कॉफी, शॉवर, डान्स आणि शेवटी चोरी! चोराने ४.७१ लाखांची KTM बाईक लंपास करण्यापूर्वी केला भन्नाट ‘VIP ड्रामा’

उत्तर प्रदेशातील एका शोरूममध्ये मध्यरात्री अत्यंत अनपेक्षित आणि विचित्र प्रकार घडल्याने पोलीस प्रशासनासह नागरिकही थक्क झाले आहेत. चोरी करण्याच्या इराद्याने आत शिरलेल्या एका व्यक्तीच्या भन्नाट कृत्यामुळे ही घटना संपूर्ण देशभर चर्चेचा विषय ठरली आहे.

• वाराणसीतील एका प्रसिद्ध वाहनांच्या शोरूममध्ये मध्यरात्री अत्यंत अनोखी आणि विचित्र चोरीची घटना घडली आहे.
• चोराने थेट चोरी करण्याऐवजी शोरूममध्ये तब्बल साडेचार तास मुक्काम करत अजब कारनामे केले.
• सीसीटीव्ही फुटेजच्या मदतीने पोलीस आता ४.७१ लाखांची केटीएम बाईक घेऊन पळालेल्या चोराचा शोध घेत आहेत.

वाराणसीमधील एका वाहनांच्या शोरूममध्ये मध्यरात्री घडलेल्या एका अजब चोरीच्या घटनेने पोलीस आणि नागरिक दोघेही अवाक झाले आहेत. शोरूममध्ये घुसलेल्या चोराने लगेच चोरी करून पळ काढण्याऐवजी तब्बल साडेचार तास तिथेच मुक्काम ठोकला. या वेळेत त्याने तिथे गरम कॉफी बनवून पिली, आंघोळ केली, गाणी लावून डान्स केला चांगल्या थाटामाटात आराम करून सरतेशेवटी ४.७१ लाख रुपये किमतीची नवीन केटीएम बाईक घेऊन पसार झाला.

ग्लास डोअर तोडून शोरूममध्ये प्रवेश

मिळालेल्या माहितीनुसार, शोरूमच्या कर्मचाऱ्यांनी नेहमीप्रमाणे रात्री १० वाजता शोरूम बंद केले होते. रात्री ११:३० च्या सुमारास पांढरा शर्ट आणि जीन्स घातलेला एक तरुण तिथे आला. पाऊस सुरू झाल्याने त्याने आधी एका बॅनरचा आसरा घेतला आणि नंतर कटरच्या साहाय्याने शोरूमचा काचेचा दरवाजा कापण्याचा प्रयत्न केला. जवळपास ३६ मिनिटांच्या अथक प्रयत्नांनंतर रात्री १२:०६ वाजता तो शोरूमच्या आत शिरला.

एका मुलीच्या शिक्षणासाठी जपानने ३ वर्षे सुरू ठेवले होते रेल्वे स्टेशन; नफ्या-तोट्यापेक्षा शिक्षणाचे महत्त्व केले होते अधोरेखित!

शोरूममध्ये साडेचार तास चालला होता ‘व्हीआयपी‘ थाट

शोरूममध्ये प्रवेश केल्यानंतर या चोराने दाखवलेला निवांतपणा अगदी थक्क करणारा होता. त्याने पहिल्यांदा रिसेप्शनवरील कॉम्प्युटर सुरू केला आणि रिव्हॉल्व्हिंग खुर्चीवर बसून गिरक्या घेतल्या. त्यानंतर फ्रिजमधून थंड पाणी पिऊन त्याने स्वतःसाठी मस्त गरम कॉफी बनवली. एवढ्यावरच थांबला नाही तर तो वॉशरूममध्ये गेला, तिथे शॉवर घेतला आणि आपले ओले कपडेही वाळत घातले.

कमाल म्हणजे नवीन गाडीचे कव्हर अंगाभोवती लुंगीसारखे गुंडाळून त्याने कॉम्प्युटरवर गाणी लावली आणि मनसोक्त डान्स केला. पळून जाण्यापूर्वी त्याने शोरूममध्ये विक्रीसाठी ठेवलेला ब्रँडेड टी-शर्ट आणि कॅप घातली होती.

स्मार्टवॉच घातल्याने खरंच होतो कॅन्सर? जाणून घ्या सोशल मीडियावर करण्यात आलेल्या दाव्यांमधील खरे सत्य

४.७१ लाखांची केटीएम बाईक घेऊन झाला बेपत्ता

पहाटे ४ वाजण्याच्या सुमारास, शोरूमच्या व्यवस्थापकाची चावी असलेली ४.७१ लाख रुपयांची केटीएम बाईक त्याने सुरू केली आणि तिथून पळ काढला आणि बेपत्ता झाला. सकाळी गार्डला काच तुटलेली दिसल्यानंतर या विचित्र चोरीचा प्रकार उघडकीस आला.

सीसीटीव्ही फुटेज तपासल्यानंतर पोलिसांना या सर्व भन्नाट प्रकाराची माहिती मिळाली. सध्या वाराणसी पोलीस आणि फॉरेन्सिक टीम या अनोख्या चोराचा आणि चोरीला गेलेल्या बाईकचा शोध घेत आहेत. सोशल मीडियावर या घटनेचा व्हिडिओ प्रचंड व्हायरल होत असून नेटकरी यावर वेगवेगळ्या इंटरेस्टिंग प्रतिक्रिया देत आहेत.