शुक्रवार, 13 नोव्हेंबर 2026
फोटो सौजन्य: iStock
भारतीय शेअर मार्केटमध्ये गेल्या काही वर्षांपासून डिफेन्स स्टॉक्सने गुंतवणूकदारांना चांगला परतवा दिला आहे. केंद्र सरकार देशाच्या सुरक्षिततेकडे विशेष लक्ष देऊन आहेत. यामुळेच सरकार देशातील डिफेन्स कंपन्यांमध्ये जास्त गुंतवणूक करत आहे. अशातच आता येत्या 12 ऑगस्टला सरकारी कंपनी हिंदुस्तान एरोनॉटिक्स लिमिटेडच्या शेअरकडे सर्वांचे लक्ष लागलेले असेल. चला याबद्दल अधिक माहिती जाणून घेऊयात.
डिफेन्स क्षेत्रातील सरकारी कंपनी हिंदुस्तान एरोनॉटिक्स लिमिटेड (HAL) पुढील आठवड्यात 2025-26 आर्थिक वर्षाच्या पहिल्या तिमाहीचे निकाल घोषित करणार आहे. BSE 100 मध्ये लिस्टेड असलेल्या HAL चा मार्केट कॅप 8 ऑगस्ट (शुक्रवार) पर्यंत 2,96,926.0 कोटी रुपये आहे. ही माहिती महारत्न PSU ने 7 ऑगस्ट रोजी एक्सचेंज फाइलिंगमध्ये दिली.
23 डिसेंबर 1940 रोजी तत्कालीन म्हैसूर सरकारच्या पाठिंब्याने वालचंद हिराचंद यांनी बंगळुरूमध्ये हिंदुस्तान एअरक्राफ्ट म्हणून कंपनीची स्थापना केली. या कंपनीचा तिचा उद्देश भारतात विमाने तयार करणे हा होता. 1945 मध्ये, कंपनी उद्योग आणि पुरवठा मंत्रालयाच्या अधीन आली आणि नंतर जानेवारी 1951 मध्ये संरक्षण मंत्रालयाच्या अधीन आली. आता कंपनी येत्या मंगळवारी, 12 ऑगस्ट 2025 रोजी पहिल्या तिमाहीचे निकाल जाहीर करेल.
2025 च्या चौथ्या तिमाहीत कंपनीचा निव्वळ नफा 7.7 टक्क्यांनी घटून 3,977 कोटी रुपये झाला, जो एका वर्षापूर्वी याच कालावधीत 4,309 कोटी रुपये होता. जानेवारी-मार्च तिमाहीत एचएएलचा ऑपरेशनल रेव्हेन्यू 13,700 कोटी रुपये होता, जो आर्थिक वर्ष 24 च्या चौथ्या तिमाहीतील 14,769 कोटी रुपयांपेक्षा 7.2 टक्क्यांनी कमी आहे.
कंपनीचा करपश्चात नफा (PAT) 176 टक्क्यांनी वाढून 1,440 कोटी रुपयांवर पोहोचला आहे, जो आर्थिक वर्ष 2025 च्या तिसऱ्या तिमाहीत नोंदवण्यात आला होता. या कालावधीत कंपनीचा महसूल 97 टक्क्यांनी वाढला आहे, जो आर्थिक वर्ष 2025 च्या ऑक्टोबर-डिसेंबर तिमाहीत 6,957 कोटी रुपयांचा होता.
गेल्या आठवड्याच्या शेवटच्या ट्रेडिंग दिवशी शुक्रवारी, HAL च्या शेअरची किंमत 4439.85 रुपयांवर बंद झाली, जे मागील 4550.95 रुपयांच्या बंद किमतीपेक्षा 2.44 टक्के कमी आहे. गेल्या काही आठवड्यांपासून एचएएलच्या शेअर्समध्ये घसरण दिसून येत आहे. गेल्या एका महिन्यात हा शेअर 11.23 टक्क्यांनी घसरले आहे. गेल्या 3 वर्षांत, कंपनीच्या शेअर्सनी 311.25 टक्के परतावा दिला आहे.
