फोटो सौजन्य - Social Media
बदलत्या हवामानाचा शेतीवर होणारा परिणाम कमी करून शेती अधिक किफायतशीर व शाश्वत करण्यासाठी नानाजी देशमुख कृषी संजीवनी प्रकल्प आणि पाणी फाऊंडेशनच्या संयुक्त विद्यमाने ‘डिजीटल शेती शाळा’ अभियानाचे आयोजन करण्यात आले आहे. ही मोहीम बुधवारपासून सुरू झाली असून २२ एप्रिलपर्यंत सुरू राहणार आहे. आधुनिक तंत्रज्ञानाच्या माध्यमातून शेतकऱ्यांना मार्गदर्शन करून त्यांना सक्षम करण्याचा या उपक्रमामागील मुख्य उद्देश आहे.
सिंदखेडराजा तालुका कृषी अधिकारी रामेश्वर भुते यांनी या अभियानात जास्तीत जास्त शेतकऱ्यांनी सहभागी व्हावे, असे आवाहन केले आहे. त्यांनी सांगितले की, बदलत्या हवामानाच्या पार्श्वभूमीवर शेतीचे नियोजन बदलणे काळाची गरज बनली आहे. अशा परिस्थितीत डिजिटल माध्यमातून तज्ज्ञांचे मार्गदर्शन मिळाल्यास शेतकऱ्यांना मोठा फायदा होऊ शकतो.
एप्रिल महिन्यात विशेषतः आयोजित करण्यात आलेल्या या डिजीटल शेती शाळेमध्ये सिंदखेडराजा तालुक्यातील प्रत्येक गावातील महिला बचत गट, कृषी मंडळे, बीजोत्पादक शेतकरी, शेतकरी उत्पादक कंपन्या तसेच बियाणे उत्पादक यांनी मोठ्या संख्येने सहभाग नोंदवावा, असेही भुते यांनी नमूद केले. या उपक्रमाद्वारे शेतीचा खर्च कमी करणे, उत्पादन वाढविणे आणि प्रतिकूल परिस्थितीतही शेतकऱ्यांना उत्पन्नाची हमी मिळवून देणे हे उद्दिष्ट ठेवण्यात आले आहे. या अभियानात कृषी विभागासोबत कृषी विद्यापीठे, कृषी विज्ञान केंद्र, उमेद, पशुसंवर्धन विभाग आदी विविध यंत्रणा सहभागी होणार आहेत. तज्ज्ञांच्या माध्यमातून शेतकऱ्यांना पिकनिहाय शास्त्रोक्त पद्धतींचे सविस्तर मार्गदर्शन दिले जाणार आहे. यामुळे पिकांचे नियोजन, रोगनियंत्रण, खत व्यवस्थापन आणि उत्पादनवाढ यासंबंधीची महत्त्वाची माहिती शेतकऱ्यांना थेट मिळणार आहे.
डिजीटल शेती शाळेचे सत्र नियोजित दिवशी सायंकाळी ७.३० वाजता आयोजित केले जाणार असून त्याचे थेट प्रसारण कृषी विभाग, नानाजी देशमुख कृषी संजीवनी प्रकल्प, पाणी फाऊंडेशन आणि उमेद वाहिनीवर केले जाणार आहे. गावपातळीवरही कृषी विभागाचे अधिकारी व कर्मचारी या अभियानाची माहिती पोहोचविण्यासाठी प्रयत्न करत आहेत. या उपक्रमामुळे शेतकऱ्यांना आधुनिक तंत्रज्ञानाचा लाभ घेता येणार असून पीक व्यवस्थापन अधिक परिणामकारक करण्यास मदत होणार आहे. त्यामुळे या संधीचा लाभ घेत जास्तीत जास्त शेतकऱ्यांनी डिजीटल शेती शाळेत सहभागी व्हावे, असे आवाहन प्रशासनाकडून करण्यात आले आहे.
.png "Videos"){kind=small}
