक जण क्षमतेपेक्षा जास्त प्रवासी असलेल्या छोट्या बोटींमधून प्रवास करतात. लांबचे अंतर, समुद्रातील जोरदार प्रवाह आणि खराब हवामान यामुळे या प्रवासात जीवितहानीचा धोका असतो.
ऑक्टोबरपासून या मार्गावर स्थलांतरितांच्या आगमनात पुन्हा वाढ झाली आहे. परिस्थितीचा आढावा घेण्यासाठी स्पेनचे प्रादेशिक धोरण मंत्री एंजेल व्हिक्टर टोरेस एल हिएरो बेटाला भेट देणार आहेत. विशेष म्हणजे, २०२६ मध्ये जानेवारी ते ऑक्टोबरदरम्यान कॅनरी बेटांवर पोहोचलेल्या स्थलांतरितांची संख्या मागील वर्षाच्या तुलनेत ५.५ टक्क्यांनी कमी होती. मात्र, अलीकडील वाढीमुळे प्रशासनासमोर नवे आव्हान उभे राहिले आहे.
