रविवार, 15 नोव्हेंबर 2026
राहुल गांधी आणि काँग्रेसवर अमित शाहांची टीका (Photo - X)
Amit Shah on Rahul Gandhi : केंद्रीय गृहमंत्री अमित शाह यांनी काँग्रेस नेते राहुल गांधी आणि काँग्रेस पक्षावर जोरदार निशाणा साधला आहे. गेल्या काही वर्षांपासून काँग्रेसला सातत्याने निवडणुकीतील पराभवाचा सामना करावा लागत आहे. या पार्श्वभूमीवर काँग्रेसकडून वेगवेगळ्या माध्यमांतून नाराजी व्यक्त केली जात असल्याची टीका अमित शाह यांनी केली. विशेष म्हणजे, राहुल गांधी यांनी आंतरराष्ट्रीय व्यासपीठावर भारताबाबत केलेल्या वक्तव्यांवरूनही शाह यांनी त्यांना लक्ष्य केलं.
अमित शहा सध्या पुणे येथे दौऱ्यावर आहेत. यावेळी बोलताना त्यांनी राहुल गांधींवर निशाणा साधला. ‘राहुल गांधी यांनी परदेशात जाऊन भारताच्या लोकशाही व्यवस्थेवर आणि देशाच्या प्रतिमेवर टीका करण्याऐवजी देशातील जनतेमध्ये जाऊन काम करावं,’ असा खोचक सल्ला अमित शाह यांनी दिला.
‘पंतप्रधान नरेंद्र मोदी यांचं जगभरात कौतुक होत असताना राहुल गांधी मात्र आंतरराष्ट्रीय व्यासपीठावर भारताच्या विकासाबाबत नकारात्मक चित्र मांडत आहेत,’ असा आरोप देखील त्यांनी केला. ‘काँग्रेसला पुन्हा निवडणुकांमध्ये यश मिळवायचं असेल, तर त्यांनी गावागावात जाऊन लोकांच्या समस्या समजून घ्याव्यात. भारताची बदनामी करण्याचं राजकारण सुरू ठेवल्यास पुढील 30 वर्षे काँग्रेसला सत्तेपासून दूर राहावं लागेल,’ असा टोला अमित शाह यांनी लगावला.
यावेळी अमित शाह यांनी केंद्र सरकारच्या सहकार क्षेत्रातील कामांचाही उल्लेख केला. देशात नरेंद्र मोदी यांच्या नेतृत्वाखाली स्वतंत्र सहकार मंत्रालयाची स्थापना करण्यात आल्याचं त्यांनी सांगितलं. काँग्रेसच्या सत्ताकाळात शेतकरी, दूध संघ आणि सहकारी संस्थांकडून स्वतंत्र सहकार मंत्रालयाची मागणी होत होती. मात्र, ही मागणी पूर्ण झाली नाही, असा आरोप शाह यांनी केला.
मोदी सरकारने जिल्हा सहकारी संस्था, दूध संघ आणि साखर कारखान्यांना बळकटी देण्यासाठी विविध निर्णय घेतल्याचंही त्यांनी नमूद केलं. साखर कारखान्यांना करसवलतीचा निर्णय हा सहकार क्षेत्रासाठी महत्त्वाचा असल्याचं शाह म्हणाले.
दरम्यान, छठ महापर्वानिमित्त अमित शाह यांनी देशवासीयांना शुभेच्छा दिल्या. भगवान बिरसा मुंडा यांच्या जयंतीनिमित्त त्यांना अभिवादन करत आदिवासी गौरव दिनाच्या महत्त्वाचाही उल्लेख केला.
नक्षलवादातून मुक्त झालेल्या भागांमध्ये केवळ सुरक्षा व्यवस्था मजबूत करून चालणार नाही, तर तिथल्या नागरिकांपर्यंत विकासाच्या योजना पोहोचवणंही आवश्यक आहे. यासाठी मोदी सरकार प्रयत्नशील असल्याचं त्यांनी सांगितलं.
Ans: राहुल गांधी परदेशात जाऊन आंतरराष्ट्रीय व्यासपीठावर भारताची प्रतिमा मलिन करण्याचा प्रयत्न करत असल्याचा आरोप अमित शाह यांनी केला.
Ans: राहुल गांधी यांनी भारताची बदनामी करण्याचं राजकारण सुरू ठेवल्यास काँग्रेसला पुढील 30 वर्षे सत्तेपासून दूर राहावं लागेल, असा दावा अमित शाह यांनी केला.
Ans: पंतप्रधान नरेंद्र मोदी यांनी देशात स्वतंत्र सहकार मंत्रालयाची स्थापना केल्याचं अमित शाह यांनी सांगितलं. दूध संघ, जिल्हा सहकारी संस्था आणि साखर कारखान्यांना बळकटी देण्यासाठी केंद्र सरकार प्रयत्नशील असल्याचंही त्यांनी नमूद केलं.
