Thakur College Mumbai: विद्यार्थ्यांच्या मागणीला यश! ठाकूर कॉलेजकडून शुल्काची रक्कम परत; अभाविपच्या आंदोलनाला सकारात्मक प्रतिसाद

Thakur College Mumbai: मुंबईतील ठाकूर कॉलेजने विद्यार्थ्यांकडून वसूल करण्यात आलेली रक्कम परत करण्याची प्रक्रिया सुरू केली आहे. या मागणीसाठी अखिल भारतीय विद्यार्थी परिषदेने केलेल्या आंदोलनानंतर महाविद्यालय प्रशासनाने सकारात्मक प्रतिसाद दिला असून, या निर्णयामुळे सुमारे पाच हजार विद्यार्थ्यांना आर्थिक दिलासा मिळणार आहे.

• मुंबईतील ठाकूर कॉलेजकडून विद्यार्थ्यांकडून वसूल केलेली रक्कम परत करण्यास सुरुवात
• अभाविपच्या आंदोलनाला सकारात्मक प्रतिसाद
• सुमारे ५ हजार विद्यार्थ्यांना मोठा आर्थिक दिलासा

नीता परब, मुंबई : कांदिवली (पूर्व) येथील ठाकूर कॉलेज ऑफ इंजिनिअरिंग अँड टेक्नॉलॉजी (टीसीईटी) येथे विद्यार्थ्यांकडून ‘युनिव्हर्सिटी फी’ आणि ‘स्टुडन्ट एड फी’च्या नावाने आकारण्यात येणाऱ्या अतिरिक्त शुल्काविरोधात अखिल भारतीय विद्यार्थी परिषदेने (अभाविप) केलेल्या सातत्यपूर्ण पाठपुराव्याला अखेर यश मिळाले आहे. महाविद्यालय प्रशासनाने विद्यार्थ्यांकडून वसूल केलेली संबंधित रक्कम परत करण्यास सुरुवात केली असून, या निर्णयामुळे सुमारे ५ हजार विद्यार्थ्यांना मोठा आर्थिक दिलासा मिळणार आहे.

प्रति विद्यार्थ्यामागे ९ हजार ४०० शुल्क आकारल्याचा अभाविपचा आरोप

अभाविप दिलेल्या माहितीनुसार, महाविद्यालयाकडून ‘स्टुडन्ट एड फी’च्या नावाने ३,००० हजार तर ‘युनिव्हर्सिटी फी’च्या नावाने ६,४०० अशी एकूण ९ हजार ४०० रक्कम विद्यार्थ्यांकडून आकारली जात होती. सुमारे ५ हजार विद्यार्थ्यांकडून ही रक्कम वसूल करण्यात आल्याने दरवर्षी कोट्यवधी रुपयांची वसुली होत असल्याचा आरोप अभाविपने केला आहे. विद्यार्थ्यांवर पडणारा हा आर्थिक भार कमी करण्यासाठी अभाविपने या प्रकरणात मागील अनेक महिन्यापासून सातत्याने पाठपुरावा केला होता.

Training Correction: शिक्षकांसाठी महत्त्वाची बातमी! वरिष्ठ व निवड वेतनश्रेणी प्रशिक्षणातील चुका दुरुस्तीची ‘या’ तारखेपर्यंत संधी

महाविद्यालयाच्या प्रवेशद्वारासमोर निदर्शने व ठिय्या आंदोलन

महाविद्यालय प्रशासनाकडून काहीही सकारात्मक निर्णय होत नसल्याने अभाविप आंदोलनाचा इशारा देण्यात आला होता. संबंधित शुल्क आकारणी थांबवून विद्यार्थ्यांकडून घेतलेली रक्कम परत करण्यात यावी, या मागणीसाठी अभाविपने महाविद्यालय प्रशासनाला तीन वेळा लेखी निवेदने दिले होते मात्र, त्यानंतरही अपेक्षित कार्यवाही न झाल्याने अभाविपच्या कार्यकर्त्यांनी महाविद्यालयाच्या प्रवेशद्वारासमोर नुकतीच निदर्शने आणि ठिय्या आंदोलन केले.

आंदोलनानंतर महाविद्यालयाचा सकारात्मक निर्णय

या आंदोलनानंतर महाविद्यालय प्रशासनाने विद्यार्थ्यांकडून वसूल केलेली संबंधित रक्कम परत करण्याची प्रक्रिया सुरू केली आहे. त्यामुळे विद्यार्थ्यांच्या शुल्कासंदर्भातील प्रश्नाला सकारात्मक दिशा मिळाली आहे.
यावेळी विद्यार्थ्यांनी समाधान व्यक्त केले.

रक्कम परत करण्यास सुरुवात झाली ही समाधानाची बाब

यावेळी मुंबई महानगर मंत्री अभिषेक पवार म्हणाले, “ठाकूर कॉलेजमध्ये विद्यार्थ्यांकडून ‘युनिव्हर्सिटी फी’ आणि ‘स्टुडन्ट एड फी’च्या नावाने आकारण्यात येणाऱ्या शुल्काबाबत अभाविपने सातत्याने प्रशासनाकडे पाठपुरावा केला. तीन वेळा निवेदने देऊनही अपेक्षित कार्यवाही न झाल्याने विद्यार्थ्यांच्या हक्कासाठी आंदोलनाचा मार्ग स्वीकारावा लागला. आता विद्यार्थ्यांकडून वसूल केलेली रक्कम परत करण्यास सुरुवात झाली आहे, ही समाधानाची बाब आहे. विद्यार्थ्यांच्या शैक्षणिक आणि आर्थिक हितासाठी अभाविप यापुढेही सातत्याने आवाज उठवत राहील. विद्यार्थ्यांवर अनावश्यक आर्थिक भार टाकण्याचा कोणताही प्रयत्न झाल्यास अभाविप त्याविरोधात ठामपणे उभी राहील.”

UDISE Plus Student Registration: शाळांसाठी मोठी अपडेट! यु-डायस प्लसमध्ये विद्यार्थ्यांच्या नोंदणीला ‘या’ तारखेपर्यंत मुदतवाढ