World News : दहशतवादावर दुटप्पी भूमिका खपवून घेणार नाही! एससीओ बैठकीत राजनाथ सिंह यांचा पाकिस्तानला इशारा

World News : एससीओ बैठकीत संरक्षणमंत्री राजनाथ सिंह यांनी दहशतवादाच्या मुद्द्यावर पाकिस्तानला स्पष्ट इशारा दिला. दहशतवादाला आश्रय किंवा पाठबळ देणाऱ्यांची दुटप्पी भूमिका खपवून घेतली जाणार नाही, अशी ठाम भूमिका त्यांनी मांडली. आंतरराष्ट्रीय स्तरावर दहशतवादाविरोधात एकजुटीने लढण्याचे आवाहनही केले.

• दहशतवादाविरोधात भारताची आक्रमक भूमिका
• पाकिस्तानच्या उपस्थितीत राजनाथ सिंह यांचा संदेश
• दहशतवादामुळे जागतिक शांततेलाही धोका

World News : दहशतवादाच्या मुद्द्यावर भारताने पुन्हा एकदा आंतरराष्ट्रीय व्यासपीठावर आपली भूमिका ठामपणे मांडली आहे. भारताला दहशदवादामुळे खूप त्रास सहन करावा लागला असून , निष्पाप नागरिक आणि उत्तम सैनिकांचा मृत्यू सोसावा लागला आहे . शांघाय कोऑपरेशन ऑर्गनायझेशनच्या (SCO) बैठकीत संरक्षणमंत्री राजनाथ सिंह यांनी दहशतवादाला कोणत्याही परिस्थितीत समर्थन देता कामा नये, असा स्पष्ट संदेश दिला.

दहशतवादाच्या विरोधात एकीकडे बोलायचे आणि दुसरीकडे त्याला पाठबळ द्यायचे, अशी दुटप्पी भूमिका चालणार नाही, अशा शब्दांत त्यांनी पाकिस्तानला सुनावले. पाकिस्तानचे प्रतिनिधी उपस्थित असतानाच त्यांनी त्यांच्यासमोरच मांडलेल्या भूमिकेमुळे या विधानाला विशेष महत्त्व प्राप्त झाले आहे.आणि या भूमिकेची चर्चा सुद्धा होताना दिसत आहे .

Marco Rubio: 3 दिवसांच्या भारत यात्रेसाठी मुंबईत धडकले मार्को रुबियो, जयशंकरसह करणार बैठक; जामनगरलाही जाणार

दहशतवादाविरोधात भारताची आक्रमक भूमिका

एससीओच्या व्यासपीठावर बोलताना राजनाथ सिंह यांनी दहशतवाद हा केवळ एका देशाचा प्रश्न नसून संपूर्ण जगाच्या सुरक्षेसमोरील गंभीर आव्हान असल्याचे स्पष्ट केले. दहशतवादाला कोणत्याही स्वरूपात प्रोत्साहन , मदत आणि पाठिंबा देणे, दहशतवादी संघटनांना आश्रय देणे किंवा त्यांना आर्थिक मदत करणे या गोष्टी खपवून घेता कामा नयेत, अशी भूमिका त्यांनी मांडली.

दहशतवादाविरोधात लढताना देशांनी निवडक भूमिका घेऊन चालणार नाही. एखाद्या देशात दहशतवादी हल्ला झाल्यास त्याचा निषेध करायचा आणि दुसरीकडे अशा कारवायांना अप्रत्यक्ष मदत करायची, हा विरोधाभास संपला पाहिजे. दहशतवादाविरोधातील लढाईत सर्व देशांची भूमिका स्पष्ट आणि प्रामाणिक असणे आवश्यक असल्याचे त्यांनी अधोरेखित केले.

पाकिस्तानच्या उपस्थितीत राजनाथ सिंह यांचा संदेश

या बैठकीला पाकिस्तानचे उपपंतप्रधान आणि परराष्ट्रमंत्री इशाक दार यांचीही उपस्थिती होती. त्यामुळे राजनाथ सिंह यांच्या विधानाकडे विशेष लक्ष वेधले गेले. भारताने यापूर्वीही पाकिस्तानकडून दहशतवादाला मिळणाऱ्या कथित पाठिंब्याचा मुद्दा विविध आंतरराष्ट्रीय व्यासपीठांवर उपस्थित केला आहे.

भारताच्या सुरक्षेला धोका निर्माण करणाऱ्या दहशतवादी कारवायांविरोधात कठोर भूमिका घेण्याची गरज असल्याचे राजनाथ सिंह यांनी स्पष्ट केले. दहशतवाद्यांना आश्रय देणाऱ्या आणि त्यांच्या कारवायांकडे दुर्लक्ष करणाऱ्या व्यवस्थांवर आंतरराष्ट्रीय समुदायाने प्रश्न उपस्थित केले पाहिजेत. दहशतवादाचा सामना करताना राजकीय सोयीपेक्षा मानवतेला आणि जागतिक सुरक्षेला प्राधान्य दिले पाहिजे, असा संदेश त्यांच्या भूमिकेतून देण्यात आला.

France News : आमच्या देशातील उद्रेकाला मध्यपूर्वेतील युद्ध जबाबदार ; फ्रान्स राष्ट्राध्यक्ष मॅक्रॉन

दहशतवादामुळे जागतिक शांततेलाही धोका

दहशतवादाचे परिणाम केवळ सुरक्षा व्यवस्थेपुरते मर्यादित राहत नाहीत. त्याचा परिणाम सामान्य नागरिकांचे जीवन, व्यापार, पर्यटन, गुंतवणूक आणि आर्थिक विकासावरही होतो. दहशतवादी घटनांमुळे निर्माण होणारी अस्थिरता अनेक देशांच्या विकासाच्या प्रक्रियेला खीळ घालते.

एससीओसारख्या संघटनेची जबाबदारी या पार्श्वभूमीवर अधिक महत्त्वाची ठरते. सदस्य देशांनी माहितीची देवाणघेवाण, गुप्तचर यंत्रणांमधील समन्वय आणि दहशतवादी नेटवर्कविरोधातील कारवाई अधिक प्रभावी करण्याची गरज आहे. केवळ बैठका आणि निषेध व्यक्त करून दहशतवाद संपणार नाही, तर त्याच्या मुळावर घाव घालण्यासाठी सामूहिक प्रयत्न करावे लागतील.

भारताने या बैठकीच्या माध्यमातून दहशतवादाबाबत कोणतीही तडजोड स्वीकारली जाणार नाही, हे पुन्हा एकदा स्पष्ट केले आहे. दहशतवादाविरोधात बोलणाऱ्या प्रत्येक देशाने आपल्या कृतीतूनही तीच भूमिका दाखवावी, हाच राजनाथ सिंह यांच्या विधानाचा मुख्य संदेश आहे.