भूगोलाचा पेपर वेळेप्रमाणे नियोजित घेण्यात येणार (फोटो सौजन्य - iStock)
भूगोल पेपर नियोजित वेळेप्रमाणे
महाराष्ट्र राज्य माध्यमिक उच्च माध्यमिक शिक्षण मंडळातर्फे इयत्ता दहावीची परीक्षा घेतली जात असून बुधवारी भूगोलाचा पेपर नियोजित वेळेत होणार आहे. मात्र, त्यापूर्वीच सोलापूर जिल्ह्यात एका केंद्रावर स्ट्रॉंग रूम फोडून प्रश्नपत्रिका चोरीला गेल्याचे समोर आले. त्यामुळे एकच खळबळ उडाली हाेती. प्रश्नपत्रिका चोरीला गेल्यामुळे बुधवारी होणारा भूगोलाचा पेपर रद्द होणार की नियोजित वेळेत घेतला जाणार ? याबाबत संभ्रम निर्माण झाला होता. परंतु, हा पेपर नियोजित वेळेत होणार असल्याचे राज्य मंडळाने स्पष्ट केले आहे. यामुळे दहावीच्या मुलांना नक्कीच दिलासा मिळाला आहे. सध्या अनेक ठिकाणी पेपरफुटीचे प्रकार सर्रास आढळून येतात. मात्र यावर त्वरीत कारवाई करण्यात आली असल्याने अन्य ठिकाणी अशा प्रकारांना आळा बसेल अशी आशा व्यक्त केली जात आहे.
प्रश्नपत्रिका फुटल्याने संभ्रम
दरम्यान, सांगोल्यातील परीक्षा केंद्रावर प्रश्नपत्रिका फुटल्याची माहिती समजल्यानंतर पुणे विभागीय शिक्षण मंडळाचे अध्यक्ष औदुंबर उकिरडे यांनी घटनास्थळी भेट दिली. केलेल्या पाहणीमध्ये त्यांना संबंधित परीक्षा केंद्रातील स्ट्रॉंग रूमवर सीसीटीव्ही कॅमेरे नसल्याचे आढळून आले. मात्र, संबंधित शाळा ही रस्त्यालगत असल्याने जवळील एका दुकानातील सीसीटीव्ही फुटेज तपासले असता एक विद्यार्थी प्रश्नपत्रिका घेऊन जात असल्याचे आढळून आले. त्यामुळे पोलीस पथक संबंधित विद्यार्थ्यांचा तपास करत आहेत. दरम्यान, सीसीटीव्ही कॅमेरे नसताना स्ट्रॉंग रूम मध्ये प्रश्नपत्रिका ठेवल्या प्रकरणी संबंधित केंद्रप्रमुख व गटशिक्षणाधिकारी यांच्यावर निलंबनाची कारवाई करण्यात आली असल्याचे सांगण्यात आले
