फोटो सौजन्य- सोशल मीडिया
फूड डिलिव्हरी कंपनी स्विगीने (Swiggy) इलेक्ट्रिक मोबिलिटी फर्म बाउंस सोबत महत्त्वपूर्ण भागीदारी जाहीर केली आहे. या करारानुसार, स्विगी आपल्या डिलिव्हरी फ्लीटमध्ये इलेक्ट्रिक स्कूटरचा समावेश करणार आहे. या उपक्रमाचा मुख्य उद्देश डिलिव्हरीचा खर्च कमी करणे आणि पर्यावरणावरील कार्बन फूटप्रिंट घटवणे हा आहे. पहिल्या टप्प्यात, बाउंस पुढील तीन महिन्यांमध्ये दिल्ली-एनसीआर आणि बंगळुरूसारख्या प्रमुख शहरांमध्ये आपले इलेक्ट्रिक स्कूटर बाजारात आणणार आहे. ही वाहने विशेषतः स्विगी आणि इंस्टामार्टच्या डिलिव्हरी पार्टनर्ससाठी खास दरात उपलब्ध असतील. या स्कूटर बाउंस मोबाईल ॲप आणि स्विगीच्या डिलिव्हरी पार्टनर ॲप दोन्हीवर वापरता येतील.
स्विगीचे वरिष्ठ उपाध्यक्ष (ड्रायव्हर आणि डिलिव्हरी ऑर्गनायझेशन) सौरव गोयल यांनी सांगितले की, बाउंस सोबतची ही भागीदारी अधिक हरित आणि किफायतशीर डिलिव्हरीच्या दिशेने एक मोठे पाऊल आहे. येत्या काही महिन्यांमध्ये या सहकार्याचा विस्तार देशातील अनेक शहरांमध्ये करण्याची योजना आहे. या निर्णयामुळे स्विगीला त्यांच्या डिलिव्हरी फ्लीटमध्ये इलेक्ट्रिक वाहनांचा वापर वाढवता येईल, जे भविष्यासाठी महत्त्वाचे आहे.
एकीकडे पर्यावरणपूरक उपक्रमांची घोषणा होत असताना, दुसरीकडे स्विगीने आपल्या प्लॅटफॉर्म शुल्कात वाढ केली आहे. आता प्रत्येक ऑर्डरवर १४ रुपये शुल्क आकारले जात आहे. कंपनीने सणांच्या काळात ग्राहकांची आणि ऑर्डरची संख्या वाढल्यामुळे हे पाऊल उचलल्याचे म्हटले आहे. मात्र, या शुल्कात सातत्याने वाढ होत आहे. एप्रिल २०२३ मध्ये २ रुपयांवर असलेले हे शुल्क ऑगस्ट २०२५ मध्ये १४ रुपयांपर्यंत पोहोचले आहे, म्हणजेच फक्त दोन वर्षांत त्यात तब्बल ६००% वाढ झाली आहे. स्विगी दररोज सुमारे २० लाख ऑर्डरवर प्रक्रिया करते. सध्याच्या १४ रुपयांच्या प्लॅटफॉर्म शुल्कावर कंपनीला दररोज मोठी अतिरिक्त कमाई होत आहे. तरीही, कंपनीने या वाढीबद्दल अधिकृतपणे कोणतीही माहिती दिलेली नाही.
