मंगळवार, 3 नोव्हेंबर 2026
मशिदीजवळ स्फोटकांनी भरलेले वाहन धडकवले; पाकिस्तानात रक्ताचा पाऊस!
मशिदीतील स्फोटाचे व्हिडिओ टीव्ही आणि सोशल मीडियावर व्हायरल होत आहेत, ज्यामध्ये नागरिक ढिगाऱ्याखाली अडकलेले आणि लोक त्यांना वाचवण्यासाठी धडपडताना दिसत आहेत. प्रशासनाने बचावकार्यही सुरू केले आहे.
खैबर पख्तुनख्वाचे पोलीस महानिरीक्षक (आयजी) झुल्फिकार हमीद यांनी जारी केलेल्या प्राथमिक निवेदनात म्हटले आहे की, कोहाट पोलीस लाइन्सजवळील मशिदीत हा स्फोट झाला. तसेच, प्राथमिक अहवालानुसार, स्फोटकांनी भरलेले एक वाहन इमारतीत घुसविण्यात आले होते, असेही त्यात म्हटले आहे. स्पेशल ब्रांच इमारतीजवळ एका आत्मघाती हल्लेखोराने स्वतःला उडवून दिले असून, फितना अल-ख्वारिजच्या दहशतवाद्यांसोबत चकमक सुरू आहे.
स्थानिक वृत्तवाहिनीच्या वृत्तानुसार जिल्हा मुख्यालय रुग्णालयाचे एमएस ताहिर अली शाह यांच्या हवाल्याने सांगितले की, स्फोटानंतर ५० हून अधिक जखमींना १५ मृतदेहांसह रुग्णालयात आणण्यात आले. बहुतेक जखमी हे नमाज पठण करणारे होते. स्फोटामुळे मशिदीबाहेर एक मोठा खड्डा पडला आहे.
रेस्क्यू ११२२ खैबर पख्तुनख्वाचे प्रवक्ते बिलाल अहमद फैजी यांच्या माहितीनुसार, बातमी मिळाल्यानंतर बचाव पथके घटनास्थळी पोहोचली आणि त्यांनी बचावकार्य सुरू केले. त्यांनी पुढे सांगितले की, अनेक लोक जखमी झाले असून त्यांना प्राथमिक उपचारांसाठी जवळच्या रुग्णालयात नेण्यात येत आहे. बचाव पथके घटनास्थळी उपस्थित असून परिस्थितीचा आढावा घेत आहेत.
यापूर्वी, या वर्षी फेब्रुवारीमध्ये, इस्लामाबादमधील एका शिया मशिदीत मोठा स्फोट झाला होता. येथे एका आत्मघाती हल्लेखोराने स्वतःला उडवून दिले. या स्फोटात ७० हून अधिक लोकांचा मृत्यू झाला आणि २५० जण जखमी झाले. इस्लामाबादमधील तरलाई येथील खदिजातुल कुब्रा मशीद-कम-इमामबाऱ्यात हा स्फोट झाला.
पोलिस आणि प्रत्यक्षदर्शींच्या म्हणण्यानुसार, आत्मघाती हल्लेखोराला इमामबाऱ्याच्या प्रवेशद्वारावर रोखण्यात आले होते, परंतु त्याने स्वतःच्या स्फोटाचा उद्घोष केला. यापूर्वी, ऑगस्ट महिन्यात, इस्लामाबादमधील एका मशिदीत लश्कर-ए-तोयबाचा एक वरिष्ठ कार्यकर्ता संशयास्पद परिस्थितीत ठार झाला होता. तो तिथे नमाज अदा करण्यासाठी आला होता.
