गुरुवार, 12 नोव्हेंबर 2026
JLR BYD Dispute : डिफेंडरच्या डिझाइन वादात JLR ला झटका; BYDची जप्त कागदपत्रे नष्ट करण्याचे कोर्टाचे आदेश, सौजन्य : सोशल मीडिया
द हेग येथील न्यायालयाचे न्यायाधीश एच.एफ.आर. व्हॅन हीमस्ट्रा यांनी हा निर्णय दिला. डिफेंडरच्या डिझाइनची नक्कल झाल्याचा दावा सिद्ध करण्यासाठी जप्त केलेल्या कागदपत्रांची आवश्यकता नसल्याचे न्यायालयाने नमूद केले. आदेशाचे पालन न केल्यास JLR ला प्रत्येक तासाला 50 हजार युरो दंड भरावा लागणार असून, या दंडाची कमाल मर्यादा 5 लाख युरो निश्चित करण्यात आली आहे.
या प्रकरणाची सुरुवात ऑगस्ट महिन्यात झाली होती. JLR ने मिळवलेल्या न्यायालयीन आदेशानंतर शिएडम आणि हूफडॉर्प येथील BYD च्या कार्यालयांतून कागदपत्रे जप्त करण्यात आली होती. या कागदपत्रांमध्ये Ti7 एसयूव्हीच्या लॉन्चचे नियोजन, तांत्रिक माहिती आणि आर्थिक नोंदींचा समावेश असल्याचे सांगण्यात आले.
मात्र, डिझाइनची नक्कल झाल्याचे सिद्ध करण्यासाठी या फाइल्स आवश्यक नसल्याचे न्यायालयाने स्पष्ट केले. BYD ने अद्याप युरोपियन युनियनमध्ये Ti7 ची विक्री सुरू केलेली नसल्याने नुकसानभरपाईची गणना करण्यासाठीही या कागदपत्रांची गरज नसल्याचे न्यायालयाने म्हटले.
BYD ने कागदपत्रे जप्त करण्याच्या कारवाईला विरोध केला होता. ही कारवाई अधिकारक्षेत्राबाहेर जाऊन करण्यात आली असून, त्यात संबंधित नसलेली संशोधन आणि विकासविषयक माहितीही गोळा करण्यात आल्याचा युक्तिवाद कंपनीने केला होता. न्यायालयाने कागदपत्रे गोळा करण्याची मागणी अतिव्यापक असल्याचे मान्य केले. तसेच BYD च्या अंतर्गत फाइल्सची स्वतंत्र तपासणी करण्याची JLR ची याचिकाही फेटाळली.
दरम्यान, या निर्णयामुळे डिफेंडरच्या डिझाइनची नक्कल झाली आहे की नाही, या मुख्य वादावर अंतिम निकाल लागलेला नाही. BYD च्या Ti7 एसयूव्हीने JLR च्या बौद्धिक संपदा अधिकारांचे उल्लंघन केले आहे की नाही, हे अद्याप स्पष्ट व्हायचे आहे. या प्रकरणाशी संबंधित स्वतंत्र कायदेशीर कार्यवाही रॉटरडॅम आणि द हेग येथे सुरू आहे.
न्यायालयाने BYD ला कायदेशीर खर्चापोटी 25,367.57 युरो देण्याचे आदेशही दिले आहेत.
